羹羹，好味！

以小弟今時今日嘅造詣，基本上冇咩餸難得到我。湯，就更加唔駛講。所以，前幾日我換吓新款口味，煲咗羹，豬月展節瓜草菇粟米蛋花羹。

好好味呀！

同大家分享吓！做法如下~

材料：豬月展節瓜草菇粟米蛋花羹。所以，材料有豬月展節瓜草菇粟米同雞蛋。

份量：以圖中嘅煲 size 為例。豬月展一大嚿、節瓜一條、草菇兩包、罐頭粟米蓉兩罐、雞蛋兩隻。

調味料：鹽一湯匙及生粉一湯匙。記住生粉要用凍水溝勻，千祈唔好一嘢直接倒落去。

做法：一開波先將豬月展煮熟，煮熟後再滾佢廿分鐘左右。然後再加入節瓜 (已切好)、草菇同粟米蓉，加水蓋過所有材料再多少少。

滾佢一陣，打入蛋花後倒入已攪勻嘅生粉水，再攪一攪。嗱，成個羹最重要就係個「茨」要落得適量！大家可以逐少逐少落，咁咪可以因到份量囉！但好似高手~ 我呢 oD，就唔需要嘞！

又再等佢滾多陣，加入鹽，攪吓佢，即成。

飲得？飲得！

豬月展節瓜草菇粟米蛋花羹，正！