無名字的食肆

曾喺都市留影系列之北角提到一間位於春秧街電車總站的神秘地方，呢個地方，直頭就係喺電車總站 (圖一從左起第一條石柱至第二條石柱之間嘅位置)。係一間食肆嚟。

起初以為佢係電車職員嘅專用飯堂，但後嚟觀察過後，知道原來唔係。好奇怪，唔知點解，雖然嗰時仲未幫襯過，但已經好強烈覺得佢 oD嘢會好好味！

結果，幫襯過後，真係好好味！價錢亦唔貴，大眾價錢嘅廿零蚊囉。

佢煮啲嘢，夠原汁原味、夠味、夠鑊氣、夠原始、夠份量、夠樸實、夠晒家的感覺！好似我兩次幫襯所買嘅鮮茄肉片飯、涼瓜排骨飯同魚湯咁，味道完全係屋企 Feel！茨汁唔誇張，肉片同排骨夠真實唔會醃到人工「(鬆)化」但可口唔韌；鮮茄同涼瓜炒得爛度剛好！掂！尤其是碗魚湯，成條魚熬碗湯再一齊上，好呀！

加 o埋即叫即整，開放式廚房睇住個老板 (兼唯一一個廚師) 喺度係咁炒、煮、煲、上碟，一腳踢，再配合嗰度嘅老香港環境，呢間無名字嘅食肆，我畀99分！

仲有一分去咗邊？嗰度嘅冷氣唔多夠勁，對於我呢個超級大汗嘅人，堂食唔多啱。純粹個人原因。^~

呢間食店，您一定要試吓！