球魔 (皇)

國家嘅足球隊，只 likey 兩隊，除咗德國，第二鍾意就係阿根廷。

鍾意阿根廷，完全係因為馬勒當拿。記得1982年西班牙世界盃，已經留意到特別嘅佢，一頭爆炸髮型，更寸爆嗰個樣，更更火爆嘅脾氣，天生惹火尤物人士。

到到1986年墨西哥世界盃，肥馬完全成熟，技驚四座，光芒大放。記得尤其是對英國嘅一場，兩國啱啱打完福克蘭群島之役，戰敗嘅阿根廷誓要喺足球場上，將足球發源地英國打敗，肥馬喺播國歌嗰陣怒睥又帶幾分輕蔑英國嘅球員 (睇以下短片，0'14開始。)，再到佢第二球過關斬將，由中後場扭到前場入 o埋波，淘汰英國，真係好觸動人心！



肥馬喺我心目中，技術始終第一。剛柔並濟，罰球又勁，雖然肥但唔知點解又會走得咁鬼快！變速又厲害！最「哽」係撬極佢佢都唔跌，就算跌呢，碌幾碌又企番起身繼續帶波交波射波咖噃！其他巨星好似比利、柏天尼、李華度同施丹等等呢啲邊個得？！

最吹脹係佢又夠抵死噃！間中又鍾意用吓手，除咗上面提到對英國一役，佢用上帝之手入第一球，原來佢之前喺其他賽事都有前科，仲擺明嘅 tim！呵呵呵！講番佢對英國，用上帝之手入咗波，球証判得米之後，肥馬用件波衫遮住個嘴笑，呀哈哈哈哈哈，過癮抵死又攪笑！



可惜搵唔番佢用手入波嘅第二條片，但以上佢喺多年後喺 BBC 訪問時講番上帝之手一事嘅片段，睇到佢豐富又鬼馬抵死嘅面部表情，真係好 Q 好笑！一定要睇！



呢條片，10個肥馬精彩入球，配合好聽配樂，大家不容錯過！

祝週末愉快！