回看。。。。

回看。。。。真係唔知當年點讀嘅！(唔出吓貓點掂？！當然，亦慶幸得到教授們嘅愛護。)

書入面嘅內容難明不在話下 (英文固然係，連中文嘅都係！X，明明冇字唔識，但又偏偏唔知點解會唔明？！所以往往成日讀到彷彿頭冒白煙。。。。哈，之不過，隊完「中藥」飲 High 咗呢，就康德尼采黑格爾柏拉圖牟宗三唐君毅熊十力等上身咁，明晒兼又讀得快！好堅嘅真係！尤其是寫啲報告同論文，簡直出神入化之作，玄過勁過九陰真經！分分鐘仲神過 oD書本！但又之不過呀，咁樣，書啲內容好快又會唔記得大半。。。。)，考試啲題目更難。所以，我有好幾次隊完「中藥」先去考。。。。試過有一兩次，仲 High 到發揮到寫爛咗 oD答案紙。

過癮快哉！不亦樂乎！

往事只能回味~

(一向唔鍾意借書。好鍾意買書嗰種乾淨安全實在私家擁有感覺。全盛時期，包括台灣住嘅地方，超過三百多本。現在，圖中亦只係屋企其中一個書櫃，此種書類嘅冰山一角。)

P.S. 我並非天主教同基督教教徒。

益力多

益力多，真的好好飲！從細到大都那麼鍾意！

但另方面，記得小時候，又總感到益力多很討厭！那麼好飲卻那麼少，每次都光速被喝掉，每次都有吊癮之苦感。於是，那時會採用不掀開它的錫紙蓋，用牙籤戳幾個小洞的喝法，因為如此可喝久一點嘛。那時常疑惑，為甚麼益力多不出產得大樽一點？！

最近，酒不喝了，除了吃大量蛋糕和朱古力等甜點，就是再度密會益力多。每次逛超市，都會一條五樽，幾條幾條的入貨。

一次，想起小時候的益力多吊癮情意結，為著滿足，一解這小時喜好，我將一條五樽的益力多一次過倒進大啤酒杯內 (並買一大樽味道差不多的乳酸菌飲料)，滿足地喝起來。以為這下可盡飲益力多之興！

誰不知不用喝到一半，已頂不住，為甚麼益力多竟然忽然不是那麼好飲？！還頗難喝下嚥！

還是一小口一小口，一小樽份量最好喝。原來，長大了才可懂得，欣賞見好就收、小 (少) 才是好、多不一定好、貴精不貴多、淺嘗輒止之道。

廚樂

下廚其實沒多大樂趣，因為由您肚子餓到到弄好一頓食物，不管弄的食物有沒有油煙，吃的時候餓的感覺已過了大半。若弄的餸菜是油煙甚重，那更沒甚胃口。

如電影「嫲嫲帆帆」(戲名好像是這樣寫的) 裏面袁詠儀飾演的嫲嫲講過一段對白，大意是~ 「每煮一頓飯，它的真義是甚麼？是希望藉著吃一頓家的飯，看見一家人，一家至親，齊齊整整、開開心心的相聚在一起。」

醉翁之意不在食；在乎彼此之能歡聚一刻也！

所以，入廚樂的真樂趣是能夠用自己的手用自己的心去做美食給自己至親至愛的人享用。尤其是放諸男女之間的愛。讓他們將您的心思愛意一清二楚三乾四淨痛快淋漓的吞下肚。他們感受到您的付出，您亦感受到他們的接受，雙方都藉此有著高潮滿足。這，是另一種層次的交流、歡愉。即使，您弄出來的食物很難吃~ o桀 o桀！

另外，下廚做菜最大之樂莫過於自己能按自己的喜好話事。甜酸苦辣濃淡清鹹，我來定。油鹽醬醋，刀鍋板鑊，由我十指掌控，主宰一切。那滿足感，又是另一美事。

說起下廚，我曾在廚房做過一段短時間，見過不少別人嘔心我會開心笑哈哈的笑笑小電影。如有一次，我要拿一碟意粉，一不小心把整碟意粉丟到在廚房地上，於是，只好立刻很小心地把意粉拿起再全部放回碟上。。。。

又有一次，一位客人囂張跋扈，那同事便告之大廚，大廚一聲：「收到！」，數口濃痰隨聲射在他正炒給那客人的主菜入面。。。。當然，上碟後，那同事會再錦上添花。。。。

所以，一向彬彬有禮但脾氣也很大的我，在食肆，酒巴，即使伙計們弄錯甚麼，有甚麼不對，也從來禮貌如常，不發脾氣。除非是，是菜已吃完，沒有菜會再上和菜還未到，已決定翻檯不吃埋單離開的話。

貓展

上星期日瞓晏咗，錯過咗香港群貓會嘅領養日，妖！Yil 自己今次！

好彩今個星期六同星期日 (4月4號至5號)，喺九龍灣國際展貿展覽廳 (見圖) 有個貓展，到時一定去。順便睇吓到時會唔會有貓賣或者領養。

飛

「揮揮手為我的自由，將身變作海鷗。。。。
青春在我雙手裡頭，人想到走應要走。
我想，好似海鷗飛，飛萬里，翱遊在天上，遠飛，我願遠飛！
我想，飛到天邊的，的盡處~ 夕陽下千萬明媚，世上樂園地。
。。。。
青春在我雙手裡頭，人想到走應要走。
何必理得失與否。」

基本上，由出世自懂事至今，以上的幾句歌詞是我的寫照，與我的性格和際遇都大致吻合。

但隨著歲月流逝，青春已是昨日黃花，而身邊的人事物，以及其他像年紀、精神健康、現實環境等都令自己不再那麼有自由度，不能再如以往般揮灑自如，豪情灑脫。這對一個活潑不羈且任性的人來說，不論有多清楚明白這是長大的代價、現實，也總有不少失落、茫然。

最近，已將近一年了，常有午夜夢迥時。四周漆黑靜寂之音和夾在被鋪床褥之中，輾轉難眠磨擦而起的聲音，伴著勾起以為早已忘掉的一連串從前的人和事，不單悸動，有些更如刺釘入心窩。

身邊的朋友，除了不超過三個還未結婚，其餘的都成家，有下一代了。看著他們的小孩，我總會回憶起自己兒時對著長輩叫 uncle，aunt 的情景時光，現在他們不是已仙逝就是已白髮蒼蒼。。。。今，到自己了。到自己是他們的角色了。

還有，還有不少習慣都忽地改變了。最明顯莫過於作息時間，白天渴睡晚上精神；與及，酒，喝不下了。告訴您，我已一個多月滴酒未沾。

這些，都是到到某年紀時，某階段來臨的歡迎前奏曲嗎？抑或，我是未老先衰？

只想此刻仍可飛穿棉花糖的每朵白雲，飛越長長滑梯的每條彩虹，飛過太陽伯伯的金鬚，飛上月亮姑娘的胸膛，飛到自己想飛的地方樂園地，儘管，已是未能如壯健海鷗般翱翔，而只是不復當年勇，滿心創傷的海鷗竭力再來的迥光一飛。

圖片源自：http://veronikanagy.wordpress.com/2008/03/02/the-balloon-that-got-away/

好歌靚曲共知音

很多電影的主題音樂和配樂，都是天籟之音，但無名。

卻更浪漫，傳奇，引人入勝。

殘忍的美

唉，有時候，當珍惜已沒用，那倒不如，最好就是突然消失，甚或將之毀滅，這可能還有絲絲價值，一點先死後生希望。起碼，不會難看肉酸。

這道理，放諸任何關係都是。

有先兆。但這篇並不是談這個。

一晚，凱撒大帝忽故找他身邊的元老、嫡系，談論死的問題。席間，其麾下有人問凱撒，哪一種死法最好，凱撒說：「越突然，越非常突然越好！」(That which should be most sudden！)

翌日，凱撒被布魯圖斯一眾在其身上猛插二十三刀而撒手塵寰。多悲愴。多浪漫。多淒美。

是的。如凱撒這樣說，死得突然，一切富貴榮華就如星光滅絕，走得璀璨，離得痛快傳奇。

亦如友情一樣，彼此緣盡，友逝了，便應不再糾纏。因為，這樣只會更加添污點。一件本來已是可惜不快的事，又何必再徒添一份婆媽難看之情。要知道，經過多少歲月沖洗之後，回頭再顧，也不是一笑而置，笑當天的它嗎？而且，特別在感情事上 (包括愛情友情)，很多時候，學會十指攤開，比硬要握緊雙拳來得有收穫。

正如上期提到佛家說：「『人與人彼此間的相遇都是緣份所致』；『彼此別離亦是緣份安排』」呢。緣份此事，緣來緣去，緣起緣滅，本無理在，卻自有定數。去了的緣，難免有無奈之感。但，只要記著，無奈也是人生，也是完整我們人生的經歷，感受，故此，也就不須過份傷感，執著。緣盡，真係甚麼都再也沒有的了！就由它他她去吧。反正，彼此於過去之樂，在這滄茫人世間曾存在過，快樂絢爛的痕跡回憶一成永成，一在永在。那個他/她，那段情誼，雖已不在，但將永遠都是您的朋友，您一生中的一段美麗回憶。每當憶起，想到如此，也自能無悔無憾，真正做到就讓一切隨風。

。。。。一劍斷絕，順道讓血花灑滿增添「奠」的淒美。

所以，重點是，友逝最好也是死得突然。只因緣起一刻，漂亮處盡是風情；緣滅一剎，山窮水複亦餘韻猶在。就將這樣美的開始，亦作為最浪漫的終結。讓此情永凝在還存戀戀繁星，一切仍是薰然醉人之時，在忽見一泓灩灩的奈何橋的河水，喝下黃婆湯之先，於穹蒼及時刻上不可磨滅的浪漫友痕哀歌。

寫在後面：

緣份，尤其是緣，我們雖然不能掌控，但亦得盡一己努力責任去在事前，即認識一個人之前，進而成為朋友之前，觀察他/她是一個怎樣的人及是否做得過的朋友。

而我們又怎樣能夠在認識一個人之時，去知道他/她是一個怎樣的人，去辯別他/她是否可信可靠？從歷史入面我們可以學到這方面的一二，正所謂以史為鏡，其中可以知人性之一二。而具體的，實實在在有傳觀人之法，清代名將大臣曾國藩之偉論~ 冰鑑，乃當中圭臬。是甚麼？下期緣之三之三，緣友之完結篇再講。

世界七大奇觀之五

委內瑞拉連環風暴

美國愛達荷州火彩虹

巴西河口高潮長浪

丹麥黑太陽

摩洛哥會爬樹的山羊

P.S. 其餘兩樣是洪都拉斯雨魚和印度喀拉拉邦紅雨。

另，唔知點解成日覺得山羊種感覺好邪氣詭異。

真正世界之最！

啲人成日話馬 X 咁長？但據聞駱駝 X、驢 X 同長頸鹿 X 仲長。

但至堅肯定係呢條鯨魚嗰條！(為免引起讀者不安，我唔將張相放大同置中喇。體貼哩~ 嘻嘻！)

呢條只不過係殺人鯨嘅，如果係全世界最大嘅動物~ 藍鯨嗰條，仲堅仲長！

一物還有一物堅，一啫還有一啫長呀！

想入非非

想入非非

港台節目「激辯」入面葉劉同癲狗嗰個組合單元，有驚喜係估唔到葉劉嘅表現竟然幾好！証明喺呢個濕鳩政府做 o緊高官時候嘅人係會零舍乞人憎嘅！另外，亦証明咗人係可以改變嘅！睇吓佢而家嘅髮型，睇吓佢而家嘅面部表情，唔再掃把，冇再藐咀藐舌。而且，仲大方得體。

相反，越嚟越覺得癲狗做節目有時真係過晒火位 (但佢喺議會入面嘅舉動，我係支持認同。因為而家咁嘅環境係需要有呢種咁嘅單位去平衡。)，令人有反感嘅感覺。

佢哋嘅第一集講拜拜嗰陣，癲狗講類似下次再見之類嘅話，葉劉就話：「好，下次再砌過！」

！！！！

呵呵呵！！！

A1 我嚟霸

生果報，特別係呢排，我真係以為變咗娛樂日報！又唔係冇新聞，但 X 那星點解成日都係啲明星歌星嘅嘢上 A1 嘅？！好似前兩日離譜到淫罐 A 嘅老豆破產都上 A1，我 X~ 關我哋鳩事呀？！

之不過，唉，根據美國最新嘅報紙銷量調查，幾份傳統報紙，轉走好似生果報咁嘅風格路線嗰啲 (邊幾份忘記了)，不跌反升，而有 Backbone 唔變嗰份呢，就跌到爬街噃！所以，都係廣大嘅讀者做成嘅~

建議肥佬黎不如乾脆將成份生果報台灣電視新聞報導式化啦，反正而家生果報嘅風格都距離不遠咯！

有錢係大晒

官商勾結，喺香港真係明目張膽，已經到到見到都唔覺嘅地步！

點解啲小販就畀人趕畀人捉，但啲大財團旗下嘅攤位，好似上網、收費電視同信用咭等等，又冇事？！佢哋係唔係有申請所以攞正牌？有冇人話我知係咪。

做官特權

做官，當然有特權，但原來包括講粗口~

驚豔李碧華

少時已甚愛看坊間眾散文作家，當中尤愛黃霑 (後來越寫越差，越寫越求其，越寫越離譜。記得有一次他用「哈」這個字，足足佔了半版！)、蔡瀾 (對他越來越有回水要求)、石琪、林行止和董橋等。亦有一段時間因其重低鼻音聲線而迷上張小嫻，還在九十年代初的書展上排隊找她簽名。

記得陶傑初回港時的文章，也有一段短時間頗喜歡，後來就越見走火入魔。林燕妮的賣弄得刻意也煩厭，反而現在的她所寫的倒不錯。她弟弟林振強當年每天的搏你一笑簡單作品，今已是絕世之作。倪匡的一向不是我那杯茶，但他重出江湖後的文，我卻蠻愛看。

芸芸眾人之中一直保持到水準，我又一直傾慕至今 (只限於文筆)，是李碧華。

李碧華那種哀怨纏綿、醉生夢死、虛幻不實、實又虛無、淋漓盡致、吊人心懸、辛辣鋒利、「錐」下「錐」下的文字筆鋒，當真在香港當前文壇無出其右，只其一人。

最要命是她的作品都會給人一種隔世情今生現的實在感覺。像胭脂扣，像霸王別姬，像秦俑，像潘金蓮之前世今生，像川島芳子，像青蛇等，古今虛幻實在，於她文字中迷離、譎異、詭奇的交錯登場，昨日今天，一切原來不過是歲月必經的韻事，風流之後，瀟灑地又換上另一故事，疑幻似真的再逐部上演重現，如此如此。。。。目不暇給！

驚豔是她曾改了一道菜式名曰白蛇與青蛇。「白蛇」是綠豆芽，「青蛇」指韭菜。炒好上碟後青白相互交纏，錯綜複雜，多纏綿旖旎。我建議若再加海蔘下去，更佳更絕。海蔘的豐富膠質，使三者更形影不離，糾纏不清，融在一起。而且，海蔘的笨絕態形狀，與許仙的不濟無能不是絕襯嗎？！

最驚豔是她的吃滷水鵝的女人。女人以自己的經血擦拭刀刃兩面，斬死正在練神功的不忠丈夫。女人何以要以自己的經血擦拭刀刃兩面，因為這才可破丈夫的神功嘛。

然後，女人將丈夫的屍體肢解斬件，丟進滷汁中，並一浸多年。從此，人與鵝的精華透過那桶滷汁相交相融，而那桶滷汁又從不會倒掉，每天每月每年都再煮又滷並熬，所以，別人都說她的店的滷水鵝味道很美味，獨一無二。

直到女人的女兒出嫁，她要她帶著一小桶那滷汁陪嫁 (望她的女兒的婚姻不會步其後塵)，她才說對女兒道出那滷汁之秘。

我想，若有一故事乾脆是女人以自己的經血去混熬滷汁或溝進蕃茄汁之內，每天做餸給男人吃或在早餐飲用，那，會更驚豔。

雜感

食雪茄，係好型，但唔啱我 style。

所以，只會喺屋企噴。



Hummmm，那年那日那歲月。。。。 感覺、灣仔、會展、Kara、某一啲已「人面全非」朋友。。。。



唔怕生壞命，至怕改錯名！

好彩我可愛！梁巔巔，正！

佢哋去咗邊？

喺我哋嘅一生，身邊周圍嘅人事物，有好多都會消失，有時諗落都幾有感慨，幾唏噓咖。

我識嗰啲你唔識，你識嗰啲我唔識，佢識嗰啲你同我亦都唔識。你同我都識嘅 (應該)，佢哋去咗邊呢？大家知唔知？

1. 露雲娜~ 千年女王同雨中 Sha La La 大家點會唔記得？！

2. 景黛音~ 有啲女人喺細個嘅時候唔會起痰，大個咗先覺得索嘅。佢係例子之一。 (當年有傳盧海鵬。。。。我幾嘆喟吖！)

3. 葛劍青~ 記得呢位長頭髮姐姐大部份都係做啲健康節目嘅。

4. 朱江~ 佢把聲好正！

5. 良鳴~ 好老香港，好獅子山下，有種代表住老香港一代嘅象徵性。

6. 龍方~ 大家唔知係邊個？喺八、九十年代嘅港產片入面，差唔多橫掃所有反派，專做奸人壞蛋衰仔嘅呢，仲未知？呢，喺血洗洪花亭入面強姦王祖賢；至尊無上入面做咖仔兼又姦陳玉蓮；賭神入面做賭神，周潤發個契弟更又姦張敏條屍；衝擊天子門生攪到劉華冚家伶；雷洛 I 「恰」未脫變嘅阿劉華嘅賭檔大佬嗰個上世紀御用大反派好正奸角呢，有印象哩，記得哩！

7. 跳飛機嗰一班小演員~ 唔知佢哋而家有幾唔天真呢？

8. Jason Donovan~ 好似早排攪到食白粉。。。。

9. Tommy Page~ 當年 (記得好似係89，90年。) 佢嗰首 I'll Be Your Everything 熱到呢！記得我仲成日扮佢嗰種「鍊」住喉嚨 chok 住條氣嘅唱腔。

10. Rick Astley~ 上世紀八十年代中好紅嘅佢，Together Forever，Never Gonna Give You Up，When I Fall In Love 你冇理由唔識！但唔知點解，又係突然消失得好離奇！

11. Belinda Carlisle~ 「Circle In The Sand」round and round~~~~~~ 你一定聽過啦！仲記得當年同條友抝佢個姓 Carlisle 點讀。應該係「卡 la 奧」，冇個 s 音嘅！

12. Taylor Dayne~ Love Will Lead You Back 一曲歌后，首歌真係正到呢！！！！！

13. Kelly McGillis~ Top Gun 固然經典，但湯佬前前妻喺戲中嘅嗰頭鬈 One Length，係我從此愛上 One Length 頭嘅開始。

14. Gabrielle Anwar~ Scent Of A Woman 入面同阿爾柏仙奴跳 Tango 經典一幕嘅 Donna，索到爆！

15. Family Ties~ 除咗知道主角之一嘅米高霍士患咗柏金遜症，其他演員嘅下落唔知點呢又？

16. 仲有其他唔知叫乜名嘅藝人~ 喺更難演嘅人生舞台，唔知佢哋又如何呢？

最難演得好嘅戲，係你我他每天現實中嘅戲。最難演得好嘅角色，係自己。

唯有忠於自己，或許還會演得好。但，要忠於自己，在這世界，社會，又談何容易~

良緣好友

緣份是由無情的命運贈予給您我的少數難得禮物之一。好的緣份，真彷如一份天賜禮物，是人生漫漫旅途上的額外恩喜。

這兩天翻看兒時讀物~ 中國歷史圖畫故事，其中看到管仲和鮑叔牙的管鮑之交、伍子胥和孫子 (孫武) 的情誼、孫臏和田忌的惺惺相惜與及特別是劉關張的桃園結義，均使我感到人與人之間那份緣的奇妙。

常言道：「世界上成萬上億人，為甚麼偏偏你和他、我和你能夠相遇相識？更甚者，再進而做成深交好友。這不是緣份是甚麼？」

有哲學家曾把這緣份諒解為只是一隨機的偶然。你要嘛就相識到這個他，要嘛會結識到那個他。所以根本不用驚嘆緣份的神奇。若真是如此把緣份放大，那你上洗手間，站在你旁邊那位先生也跟你很有緣份了！

是嗎？

我認為緣份並不是那些哲學家所定義成以上的那樣。緣份是~ 有沒有試過初相識一個人便一見投緣，他明明並不是怎樣儀表出眾，却令你感到有一種說不出的舒服。與他談起來更有說不完的話題 (最少不會悶)，相逢恨晚。但有些縱使他不是面目可憎，但與他相處只稍稍的一會，也會覺得厭悶之至，秒過如年。這，就是緣份了。

佛家說：「人與人彼此間的相遇都是緣份所致」；「彼此別離亦是緣份安排」。緣來緣去，緣深緣淺，真的不用強去追求。是你的，始終都總會是你。相反，緣盡就真係甚麼都已沒有，再強留捉住只會重傷自己。

坐在飛機上的窗口位，您正遠望着似虛又實的彩雲。身邊那位與您素未謀面的朋友，他的手肘一不小心碰到了您，向您說了句真抱歉。然後他或許會問，您是那裡人？由此，話匣子打開。他和您都不會介意大家說些甚麼。因為這程飛機到達目的地之後，彼此會再相見的機會是幾百萬分之一。所以，您甚至會跟這個毫不相識的人說到你剛剛失戀了；而他會告訴您，您並不是最慘的一個。因為，他的太太最近才因意外死掉。。。。落機後，大家在入境大堂相視一笑，互祝前程後分道上路。自此忘掉了這次的偶遇。但，之後某年的某一夜，您的腦海也許會忽然想起那次飛機上的情境，不自覺地想著、想著。。。。細味起來。

若這是隨機的偶然，那也是值得一個人去捉住、回味。

我自己很信緣份這傢伙。它有時好可愛；有時又很討厭。它有時會逗得你如痴如醉；但有時却又會令到你傷心欲絕。它只喜歡靜靜的、俏俏地在您毫無會意下突然出現於你面前，給你驚喜。

有它，人生才會有顏色。才會好玩。

而朋友，不必多，有一兩個真心知心，幫到手就夠。更要注意的是，有時候，寧可沒朋友也總比有朋友好 (孽緣之下結識到的壞朋友)，因為，沒朋友頂多孤寂，但若有壞朋友，輕則破財有是非，重則萬刼不復。正如案例~ 孫臏錯識龐涓和韓非錯識李斯。不可不察！

瘋癲廣告之巔巔餃類食品系列

嚟喇喂！嚟喇喂！有冇有錢佬有錢婆總之係有錢人出錢，出品咁 Q 好味又真材實料有營養嘅雲吞、水餃同鍋貼呀！

廣告~

「媽咪話：『我個仔平時唔多食飯咖！又揀飲擇食！哈，自從冇耐之前食咗隔嚟屋梁巔巔包嘅水餃同雲吞，美食美味啟發咗佢嘅食慾，依家個胃口開晒，一日食唔停呀！』

細路話：『好好味！好好味！Daddy 媽咪都想黐嚟食，我唔俾！佢哋唯有自己再煮嚟食。』

Daddy 話：『梁巔巔嘅水餃同雲吞真係好好食！仲散發咗家庭嘅溫馨！我哋成日一齊食咖，促進咗親子關係！』」

「大合唱：『不是蝦餃也不是包
卻比餃包更加飽
雲吞鍋貼加水餃
營養豐富好味道
男人食咗勁過大炮
女人食咗食糊食到飽
細路食咗會係咁將書刨』」

「女士話：『唔同嘅日子，做唔同嘅事。。。。但梁巔巔包嘅雲吞、水餃同鍋貼，就日日食都唔膩、唔厭。
尤其是係鍋貼，喺某啲。。。。日子。。。。食無湯嘅鍋貼，嗰種感覺，好。。。。好乾爽，個心好安慰，好舒服。』」

「營養師話：『餃類食物真係好有營養。營養仲好均衡 tim！因為例如，一隻水餃入面已經包含肉、菜同澱粉質。正正係餃子細細食效大！』」

總之，我包嘅雲吞、水餃同鍋貼真係好正好好味！(圖一雲吞、圖二水餃、圖三鍋貼。)

週末狂熱症發作完畢。

睇 o埋條片先好走，好正！祝大家有個愉快週末。

今日一記

霧‧春天來了

春天來了~~~~ 春天來了~~~~~

遠時像遠山路迷茫~~~~ 千里霧飄送~~~~~

。。。。

又要日夜勁開抽濕機啦！

又見牛肉麵

今日中午約咗老友靚肥妹短聚。時間過得真係好快呀，當初都想不到會同佢成為知己好友，哈，唔經唔覺仲識咗七年喇喎！依家佢仲大 o埋肚 tim！人同世界真係時刻在變。

陪佢去個冇醫德嘅女醫生度攞完報告，去咗我上次提及位於廣東道嘅台灣牛肉麵食晏。

我點咗紅燒牛肉麵，佢點豬軟骨湯麵，另加一籠四個小籠包。

湯底濃 (雖然仍嫌未夠功力火喉)，牛肉「稔」但有咬頭，頗入味，呢啲湯底，呢啲牛肉先叫似啲樣吖嘛！

試咗一啖肥妹嘅豬軟骨湯麵，唷！反而仲好味！不過聽佢講啲豬軟骨唔夠軟。

小籠包大又多汁，皮餡比例唔錯，餡肉鬆實度 okay，有肉香。個人認為比翡翠拉麵小籠包嘅好味。(其實我唔覺得翡翠嘅小籠包好食)

綠粉

肥妹一見到我：「嘩！塊面真係肥咗好多！」

XQYZ!##XXYQQ%%$!YYXXZ!##X

。。。。

佢叫我不如試吓飲綠粉 (唔係白粉)，可以收水腫兼減肥，話袁彌明飲咗好掂喎。於是佢帶我去咗睇，成二百幾蚊，得一個月份量。。。。不過，我諗都要試吓咖咯今次。

Kama 與我

去食牛肉麵之前我哋去咗海港城嘅 City Super 逛，離開嗰時肥妹見到好似有靚女，於是話要走過去睇 (女人真係。。。。)，咦，真係幾索！但身裁就「薄」咗啲囉。Heeeee~ (但上網睇番佢啲相，上鏡靚多啲！)

佢話：「哦，係 Kama。」
我問：「。。。。咩 ma 話？」
佢答：「Kama 呀！你唔知邊個 Kama 呀？！」
我話：「。。。。」(阿嫲我就識)

佢續問：「你冇睇電視咖？！拍邦民廣告嗰個呀！我阿爸都知啦！你真係又 out 又 old！」

。。。。

我走 o埋去影相嗰時，強烈 feel 到我好「佬」，好中坑。。。。

肥妹，恭喜！

Regina，

恭喜！！！！！

大排檔之精彩~ 新強記

大排檔在香港這現實世界已瀕臨絕跡，聽聞珍品之中的珍品，中環的大排檔亦將會於不日消失。大排檔只可以在一些公共屋邨的食肆範圍找到。

一向喜歡大排檔，無論是它的人情、風味和食物質素都令人回味難忘，垂涎三尺。好些大排檔燒出來的食物水準更駕於不少貴價高級餐館之上，像我朋友在黃竹坑熟食中心所開的廣勝海鮮飯店便是其中一例。說到熟食中心，很多昔日的大排檔都搬遷進去，跑馬地和北角的更進化至明星級飯堂。

但不知是否心理作用，總覺得露天的比室內的要來得好吃。可能身處露天的，檔主們仍如未入關，環境沒有多大變化，火喉水準仍得以保持。不像搬進了有冷氣的熟食中心的大排檔，燒出來的菜式都如涼了半截。

新界沙角邨和乙明邨的露天熟食大排檔中心我均試過，非常好吃！前晚與人聯絡感情聯絡到去大圍，順道到隆亨邨的新強記吃了晚飯。

嘩！！！！好好味呀！

點了滷水鵝片同乾炒牛河，滷水鵝片大份量多，鵝片薄而質足，又結實入味。更「片」得整齊，不像一些食肆弄得蓉蓉爛爛。在墊著鵝片的配角芽菜、韮菜和滷水豆腐，芽菜爽口韮菜軟韌，豆腐滷得心軟邊脆，新鮮！主配角一樣精彩。

同樣大碟，鑊氣火喉已超越九陽神功第十陽的乾炒牛河，只是那份「熱情」已嘩喇喇！河粉粗幼厚薄適中，炒得溫柔軟韌，醬油入味又不過鹹，難得是沒加味精，吃後不會口渴。牛肉片厚身，「稔」，矜貴是並非強用梳打粉強姦過的「稔」，自然舒服！好！

結賬八十多塊，不貴，值！

都是那句，不用一味只常到高級地方吃的呢！應該平民貴格都會去才是。而平靚正吃到人間滋味更才是識飲識食真味道，真快慰~

不文集之謎

娛樂界、文化界、廣告界甚至樂壇千面鬼才黃霑編著嘅不文集，已經去到第 n 版，出到而家都仲出 o緊！厲害！

不文集裡面有一條避孕秘方，據說萬試萬靈，從不失手。

書裡面印咗秘方嘅圖，撕落嚟沿虛線摺，秘方嘅驚天之秘就會出現。。。

我本不文集買咗廿幾年，從未試過照住做。直到我嘅女友話我知佢曾經照住摺 (仲癲過我！好一個咸濕妹！)，將個答案話咗畀我知，我當堂笑咗出嚟！

聽佢講話好難摺，攪咗好耐，左摺右摺先成功。。。。

出嚟嘅答案係~ NO FUCK

-_________-

唔怪之得萬試萬靈，從不失手！！！！

吹 _ 脹！XDDDDDDDD

經典場面

自少，屋企就係麗的同亞視擁躉，尤其是麗的年代。

所以，有好多電視劇嘅經典場面，由於慣性收視，甚少人睇，講出嚟都冇乜人會有記憶。

但有個場面，喺以前嘅年代，無論係麗的亞視、無線抑或甚至香港電台嘅電視節目，都一定有嘅 (港台嗰啲冇咁誇)！就係群體煲煙~

記得喺麗的其中一套經典電視劇集~ 變色龍入面，張瑛同平凡兩個一坐埋就煲煙。其他人物不時亦有。到到續集仲堅，差唔多個個都係煙民！當中尤以張瑛、劉克宣、張錚同吳回四個老戲骨更係煙不離手嘅煙鏟！喺戲入面，佢哋幾個成日係咁煲係咁噴！經典場面就係有佢哋幾個聚埋吹水嘅戲份，好勁，口沫橫飛，一人一句，一人一枝，仲要煙駁煙，成個畫面好似煙檔開 P 咁 (我睇佢哋真係喺度 enjoy 緊嘅！)！

經典！

我估無線啲劇集都會有呢啲場面，但我諗就應該冇以上四條「A」一齊發功咁震撼咯！Haaaaa！

順帶一講，食煙真係有害無益，不應推廣。但亦唔應該連戲入面都唔畀嘛！

另外，食煙其實可以好有功能咖！例如，無聊，緊張，雙手唔知放喺邊？眼神唔知點好？整番口~ 初相識，尷尬？嚟，整番口~ (扮諗嘢) 真係喺度諗嘢但怕畀人以為您喺度戇居居？嚟，整番口~ 幾個老友聚舊，講衰嘢？嚟，更要整番好多口~

食煙，係我自由，而家又已經冇二手煙嘅憂患，唔好再打壓攪我哋啦！吓~

P.S. 必須強調，我已經戒到喺外面唔駛食煙，同 o埋一日只係食幾枝咋！