最佳玩伴

九月份最後一天了。明天便是十月，亦代表2011年最後一季來臨，今年還有三個月便成為過去。

。。。。有些事情，情感上，很不想繼續，然而，理智上，一定必須要繼續鐵起心腸下去。

人生，真的甚麼其實也只不過是遊戲人間，過眼浮雲。

。。。。

命運，原來才是人的最佳玩伴~

香恨

啲古龍水、香水同鬚後水好怪！

怪喺邊呢，妖，好香好受歡迎嗰啲分分鐘會唔再出！都唔知點解？！點解呀！！！！

好似我好鍾意嘅 Paco Rabanne 嘅 Paco (unisex)，嗰種清新辛辣，之後佢其他嘅出品完全唔係嗰皮；又好似我至愛中至愛~ Beverly Hills Red 鬚後水 (見圖)，嘩，嗰種「舒服香」香到呢！唔係講笑，媲美麝香龍涎香！嗰種另類空間層次嘅挑逗，噢！明明唔靚仔都變靚仔，本身靚仔呢，就更加靚上靚，自然地將引死人嘅佢馴服！

古龍水、香水同鬚後水，最有價值最珍貴嘅係，每一個人都透過「他她」有著獨一無二一生一次嘅記憶、感覺。。。。我以前都寫過~

話說回頭，嗰啲牌子真係好殘忍！

斷我回憶之味。

畀我畀我唔試一次~

~~~~~~ 畀我畀我試一次！今晚呢個考驗盡顯本領，看看可不可以~~~ 機不可失，再冇兩次。錯過了這晚以後沒法知~~~~」

歌仔有得唱。但人生唔係隻隻歌仔都咁樣唱。(畀番個「好嘢」讚吓特衰政府先！難得呀！個「生命冇 Take 2」廣告幾好，特別係句 slogan。)

成日話要死過驚過先至會真係識害怕。

咁，有啲友仔會挑釁咁話：「X，咁屎你唔食點知屎難食呀？！你食過屎呀？！」嗱，細佬，如果您係咁嘅層次，咁您，去食屎試吓囉。又或者，你去食白粉啦！您未食過又點知白紛害人？！(咁當然，若然您真係已經喫緊白粉又或者諗住去食白粉，咁，仲衰過諗住食屎或者真係兩者都食緊！奇怪。)

想講嘅係，有啲友仔成日話自己天不怕地不怕，未驚過！X，「做咯！」「去咯！」「試咯！」「咩咗先算咯！」「咩都驚！」好威！

喺台灣，我有個師兄「炒」車「炒」到凌空打幾個筋斗再倒掛咗喺棵大樹上面，全身多處地方要鑲鋼釘。自此，佢只揸50仔，仲從不再開快車，而且，儘管只係開快一丁點兒都唔會。

所以，其實，佢哋唔驚，咩都夠膽死，係因為，好簡單，佢哋未死過~

細佬，老友，唔好咩都走去試。有啲嘢，唔試得。

要顯型揚威，好多地方可以嘅！

雙 Gear 好「波」！

不久前在 Cable 的一個講車的節目~ BBC 的 Top Gear 看到一個很有趣的特別環節。

那就是由那三名英國人的節目主持找來另外三名來自其他國家的駕車好手，與他們進行對抗賽。

我看的那一集是英國 vs 澳洲。

節目開始時，首領主持說想出了一個別出心裁的接送方式迎接 (對付) 他們。不一會，鏡頭一轉，一輛特製的運送囚犯的囚車出現。。。。裡面三個來自澳洲的比賽者正分別坐在車內不同的囚室。。。。

下車了，三名主持跟那三名澳洲大開歷史及口音玩笑，雙方嘻嘻哈哈，談笑得不亦樂乎。

我想，若是換了大陸同台灣，中國人能開這玩笑嗎？

談起這節目，雖然不是常常有以上的特別環節，但平時的常規環節也很好看。關於這個 Top Gear 的介紹請 click 有色文字。

另有一同類型節目但較為正經的，叫 Fifth Gear，亦同樣好看。個首席主持 Tiff Needell，看他試車，簡直勁！狠！爽！

追不上。。。。

下一屆新特首選舉跑馬仔又開始喇！

今天，回想起我們的曾小人特首在其上任之時所喊的「強政勵治」口號，再看到他與他一眾部下乃至整個政府的大冬瓜一仆一碌無能表現，真的笑死。

最抵死係曾小人這個政府不是因為就快做完才樣樣事情只望求其過關，說話反口覆舌，而是打從一開始便如此。只不過到到近期才更變本加厲，離譜加更離譜而已。

曾小人政府，根本，從沒打算過要做點甚麼，成班酒肉官員由曾小人上任到現在，在這數年，只藉其職位權力飲飲食食，作威作福，從來沒有為香港和香港人做過一點事。

上世紀二＋年代末到三＋年代初，經濟大蕭條如巨怪降世，引致資本主義社會的政治危機，失業的工人相繼遊行示威，在職的工人也展開罷工，他們反資本家及反政府。當時，美國總統胡佛成立了制定遏止失業的委員會，他號令各州州長和私人企業合作，一起解決問題。胡佛又要求國會額外動用1.75億美金刺激工業發展，加速公共事業建設，令商業發展的步伐加快，令後來羅斯福加強美國經濟與克服經濟危機有事半功倍之助。

羅斯福全力推行的新政，龐大而且大膽。如由於當時的金融體系瀕臨崩潰，他於上任當日就下令全國銀行暫時停止營業，採取措施禁止黃金出口，保障存款安全，放棄貨幣金本位，宣佈美元貶值。另外，又同時實行溫和的通貨膨脹，刺激工業生產、投資和對外貿易。

更值得傳頌的，是他許下承諾要摒棄官僚主義作風，在1933年的冬季要貧民有飯吃有衣穿。對於那些經濟極度拮據的州政府，他放寬撥款條件。那時，估計大約有三百五十萬個美國家庭被列入救濟名單而受惠。更感動的是，羅斯福政府強調援助計劃不會為窮苦大眾只提供一份僅有「青豆燒鹹肉」的食物，政府會向他們提供一份營養均衡的飲食。

我們的特區官員呢，對香港的龐大基層之苦、中產 (慘) 之苦、嚇人的貧富懸殊及大地產商的專橫跋扈等不聞不問，只懂識飲識食，練精學懶，舔京官媚富豪。辦事時，要推行政策時前言不對後語，反反覆覆，自我陶醉，亂噏廿四，自我手淫。又試問，有哪個政策是成功的？醫療融資、擴建堆填區、自願減班、交通津貼、速成自打嘴巴修訂版預算案等等等等，全部一鑊泡！

。。。。不過，話說回頭，如果港府有動大手術的決心與魄力，那更恐怖！因為，魔鬼在細節入面，志大才疏，更弊！

哈哈哈哈哈！即是係又死唔係又死！

又即是，香港，「英年早逝」做又死，「陰森振英」做又死！

啊啊啊。。。。為了您。。。。

唔係先天而係後天頭髮鬈嘅我，本來最多三個星期要剪一次，一來鬈髮好難打理，二來短髮嘅我更加型仲加靚仔。

我鬍鬚唔多，就係咁先唔好！因為好多嘅話，嘩，多鬚多鬚根，型上型！但係，唉，我又唔係喎，yil，係唔 Q 密嗰隻喎。。。。最衰係嘴角對上兩旁嗰個位又頗濃密，即係好乸似啲粵劇嗰啲奸師爺咁。。。。頂！

對上嗰次去飛頭髮已經係個多月前。。。。對上嗰次剃鬚巳經係兩個禮拜前嘅事。。。。而家好樣衰。。。。但我會再等佢衰多兩個禮拜先去飛髮同剃鬚。因為冇錢。而更重要原因係因為，剪完剃完去飲我最好嘅朋友之一~ 詹詹嗰餐。

。。。。詹詹，詹詹伉儷，為了您~

哈哈哈哈哈！

台灣「豬油」拉麵

「豬油」拉麵，呢個名，係我作畀佢嘅。呢隻嚟自台灣嘅拉麵原名叫「五木」。

呢隻「五木」拉麵好好味，麵質勁煙韌彈牙，包汁又香又鮮甜，最精彩好嘢冇得頂嘅呢，係佢嗰包豬油 (圖中白色嗰兩包就係嘞)！真係，頂吖，只係一小包豬油 ja 嘛，就能夠將本身已經好好味嘅佢再提昇到更高境界！好 Q 讚嘆同感動呀真係！

「五木」拉麵有肉燥、香菇、海鮮同蔬菜幾種口味，個人認為肉燥同香菇味最正！

大家見到嘅話，買嚟食啦！我冇介紹錯嘅！台灣呢隻拉麵，架仔嘅都要行埋一邊！

嗯，懷念台灣其中之一，就係台灣嘅麵食同泡麵。

法識生活

Bonjour (Good morning, Hello！)，Bonne Nuit (Good Night)，Comment allez-vous (How are you?)，Je vous aime (I Love you)。

我嘅法文，唔及格！所以，而家介紹呢個好節目，好主持畀大家嘞！呢個香港電台第二台逢星期日晚嘅節目啱啱完結咗無耐。。。。嗯，唔緊要，仲有網上重溫~ 免費。呢度~
http://programme.rthk.org.hk/channel/radio/programme.php?name=radio2/ViveLaFrance&d=2011-09-04&p=4922&e=151076&m=episode

上幾次我講電台節目竟然忘記咗佢！Hummmm，奇怪。。。。

呢個節目叫法識生活，顧名思義，係講法國飲飲食食玩玩樂樂嘅文化。節目最正係一啲都唔會悶 o親 (喺法國文化協會學「飯 say」，悶到爬喺度！)，啱晒實戰，仲好易入腦，溝女「界」仔仲好啱用 tim！而且，就算您冇法文底，亦會易上手！

個「兼職」女主持~ 陳祖泳，樣靚聲正又俏皮可愛 (見圖)，heeeeee，媽咪~~~~ 我鍾意~~~ 跟佢學法文，即使只係透過大氣電波，都零舍醒神！事半功倍！

Viva，viva，viva les bleu！(雖然我鍾意德國。)

Au revoir！

知否世事常變？變態原來才是永恆！2012年12月21號，等緊你！

依家啲商家，好似 HSBC 呢啲光鮮敗類，認撚真敗壞風氣、樹立歪風、顛倒事非，教壞下一代！

以前啲廣告，雖然最終目的都係想做你生意，想賺你口袋裡的錢，但起碼識得兼及人、世之「情」。唔會好似而家啲咁，直情修飾都免，明刀明槍以利益掛喺頭。即使仲會，但就好假，完全感動唔到，拍唔番以前嗰啲嘅「真」。

相由心生。

俱往矣！唔講咁多，請欣賞以下動人廣告。







匯豐銀行真係祝大家快樂嘞~


本來諗住寫好多去插 ，但，X，費鳩事傷身。而且，睇咗上面啲未改正歸邪，仲叫正氣嘅 HSBC 昔日廣告。。。。真係弦凝指咽聲停處，此時無聲勝有聲。

。。。。一切盡在不言中。

此時此刻此年頭，個社會變成咁。。。。唉，喂，2012呀2012，快啲到啦！

奇異奇談星期二~

最近聽到兩件真人真事事件，關於見工的，很出奇很詭異，今公諸同好。

話說有間設計公司請一位普通職級員工，眾裡求他/她，最後，請了一位廿歲出頭的年青人。

那位男的年青人，一個月後上班。

一個月後，「他」，上班了。「他」一切也很正常。直到下午，該公司的部門主管回來後，跟「他」打了個招呼。。。。隱隱覺得有點不妥。。。。他再細心觀察一下，然後拿出「他」的「鴨 form」一看，發現，「他」跟照片入面的，除了身型、髮型同衣著外表差不多，卻驚覺，「他」跟照片入面的他，為甚麼竟然會是兩個面孔！！！！

那主管一直看著在辦公室那個「他」，另方面立刻打申請表上面的聯絡電話。主管看到「他」在做著事。接通了，另一方，竟然有另一個他在接聽。。。。

「我找到另一份更合適的工作。但覺得唔好嘥咗佢，所以叫個 friend 嚟做囉。」在電話入面真正的那個「他」正經的說。

哈哈哈哈哈哈！！！！驚驚驚！

另一件，沒那麼爆，但也經典。

有位廿來歲的年青人在見工時，茶水部阿姐問他喝不喝水，他很有禮貌地回答：「唔該。請問有沒有菊普？」

XQYZX&X&!!!XQ!!! 呀哈哈哈！！頂！

呢兩單嘢，真正吹到啤一聲！

晚記之今宵時光隧道

如果各位有睇開呢度，又記得嘅話，我咪好鍾意喺晚上嘅黃金時間睇番以前，好耐以前嘅電影同電視劇嘅，哈，今晚我又發作喇！

而家睇緊1976年嘅「陸小鳳~ 金鵬之謎」。

好 Feel 到哩~

誓要去　入刀山
浩氣壯 過千關~~~~　
豪情無限
男兒傲氣　地獄也獨來獨往返~~~~~

此刻相對恨晚~~~　
願與你 盡一杯
聚與散　記心間~~~~~

毋忘情義　長存浩氣
日後再相知末晚~~~~~~~~

登登登登登！(音樂)

廿一世紀讀佢兩鑊之讀「屎片」

前幾天中午在某區的食物廣場看見某職業學院的學生用膳，他們都各自穿著屬於自己系所的外套 (如當中有汽車工程系)，那些系所外套都設計得很好看，使他們外表都格外醒目。

還記得我那個年代，也有職業訓練局，應是現在的職業學院前身，那時，這些「地方」是讓一眾「叫做讀不成書」，升不上正規中學高年級的年輕人學會一實用謀生技能。我有幾位朋友就是在那裡學成某些專長，如裝修水泥、建築搭棚和水電等。現在，他們有的縱不是老闆，也是入息不錯的老行專，比我這「讀過書」的朋友不知賺多幾多！想說的是，如今那些職業學院的系服，令我覺得，嗯。。。。是否浮誇，務虛了一點呢？為甚麼每個課程都要加上一個「系」字？加上一個「系」字，學的東西是否會勁點？記得多年前一位朋友報讀了不用看成績便可入學的某一間書院某個學系後，他開心得跳跳扎的跟我說：「哈哈哈哈哈！我入了XX系啊！」這個「系」字，的確，其力量之充盈，使人很容易上腦很容易 High！使人不自覺，飄飄然自然地猶如入了「大學」一樣。亦由於這樣，有關方面便在各課程後都加上一個「系」字。甚至，一招兩式，順便「拆細」，廣開課程。學生和家長方面，亦樂見其成。學生~ 自己成績不好升不上也有「系」讀；家長~ 個仔 (女) 讀的那個科 (課程) 有個「系」字，叫XX系呢！兩者都安樂了，滿足矣。

另外，即使現在的大學，降低能力要求，使香港受大學教育率普及，總之務求盡量做到人人有大學入有「系」讀。但又如何？！值得開心歌頌嗎？！升成班成群根本未夠能力的學生入大學，有甚麼意思又有何用？！一個學生的能力若是未到未夠班就係未到未夠班！本末倒置要降格收生，自己呃自己，這除了令大學學位貶值，令香港出著一批又一批無料大學生，也令香港受人恥笑。隨便舉一例便可知情況之惡劣，太平天國，像「王」最高級别的爵位，是不隨便封的。太平天國封王，僅僅有東、南、西、北、翼五王被封。定都天京後，才再多封燕王和豫王，但亦很快被革去。可見，當時的太平天國對「王」這爵位的重視程度。但在其後期，「王」卻愈封愈多，愈封愈濫，到了不可收拾的地步。被封「王」者竟達二千七百多個。連忠王李秀成被俘後也說出天朝敗亡的原因，濫封「王」正是十大原因之一。

沒所謂，反正現在的香港，連一個賣郵票的職員也要中七資格；連一個校工也須懂中、英、普通話及電腦文書處理；連一個辦公室 Boy 也要求至少中五畢業，反智如此，香港也實在需要如此多「大學生」或讀「系」的人。

常聽說幾十年以前，上世紀五、六、七＋年代，中五畢業的人已很犀利，指的是中英俱佳。現在及之後，一個大學生甚至碩士，可能只等同那年那時的中學生，甚至更低。

Come on，香港教育的所有有關方面，香港的家長，務實點吧。

寫在後面：多年前理工學院「升格」成為大學。請問，麻省理工學院，可曾會 (需) 有此渴望？！

呢啲就叫吸引，就叫靚！

自然舒服囉！

生活小貼士

(一)

大家一定會有試過失眠同瞓得唔好，原因有好多，例如，緊張、身體問題及飲食習慣等等。

但如果唔係以上原因，有一個日常習慣可以令人容易進入夢鄉，瞓得舒服。

呢個日常習慣 (方法)，好簡單，就係定期密啲 (大約兩星期左右，頂盡三個星期。) 更換枕頭袋同床單。最好連被袋都換 o埋。

呢個方法唔少人試過都話 work 喎！我都覺得效果確係幾好！

(二)

夏天越嚟越熱，唔好話怕熱嘅人好似我咁，就連好唔怕熱嘅人都頂唔順！

我發明嘅九陰玄寒衣係就係唔錯，不過涼快效果維持唔到幾耐。哈，最近諗到市面嘅冰涼貼，其實可以貼喺頸後面、心口、背脊同胳肋底去熱又冰涼咖噃！持久力又夠！

我試過。好掂！

唔駛唔該。

日記

＊ 今日搭 lift 嘅時候，撞見一位好耐冇見嘅 auntyyy，佢一見到我，即刻搣我甚為有肉兼可愛嘅面珠墩，好肉緊咁話：「癲仔！依家咁大個喇！有鬚 tim 噃！」

「。。。。」好彩成架 lift 得我同佢唧！

＊ 中午隊咗枝中國白酒，嘩，X，個「後座力」好勁！High 到而家！

＊ 聽日仲要去照肝，聽天由命。即係咁，有事嘅話，阿彌陀佛，生死有命，屌祢老母！。。。。冇事嘅話，好嘢！！！多謝！！！祢真好！！！我仲有劇本演讀！！！！！

＊ 其實，有事冇事，做人，個人認為，最緊要係要硬之時硬如金，要軟之時軟如舌。傷心快樂都盡情享受去到盡，那閉目一刻，都堪稱：「冇白活。我活過。」

美味抗通脹

通脹高到飛起，啲嘢貴到離晒譜！唔好話食啲奢侈嘢，就連平日維持生命嘅食物已經令人負荷好重！

但辛苦搵嚟志在食，家吓同大家分享點樣可以用我哋平時嘅普通食物，一舉兩得咁既可以滿足口腹之慾而又唔駛花費大。

1. 啤酒送皮蛋~ 呢個新發現新配搭，好嘢！唔信？試試。估唔到啤酒同皮蛋兩者竟然係咁他媽~~~~ 的絕配！
2. 鮮奶送陳皮~ 最好係冰凍嘅鮮奶同絲狀陳皮。包您話正！
3. 冰水送花生~ 唔駛錢嘅冰水加最平之一嘅花生，竞然有此神效！感激流涕！
4. 長城牌鹹牛肉~ 呢個好耐之前我曾經介紹過。鹹牛肉唔好煎唔好炒唔好焗總之乜都唔駛攪，就咁夾落麵包到食，啊~~~~~~ 味道好似鵝肝醬嘅呢！配鮮奶更錦上添花！
5. 魚翅瓜煲湯~ 加雞加瑤柱加杞子，煲出嚟嘅湯真係幾似魚翅！口感亦佳！

各位試吓啦！

恥~ 有牌惡霸

有黨的領導級高官到訪大學，單憑校內的保安人員當然不夠班。引入警方之助無可厚非。問題出於，徐校長及港大有關當局沒有想到警方的做法會是如此走火入魔；更沒有意識到，香港警察已變了質！

港大的大安主義固然活該。但港大「百年之恥」事件，罪首禍根，乃「香港公安」。

非常記得上兩個星期的某一日下午，我途經薄扶林的薄扶林村附近，立刻被嚇了一跳！被嚇了的原因是那刻出現在眼前的景象誇張至極！兩邊馬路都有大批警察煞有介事的由薄扶林村村口一直佈防至距水塘更遠的紅色大學宿舍，封行人路，記者被逼到一小塊地方對著村中間的一個出入口。我立刻打電話問住在附近的朋友叡木薄扶林村發生了甚麼事。他上網看：「沒有發生甚麼事呢。」

那晚回到家看新聞，原來，是我們的副總理李克強參觀薄扶林的中華廚藝學院。

哎喲！警方有須要到封路駐防至此嗎？！只要在學院佈防「駐重兵」不就可以了？！要知道，那天所封的路，是由學院再伸延到以外的十幾倍！

第二天，即李副總訪港的第三天，發生港大「百年之恥」事件。

說真的，那個港大學生李同學被大量警察「圍剿」，推入後樓梯，將他推倒，再把門關上禁錮的畫面，非常震撼！亦非常醜惡！

香港的警權已到了濫權的地步！由過往的巧暴力到今天是明目張膽的欺負市民。從警方對付最近一連串遊行及今次事件可知道，如陳雲所說：「政府以不義之名，唆使警察陷害忠良，警察就濫權營私，不成為警察，而成為家僕與鬼卒了。」

但非常可悲，不少人都選擇不關己事而默不作聲，現在更竟然仍有不少市民贊成警方如此濫權做法！唉，真的有沒有再荒謬離譜！

尼莫勒 (Martin Niemoller，1892-1984)，是當年德國福音派信徒眾望所歸，卻未能提供正確的方向，會眾無所適從。他起初試圖與納粹合作，繼而但求自保，最後也不免入獄。後來，他只能這樣說到：「當他們 (納粹黨) 對付共產黨的時候，我不曾說話，因為我不是共產黨。他們對付猶太人，我不曾說話，因為我不是猶太人。他們對付工會，我不曾說話，因為工運與我無關。他們對付天主教，我不曾說話，因為我是更正教。最後，到他們對付我，已經沒有誰可以說話了。」

自己人被自己民族政權相逼愚昧殘害，吞聲忍氣。有一大撮更甚者不單只甘被欺壓，做順民，還無知肉酸的助紂為虐，若真有報應，那，報應先應報在這一群身上。

犯罪的人固然可惡。但從旁相助犯罪的人，不論有心抑或無知，都一樣更抵死。

順民，做順民，甚至奴性，只會一世被強權欺壓。人家便踩著你們的可憐的頭而平步青雲，高薪厚祿。看看一個個現在特區政府的文武高官吧。

週末閒話

● 做中國人真係好慘，競選 ja 嘛，明明好「恨」好想好想要但之前又要死忍爛忍，扭扭擰擰，遮遮掩掩，衰過啲女，煩過花旦出場。

唉，而家好嘞，特首跑馬仔正式入閘咯，唐梁葉劉等一干妖魔鬼怪，一定舒服晒~~~

● 前兩日講開我鍾意聽嘅電台節目，其中提到恐怖熱線主持之一嘅胡凱澄，要補充呢位 DJ 好正，正喺邊呢，正在聲線好聽又特別 (鼻音迷人到呢~~~~~)；正在有 Heart；正在口才好又有分析能力；正在有才華；正在夠過癮 (半夜三點幾四點佢把聲會好自然好眼瞓！)；正在樣又唔差噃 (大家知啦，DJ 通常。。。。)！

係！鍾意嘅話，咩都係好。

● 偽科學鑑証 (五) 雖未見突破，但保持到水準已是難能可貴。好睇！

講開睇書，最近睇咗兩本講哲學嘅書。。。。頂唔順！尤其是畫符學，都唔知當年點讀嘅。

● 豬油真係好精彩！簡直點石成金！下星期搵日另開 Topic 再講。

藝海星沉~ 半世紀演藝人

醉幻迷離，歷經滄桑盡情演繹。
人生是戲，謝幕一刻傳奇永成。



天地轉，光陰迫；往事如煙，舊日如夢。
青山依舊在，幾度夕陽紅！

支持小店舖！

啲大牌子超級市場，真係好仆街、好抵死，唔撚知醜咖！

就以當中吸盡所有香港人血嘅四眼佬超人，佢旗下嘅「仆街」超市咁為例，之前嗰啲衰嘢，好似賣「油魚」呢啲唔提嘞，今次要 X 嘅係另一樣。

成鳩日賣廣告話自己賣嘅嘢最平，嘿，我前兩日又出去買即食麵，農心牌嘅麵「仆街」賣差唔多6蚊一包，吖 X，我喺大昌行睇到三十幾蚊10包呀！！！！

我都費時拎佢同啲雜貨舖比較嘞。X，你又係超市人哋又係超市，人哋平你咁撚多嘅？！

物似主人形，「仆街」真係同佢老細一樣咁厚顏無賴，太平洋式食水深！

強烈建議盡量唔好幫襯呢啲大型超市。幫襯小店舖。