食得愉快嘅愉記

前日下晝去跑馬地做啲嘢，嗯，星期日都要開工，唔多好 mood，但跑馬地乃悠閒地，啲樓，無論新同舊嘅，都起得有特色啲嘅，加上嗰日又風和日麗，爽番！

跑馬地呀跑馬地，係唔同啲嘅，連啲食肆都有性格過人。唔少食肆，點零鐘，一早收晒爐唔做生意咖咯噃！有啲仲連舖都未開！

搵咗一陣，有間樣似下午休市但仲有一兩檯客嘅食肆，叫愉記，由於太肚餓，望一望見對路似樣即刻入內。

女同事叫咗沙嗲牛肉炒河，我要福建冇福建炒飯嘅福建炒飯。

兩碟嘢都幾大碟，料都夠。沙嗲牛肉炒河，沙嗲味濃，牛肉頗厚身唔韌又有咬頭，河炒得 Q 兼有鑊氣。成碟嘢炒得濕乾剛好！正！同事話佢碟炒河夠兩個女仔食。但佢一個好快食晒。。。。呵呵呵！

我嘅福建炒飯，係我食過咁多地方嘅最好味！料多飯夠汁啱啱好多啲啲，正正！食到尾都冇出水！三個字~ 冇得頂！

碗章魚蓮藕例湯好大碗，亦好好飲。我未試過將咁大碗例湯飲到一滴不留嘅！

最要讚係碟菜。呢碟菜，唔係另外叫嘅。您可以話佢係平日鋪喺飯或者飯側邊嘅嗰幾棵菜，尤其係燒臘飯。但呢間呢，哈，零零舍舍用一隻碟分開另上喎！仲要份量幾多新鮮爽口好味道！有誠意有料到。

呢間愉記，夜晚食火鍋嘅。我相信佢哋嘅火鍋一樣咁精彩！佢哋啲侍應生，落力有禮得嚟不亢不卑。再加分！

A~ 講番餐飯幾 $ 先，兩個人，每人HK$36，一般價錢，唔一般嘅一餐，好！您都要去試吓！

地址：跑馬地毓秀街13號地下 B 舖。
電話：2574 7111