世界盃的洐生一點點~

照片中本「球王爭霸世界盃經典圖片集」，幾正嘅！幾正係封面同開頭彈啲硬咭公仔出嚟嗰兩版。至於入面圖片同內文，就唔係咁掂。過於行貨同簡單囉。

換呢本嘢有段古。話說呢本嘢要某免費報嘅印花，加七十幾蚊先有。我嗰日去到其中一間指定便利店準備換購嗰時先知唔記得帶。哈，點知個阿姐話：「見你咁靚仔，照印花價畀你啦！」

Heeeee！係唔係，真定假都好，爽爽爽爽爽爽爽爽爽！

講開呢類書，每逢世屆盃期間都有好多出現，今屆，我喺某間七仔見到一本包裝好精美，淡黃色封面嘅，好似又係叫歷屆世界盃圖片集之類啦，HK$88，有衝動想買。。。。有冇邊位知邊本甚至買咗咖？正唔正？

記得細個嗰陣，中一，1986年墨西哥世界盃，香港市面上出咗甚麼世界盃貼紙集圖冊，要不斷買幾蚊一包五張球員同球隊隊徽貼紙貼滿佢 (另有出動物同恐龍貼紙集圖冊)，而家諗番覺得好鬼貴！又不過，又好珍貴！可惜冇保留到。

您又記得嘛？