我嘅台灣牛肉麵。。。。我追到喇！！！！！

曾慨嘆香港叫美食天堂，但要食碗能夠媲美台灣地道嘅牛肉麵搵極都搵到。有一間喺星街嘅聽講水準絕頂，但要成百幾蚊一碗奢華版台灣牛肉麵。。。。我只係追求一碗好味嘅平民親和版牛肉麵啫，我只係要親切嘅回憶啫，所以呢種台灣牛肉麵唔係我想要嘅嘢。

不過，皇天不負有心人！！！！天無絕我喺香港追尋台灣牛肉之路！！！最近畀我撞到一間專賣台、日、韓食品嘅店舖，又畀我見到入面有賣用一小袋一小袋古色古香布袋裝住嘅牛肉麵 (見圖)，直覺話畀我知，呢隻牛肉麵，一定滿足到我一直以嚟嘅願望！

果然，好嘢呀！！！！好嘢嚟呀！！！！！

呢隻「古早牛肉麵」，無論麵質、牛肉同最重要嘅湯底，都係徹頭徹尾無與倫比嘅好味地道台灣牛肉麵！！！！

QQ 嘅麵質，彈性生命力十足嘅牛肉，濃馥而卻又爽甜嘅湯底，三位一體完全融合！我食嗰陣，除咗成個人彷彿躺洋喺牛肉麵嘅湯海入面之餘，我有一剎真係彷如番咗台灣咁！！！！！

更難得係，呢隻「古早牛肉麵」，食完唔會口渴。

另外，難以置信，煮呢碗如此級數嘅牛肉麵，所用嘅時間唔駛十五分鐘！

全力推薦！

註：

i. 佢有幾隻口味，個人最愛「原味」同「紅燒」。價錢方面，HK$55蚊一袋 (一碗份量)，幾貴。但對我而言，值！

ii. 第二張照片入面有幼麵喺度，係我自己另加嘅。因為，如果只係食佢嗰包麵，肯定唔夠飽。我下次會加烏冬或者其他白粗麵。

iii. 呢隻「古早牛肉麵」，好少地方有得賣。可惜！