獅心人命

昨日下午看到明珠台一個講野生動物的節目 (一向好鍾意看這類節目)，一頭雌獅和一頭小羚羊，在解不開的謎之下，竟然一起生活。更奇怪的是，那隻雌獅為了「收養」那隻小羚羊，自一起的那天開始，連續十多天不去捕殺獵物。而小羚羊除了因飢餓所以有時要離開一下，找同類的母羚羊去吃奶外，牠都接受著牠的收養，形影不離。可惜，每次當牠要這樣做的時候，雌獅都趕走羚羊群。

結果，雙方都因大家反常的情況而弄至身體虛弱。

到某一日，雌獅如常帶著小羚羊四處飄零，去到某個地方，雌獅見安全，於是便放心讓牠離開自己視線範圍，突然，「吼！」的一聲 (那鏡頭，如今仍歷歷在目，非常震憾！)，一隻雄獅殺了小羚羊，並把牠拖到不遠處進食。

雌獅很徬徨，又害怕，只有眼白白看著。最後，牠能做的，只有舔著、嗅著小羚羊被那頭雄獅所殺，拖著而留下的那條血路。

只此之後，那頭雌獅再前後分別「收養」了五隻羚羊，之後，便失蹤了。就連那位動物學家也找「她」不到。

很反常、很玄妙的一個真實故事。

也許，如我們一生之中，一些曾出現過，卻又消失了的朋友或戀人一樣，大家在大家的人生中，只為著註定的安排而在彼此的其中一頁劃上幾句。在完成這使命後，一切，便全歸於無，您與我都在雙方的週遭，自然消失。

灰飛煙滅。

醉人情景~ Eternal Flame

The Bangles - Eternal Flame


冇得講，好聽、好靚、好 Feel 加自己對呢首歌有屬於自己嘅故事同感情，係我最愛歌曲前五名之一。

中間純音樂嗰段。。。。長途機上，機艙關上燈，一個個窗口，大多數也都拉下了遮光層，兩邊的機窗，偶爾有一兩扇開著半邊或微微留下一絲空隙，九宵外的金箭透入，看到可愛的塵埃飄動跳盪；空中美麗的小姐好似天仙般一邊慢走，一邊細心的看著乘客；我喝著酒。。。。中間段純音樂，好像是結他又好像是鋼琴。。。。

呢個畫面，一聽到呢首歌就會再浮現。甚至，都會經常發夢夢到。

Sunshine，Welcome To Hong Kong~

今日同嚟自一年前喺 Blog 認識嘅星洲三寶之一~ Sunshine 去咗一些我喺香港最喜歡嘅地方。感覺好好！好 High！

Sunshine，實在估唔到您係一個咁Q過癮嘅人，同您切磋，真係他媽~~~~ 的高潮迭起！等12月14號您生日，我再詳細將您寫下。

好高興終於與您見面。

天秤座~

公正、 親和、沉著、最理性、最冷靜、面面俱圓、有條不紊。。。。

外表是十二星座最靚至 Cool、個性瀟灑幽默、有美感。。。。

也是愛情殺手。。。。

似乎，一切最美好的都萬千匯聚在一身。。。。

但您可知道，在優越的平衡點上，

有時

我還是會那麼徬徨、無助

甚至

會頹如長堤已崩。

所以，

可否 (寧可) 將我鑲嵌在平凡的一個角落。

細細哥，生日快樂~

上一世紀六、七十年代，香港還未富裕，大部份香港的每一户都為著謀生而張鑼奔波，因而沒時間照顧孩子。亦由於這樣，那時候，一些家庭很流行幫人湊細路仔，以應付日常開支。

我與他，就因為這樣而相識，一出世就做朋友。在我還未出世，那時，他打從還是 BB 階段就已住在我家。一直到他兩歲多，我出世了，至此，大家便互相在彼此身上取得樂趣，彼此當大家都是玩具 (細路對朋友還未有概念)。

由於他在自己家中排行最細，所以，大家都叫他細細，家人們叫我叫他~ 細細哥 (一出世做人細佬。。。。唉~)。不得不說，他，在未頭髮稀疏前，很靚仔的。他的一雙眼睛，他媽~~~~ 的，電過 Tony Leung。

小時大家的感情簡直就如親兄弟一樣，那時我甚至以為他同我有血緣關係，是親哥哥。記得有一次，我被媽媽打，哭的，卻是他。我問他：「細細哥，你做セ喊？」「因為你畀契媽打。」

一直到他七、八歲左右，他回到自己家居住，但我們仍保持著緊密聯絡，如打電話問他龍虎門劇情、黑社會問題和其他古靈精怪問題好似神打關公上身是怎樣等等。而且，每逢過時過節，他都會來我家小住幾天。

他跳舞 (小時爬上我家飯桌上跳扭腰舞，引到全層的鄰居圍著觀看。)、運動、唱歌等都極有天份，而且，他的「IN」，堪稱型仔一族。教我著衫；我第一次落 Disco，就是他帶我去 Canton；食「中藥」，都是他教曉的。那時，他也許就是我的偶像。

及後，隨著大家年紀長大，因某些事情，我倆漸漸由少聯絡，再到發生磨擦。97年甚至與他弄至割席絕交。

緣，真係好奇妙的傢伙。偏偏，在03年一次上班午飯時間碰見他當時的女朋友，在她的穿針引線下，就這樣，我與他又再聯繫上。

即使年多前亦曾有一點磨擦，但彼此的感情已昇華，而且，一切不快，隨著已過去的時光而隨風消逝。到現在，大家間中通電，做到無事常相見，彼此仍兄弟相稱，有多少人從一出世就有那麼重的緣份便可相識，並且結為兄弟呢？相識三十四年，緣之至此，君復何言，夫復何求？！

細細哥，縱使您已不是我的偶像，但您知嗎，您仍是我唯一的大哥。

十月二十三號，生日快樂！

並祝心想事成

Happy Birthday

最佳男女醜角~

雖然已過咗一排，但炳人呢 oD嘢冇話興唔興嘅~

想講嘅係冇耐之前東週同肥沈單嘢。

啲藝人，尤其是成龍同無記，單嘢點解冇行動嘅？！肥沈佢仲係無記嘅台寶嚟噃！

係壹仔好蝦啲多襯家 oD，仰或係之前扮晒超人嘅班 X 炳選擇性地做嘢？！定還是人哋老板係政協常委；或因為呢本嘢以前老板「壽」仔係淫蟲等人老死兼係部份藝人嘅現任 boss，所以 ad 都唔 ad？！摶出鏡搏見報？！又抑或係認為冇問題？！

可能佢哋做戲已出神入化，所以無論平時照鏡都唔會覺得自己肉酸。

嗰日，個個都係最佳男女主、配醜角。

成班小丑~

真正廣告味道

1985年 - 特醇軒尼詩


唔係成日話新不如舊，事實的確係咁。

廣告，最緊要主旨兼所 sell 嘅對象明確清晰，輔以畫龍點睛嘅表達手法及錦上添花嘅主題音樂，帶出 product 令人致命嘅誘死人吸引力，就掂！

而家 oD廣告，往往只一味流於扮嘢，卻欠了以前的那一份張力和感覺。試問而家嘅廣告，有幾多個係令人驚嘆而更令您一看永世難忘？！

好似呢個由黃霑創作嘅廣告作品，易吸收，大眾化之餘又不失高格調，劇力萬鈞，而且又能夠將主題，包括主題音樂變調再變調，卻又仍能貫徹始終，嗰句「Hey Big Spender」更深入民心，奇才果然係奇才。

另，可惜冇葉麗儀嘅原裝版本。

叮！大大~ 白白~

「唔，你 oD牙質好靚！」
「冇蛀牙。。。。」
「唷。。。。都好。。。。嗱喳吓。。。。」
「幾耐冇洗？」
「嘩。。。。你啲牙都好大隻吓 ha~」
「唔駛緊張唔駛急喎~ 嗱，抖一抖，慢慢嚟~」

個牙醫一路攞住枝超聲波洗牙器一路自己嗡以上說話。自己娛樂自己啩~ (喺香港地，好重要！)

但佢個 tone 同個 beat 又嗡得好搞笑。有幽默 ar ha！

呢個牙醫算係好。因為佢發現我左上愕隻智慧牙蒲咗出嚟，但佢冇好似平時其他嘅牙 Sales 咁 sell 我脫喎。呢位牙醫好中肯咁講咗佢嘅意見，同價錢而已。好！更好係唔駛「mok」！

日日飲牛奶，健康又活潑；時時去瞓覺，聰明又醒目。人話我聰明~~~ 生得標準 Beautiful~ 認真冇問題。

靚仔。洗完牙，靚靚仔！

定期洗洗牙，靚仔又靚女。大家記住咯噃！

風信子，生日快樂~

風信子，風信子哦。。。。

佢係鄭裕玲 + 袁詠儀嗰 type 咁惡哽，因為平時喺 Blog 嘅佢，牙尖嘴利，無論有理冇理都咄咄逼鵝，永不言輸 (但對其他人呢，又好好個噃！頂~)。佢話我嗰時，好冷靜，活像恐怖片裡嘅古怪小孩般。而且常有佳句。

原來，佢外表，係非常溫婉嫻淑，同佢內心完全相反。呃晒人。

學者型嘅佢，除咗斯文之外，還帶著絲絲風之柔情~ 一幽風飛散髮披~~~ 肩~~~~ 而且，說話時輕聲細語，餘音嫋嫋，好女人！

佢，不乏有趣一面，例如好似佢講廣東話嘅時候，我聽得明70%咖咋！仲有嗰三成我要靠佢講嘅上文下理去估佢。因為，唔知點解，佢 oD廣東話，成日會轉音變調。。。。但當佢講國語同英文嘅時候，又冇問題咖噃。而且，特別係佢講嘅英文，真係好好聽，仲，好 sexy ！真咖！For example：「Din Din，you know，you're so cheap~」

正點吧？！

唱歌同叮噹入面嘅「技安」有得相比嘅佢~ 五音不全，但正！正喺邊呢，就係有唱膽。話之你頂唔頂得住，總之要唱完，對得住自己。不過，佢好就好在唔係咪霸，否則。。。。又不過呢，佢唱「在雨中」嘅其中一句 (唯一一句！) ~ 「在夜裡~」，正過原唱！

神奇否？！

仲有，又例如鵝請佢攪下我哋風巔信霜入面範本 ( Templete) 嘅內容設定 (因為出唔到廣東話)，佢話：「哎唷！好忙吖最近！」但係呀，有一日，佢同我講咯喎：「喂，我搵到 Keroro (軍曹) 嘅相呀！不如加落去咯！」「妳又話好忙~」佢冇理，繼續興奮地自言自語：「你話邊幅好啲吖？」我心諗：「妳都整硬 ga la！」但，算佢啦！都叫做會問下！謹代表程霜同妳講：「唔該晒呀風信子！」

她，可愛吧？！

Okay，嚴肅點，自去年到今日，同佢都相識、交流了已有一段日子 (一年有多)，了解到，她係一個意見中肯 (最憎佢冷靜 ga 嘞)、為人持平、蠻有義氣與及間歇性「武則天症候群」上身點我做嘢的好女子。雖然，她的自我保護意識是強了一點，但卻仍能夠接受到我，可見佢都是一接受到異族的開明奇葩。

大家唔好見佢同我喺 Blog 界留言間連環駁火就以為佢係辣椒一名。事實上，佢係~ 之外，誠然，涵養、學識、見地 (不流於人云亦云而有自己一套) 係我這個朋友擁有的優點。

我同佢，有吵過交。但佢嘅大量 (加上我的不拘小節)，每一次卻更能令彼此感情更上層樓。Yil，其實係我大量 oD！^~

風信子，硬中有軟，軟中有刺；文字既有男兒的硬朗，然也有滑不留手的流麗文筆。一位靜如處子，動 (郁鵝嗰陣) 如脫兔的女子，能夠在 Blog 做到老友，再繼而成為拍擋，一個溫文爾雅之女卻能與一市井俗民之人水乳交融，小弟實在與有榮焉！

風信子，今天，十月十九日，生日快樂！

藍色風信子美麗開遍大地

幸福芬芳香遍四方

並祝事業愛情皆如意

Happy Birthday

Jazz Class。教會。牛奶~

去 Jazz Class

上星期二 Tracy 仔有事上唔到 Jazz Class，於是益我，用咗佢張「飛」去上。

Jazz Class，去到，好多人呀！好多女仔呀！但我全心接觸藝術，對我冇影響喎~

跳~ 跳到成隻油炸蟹。

oD筋硬晒。。。。人哋彎低身雙手可以壓到好低，我就好高。。。。個鬼妹喺隔離好有禮貌望住笑一笑，我只好又笑一笑，講：「That's it~」嚟遮醜。

又有一嘢仰臥喺地上面，對腳同對手要向上伸直，個阿 Sir 逐個逐個睇嘅時候，睇到我，我又睇到佢睇住我，我同佢講：「哎哎，阿 Sir，唔掂呀！伸唔到呀！伸唔到直！」大家知唔知蜘蛛死嘅樣係點？冇錯，成隻反肚兼 oD腳屈一「喳」~ 就係咁嘞。

之不過，個阿 Sir 讚我認真又投入！有幾嘢仲話我做得啱！譬如好似扭腰扭 pat 花咁。

三個一組跳嘅時候，Ruth 姐姐又唔話我聽應該跳喺佢哋後面，等我下下同佢哋平排！攪到好似搏出鏡咁。唉，我個人好 Low Profile 咖嘛！

跳完之後第二 day 條腰有少少隱隱作痛。。。。好彩只係少少。

24號我又會出現喇，到時睇吓我同 Tracy 仔邊個「虧」啲~

番教會

前日，星期六跟鳥飛同 Kineyi 番教會，hum。。。。冇セ感覺，係前一日又例牌「作」病同肚疴。咁多年都係咁。

講開教會，諗起教徒，諗起教徒，又諗起教會入面一啲偽君子偽基督。 呢 oD人樣，成日打正旗號基督徒 (天主教徒及佛教徒)，但自己卻又其身不正甚至衰嘢做盡，咁，比魔鬼為害更大。

呢 oD，就係教會入面嘅，敗類。

飲牛奶

自從叫做戒咗酒 (少飲兼飲少好多) 之後，轉飲牛奶，但點解 oD短暫記憶有問題出現？！例如話我諗住跟住落街買古惑仔睇，轉一轉頭就唔記得咗，要好辛苦係咁諗，一步步追番之前 oD記憶先記得番！

セ飲牛奶唔係對健康有益嘅咩？！

鴨鴨萬歲~

圖中係今晚整嘅主菜~ 鹽水鴨，咸水雞同佢比，冇得 fight。

小弟我自細好鍾意食雞，細個嘅時候仲有個朵叫雞皇。

但自幾年前開始轉咗鍾情食鴨，原因，無他嘅，好簡單，鴨，好味啲。

鴨，正！肉實兼幼細，應滑嘅地方固之然滑，唔滑嘅部份，亦唔「鞋」，由於佢肉質纖維細膩動人，所以，即使唔滑但仍見可愛。唔似雞肉咁「鞋烚烚」。舉個地方吧~ 雞胸，大家知咩料啦，「鞋」到呢，又冇味。鴨胸，唔同嘞！精彩程度同乳鴿互相輝映！強烈見議「企圖令自己更窈窕人士」以鴨胸代替雞胸。由此，減肥好 Happy，過足口癮又能纖體~ 鴨鴨好嘢！

除咗鹽水鴨，仲有北京填鴨、當歸鴨、麻油米酒鴨、滷水鴨、荔芋鴨肉煲。。。。yo！點頂？！Yum yum~

單點埋？

「咦，你不是終於已埋了單離開了嗎？為甚麼又見到你一個人坐在這裡？」

「埋了。但又要坐回這裡。」

。。。。看看甚麼時候可以真正埋單離開。張單會否想埋但埋唔到。。。。

單究竟點埋？

點解？！

「嗨，Southern Comfort 唔要冰，成杯斟滿佢嚟，唔該。」

我的至愛~ Monica Bellucci

Monica Bellucci Entrevista en Italiano


細個到而家，鍾意嘅中外明星唔多。卡芙蓮丹露 (Catherine Deneuve)、嘉寶 (Greta Garbo 1905 ~ 1990)、梅麗史翠普 (Meryl Streep)、鐘楚紅同胡茵夢呢幾位都係令我而家仲迷緊嘅演員藝人。

最近幾年，有幾位新嘅攪到我咪吓咪吓，整到我好似回到青春期啲仔鍾意偶像，又或者好似啲阿伯見到美少女咁，總之就沉啦。

林志玲、陳嘉容、林嘉欣都係令我每次過度聚精望住部電視、海報、雜誌、報紙嘅美女。仲有一個，迷得我最厲害最攞我命嘅，係呢篇，呢個 Viedo 嘅主角~ 蒙妮卡貝路奇 (Monica Bellucci)。

呢個 Monica Bellucci 嘅特輯，從頭到尾都唔可以錯過。但大家可以只睇開頭嗰段同尾個 part。中間意大利佬同佢做嘅訪問，唔迷佢嘅，大可不理。

將 Monica 全部最靚最精彩嘅一刻剪輯作為呢個訪問嘅開首及結尾，配合 A Whiter Shade Of Pale 呢首經典，殺！

「英雄難過美人關」、「烽火戲諸侯」、「紅顏禍水」、「色字頭上一把刀」、「雲鬢花顏金步搖，芙蓉帳暖度春宵。春宵苦短日高起，從此君王不早朝。」、「女人係水造」、「不愛江山愛美人」以及「女人，係要嚟縱，要嚟寵~」等等呢 oD詩詞俗語金句，明晒！！！！！

如果同到佢一齊，做昏君，「制」！短五年命，都「制」！

女人，真係令人又愛又「恨」。

A Whiter Shade Of Pale

Ruth，生日快樂~

希臘有如詩似歌的~ 神皇宙斯、太陽神阿波羅、愛神維納斯及酒神戴奧尼索斯等等迷人傳說。。。。

去年九月在程霜那裡認識她，及後，在今年四月二十一號與她見面。那次聚會之後，曾記道：「她寫的絕大部份裡，給我的感覺，是一不苟言笑，嚴肅非常的人。繼續，漸漸，發覺她於文筆中，原來也不乏輕鬆一刻，而且，偶爾更有著出乎意料的驚人爆笑幽默。由於她平常所寫的嚴肅認真非常，故此，當她說笑的時候，那效果比一般人來得更勁。

昨晚，終於得見伊人一面。起初，原本一向放浪形骸的我不禁正經端莊起來。驚喜地，我解除一切了。因為，她那燦爛的笑容、可正可「奸」的表現表演、在其平時所寫的東西給人一貫的感覺之外還流露出出人意表的真摯，與及和藹可親的親和力。

她的正經，她的典雅，她的佻皮，她的一舉手一投足，她揶揄我時的雙眼一眨一眨，快要醉倒我的姿態，無可否認她是一個層次萬千，亳不單調的人。

想像不到，一個橫跨文、理、商還有藝 (音樂) 自我約束甚高的靚人，竟會有入世真我個性給您看的一刻。」

自那次後，我和她彼此的見面次數漸多起來。而且，由於亦在不同場合 (如行山) 交流過，所以，對她那多樣的性格有著比前更深入的認識、「體會」(如被她整蠱~ 親愛嘅 Ruth 姐姐竟然笑笑口咁同鵝講：「自己拎。」。。。。哎唷，點解唔同平時嘅姐姐 ga？！影相時仲玩整蠱！最心碎係畀鵝見到 Ruth 姐姐佢竟然有份！佢當時嗰樣開心到吖？)。

她就彷似一顆鑽石，擁有著多面獨當一面的耀眼光亮。但卻又沒有一絲懾人的凌厲。與她一起，有的是一份令人置身典雅憂悠的舒適感 (雖然我經常叫她行慢 oD！等我。。。。)。

另有兩樣欣賞的，是她的說話了得。她的每句，都沒半點多餘，而且應變奇速。小弟我出名快，但大部份時間，她好像比我轉得更快！所以有時，我不會叫她做 Ruth 姐姐，而叫她做 _ 哥。

第二樣係，她有一心多用的本領！她能夠同時一邊與我在電話談話，一邊做另外三、四樣事情。有幾次，我忍不住，氣結地問她究竟有沒有在聽，她氣定神閒又得意的重複我之前所講的一切。XQYZ#!$$%!XXQYYX!~

全部，都由她的源頭~ 典雅中再散發。

Cool 時 cool 過冰山，開朗時勁過驕陽，我曾對她說：「姐姐，妳知嗎，妳笑的時候，就好像春風吹過冬末剛過的大地那麼叫人溫暖、舒服。」

今天，是妳的生日，妳的生日願望，記著，藏在心，不要說出來。但我的祝福，卻一定要對妳講：「祝妳往後的日子，開心，笑著的，比不開心的多！」

我相信，這亦是其他愛妳重視妳的人所盼望的。

希臘有如詩似歌的~ 神皇宙斯、太陽神阿波羅、愛神維納斯及酒神戴奧尼索斯等等迷人傳說。。。。現實世界內，除了我這個 Cupid，在我的朋友中，還有一個「el 尼近」之神。

Ruth，十月八日，Happy Birthday！

並祝事事順意

Happy Birthday

潔癖

唔係講我自己。

以前中秋節，唔駛到正日，之前之後幾日喺公園都已經同仍然會見到唔小火光。正日就更加犀利，成個公園，仲要唔只一個，連整個花園嘅大小街道都被燈火填滿，誇張得好似連一枝針都插唔入！

好熱鬧嘅！

而家？！望落去，X，咁靜嘅，幾乎黑咪麻咁滯！

呢個政府，煲蠟又唔畀、玩放啲又唔畀、喺網上面郁啲又捉 (捉賊唔見咁叻！)、電視電台嘅尺度又管到九彩、展覽品露點又唔得。。。。_ 那星！管 X 晒啲雞毛蒜皮！而且，潔癖到咁，下一代一定強強壯壯快高長大！

但係呢，填維多利亞港，拆歷史建築等等又唔見佢哋禁嗰喎！而且仲狼過仔玩煲蠟！

管下自己嘅舔上獻媚、禁止自己嘅官商勾結、杜絕官僚又唔見佢曉？！不 X 知所謂~

若只是潔癖，還好。怕的只是逐漸 「Big Brother Is Watching You」~

真正惡魔

金庸笑傲江湖內的任我行，真魔一名，然衰喺手下陰陽怪東方不敗手上。

古龍的小說話畀我哋知，一要提防女人 (嗱，大家唔好插我呀！)；二要提防最親近的朋友；三要提防不起眼的人。

「穿 Prada 的惡魔」，我冇睇。但觀眾多 Blog 界朋友及雜誌的評論，亦略知故事情節的大概。

想講的是，已穿了 Prada 的惡魔，固然厲害夠惡，不然，也不能高處不勝寒。但係，一切已嚴如飛龍在天，姑勿論往後會否亢龍有悔，起碼，「已穿 Prada 的惡魔」已擺明她他在明。

而其他還未穿上 Prada 的下屬同僚，在暗裡蠢蠢欲動，暗箭毒言隨時施機而發。潛龍勿用，才是恐怖。套馬家輝在其明報專欄的一句：「真正可怕的，是想穿 Prada 的人。」

是的，他們才是真魔。

P.S. 中秋後，要 X 一 X 重開的文華酒店~

妹妹話係炆牛腩，哥哥話係羅宋湯。。。。

Vicky 今日番嚟屋企同爸爸媽媽飲茶，順道畀 oD月餅同手信佢哋，仲特別「炆咗煲牛腩」。。。。畀我哋食。

妹妹，羅宋湯~~~~~ 渣似啲噃。

不過，忍唔住要寫幾句，想話妳知：「好好味！」

Joey，Happy Birthday~

Joey，

在這相識了差不多十年的日子裡，風雨同路。當中一切盡在不言中，心照不宣。

但都想說句，甚麼時候會再像97、98年般巔峰狀態的妳？雖然，妳現在依然漂亮。^~

十月一號，生日快樂！

事事順意

兄

Happy birthday