鬼故事

近日聽收音機，難得聽到啲有水準嘅鬼故。所謂有水準，係指真係恐怖，一路聽一路驚，聽完仍然會驚驚。

我想起一個喺台灣唸書嘅韓國僑生師兄嘅真實鬼故事，呢位師兄因為呢單嘢，曾名噪一時。

佢同另一同學同住一個單位，嗰個同學平時只係一個星期住幾日。所以，其餘大部份時都只係得嗰個師兄一個人。

話說有一晚半夜，佢起身入廚房諗住飲水，佢一出睡房，聽到廚房有「巢」嘢嘅聲音，佢以為嗰個同屋同學番咗嚟。點知佢一入到廚房，見到有個女人，喺度好瘋狂咁「巢」緊個雪櫃。於是，嗰位師兄就問：「妳是誰？妳在幹嘛？！」嗰個女人冇理佢，繼續發狂咁「巢」。師兄上前諗住拍個女人背脊之際，嗰個冇眼耳鼻嘅女人突然擰轉頭好兇咁問佢：「為甚麼你這裡沒有東西吃？！」

師兄被嚇到成個暈倒喺廚房。第二朝，咁啱嗰個同屋同學番去，拍醒佢問佢點解瞓喺廚房，佢就將成件事講咗出嚟。

聽咗呢個鬼故，您而家驚唔驚？半夜三更仲敢唔敢入廚房？