夠味粉麵

上星期四中午同 Lu 四妹去咗食粉麵。佢喺中環過嚟我呢邊食，嘩，佢本來食一點但十二點半就走得喇喎！(佢後尾強調話唔好講到佢好似唔駛做咁喎。嘻嘻！真係吖！妳能幹啫！Heee！)

我計好時間，因為費時阻住人哋做生意嘛。哈！點知嗰間嘢原來有樓上雅座咖喎，仲幾大幾寬敞。幫襯阻咗都有一段日子而家先知 tim！

我同佢兩個人叫咗淨牛雜、牛腩牛筋河同生菜。三樣嘢啲份量都好夠。

淨牛雜樣樣分得均勻，唔似有啲地方偏好畀某一個部份。牛腩牛筋河，牛腩牛筋鬆軟滑韌，河粉彈牙，而且成碗多湯，唔怕好快被 oD河粉嗦晒。生菜，燙得爽，得！

呢間嘢我最鍾意佢啲嘢夠味，但夠得嚟呢，唔咸噃。最完美好似我嗰日咁，食嗰陣叫番杯冰凍柑橘蜜 (佢要熱嘅，神奇！)，食到咁上下，飲一啖，真係好似即刻「嗞」一聲！爽！

其他嘅好似魚蛋呀，墨魚丸呀，甚至一般早餐好似沙嗲牛肉公仔麵或者五香肉丁公仔麵呢啲都一樣好有水準。

呢間嘢叫華南粉麵。絕對要去試。