茶葉蛋

我個人好多時都好激 (當然，亦有好多時候係鳩流流，hea 呀 hea。)，尤其是對鍾意嘅嘢。

好似照片中呢煲茶葉蛋，個幾星期前心血來潮，一整就整咗接近成廿隻！我好鍾意食蛋，各式各樣嘅蛋蛋都好鍾意食，茶葉蛋更係我最愛。

自己整嘅茶葉蛋，整好咗慢慢嘆，鍾意幾時食幾時食。而且，比出面買嗰啲仲入味好多！

茶葉蛋一啲都唔難整，等我教大家。

材料：

梗係要有雞蛋！
大量烏龍茶茶葉或紅茶茶葉。
大量花椒八角。
幾塊桂皮。
生抽兩湯匙。
老抽四湯匙。
鹽三茶匙。
糖三茶匙。

做法：

將水浸過全部雞蛋，然後將所有滷料連同雞蛋一齊住。要注意，一開始要用中火，否則，如果用猛火，會令啲雞蛋爆開流晒啲黃呀蛋白呀出嚟。

等啲雞蛋全熟之後，用杓將佢哋嘅殼整裂，然後你鍾意用咩火都得繼續煮。

到到咁上下，熄火，由得啲蛋同茶葉親熱係咁浸，最好浸過夜。

第二日，食得。

食茶葉蛋呢，係要食一啖飲一啖啲茶汁先最正嘅。又或者，成隻雞蛋放晒入口，o趙到咁上下，喺個口入面變到少少蛋醬嗰陣飲啖茶汁，仲正仲爽！

試試。冇點你！

順帶一提，茶葉蛋啲汁，用嚟解酒解宿醉亦功效奇佳！