閒談點點

＊ 近日心情一般，除咗有時會因為某啲剛過咗去嘅嘢發吓惡夢，就係一諗起四川件慘劇，都會有啲心有戚戚然。希望 oD災民能夠安然渡過，受創嘅身心可以盡快恢復過嚟。

＊ 睇咗多年嘅連環圖~ 古惑仔，我決定睇完呢輯故事單元~ 香港洪興火拼台灣毒蛇幫之後，唔再買嘞！

原因無他嘅，本嘢越嚟越「單薄」，呃錢囉！喂，大佬，十四大元一本唔駛三分鐘睇完！又將啲情節拖長嚟講 (無謂兼且沉悶地噃)，唉，唔即 cut 都算係咁。

＊ 講開連環圖呃錢呢樣嘢，其實連唔少散文集都係！當中包括我偶像之一嘅蔡瀾！一篇超短嘅文，oD字印到大大隻，行與行之間好體貼您嘅雙眼地隔到好~~~~~ 開咁，咁就版半甚至兩版！

不過，都好在仍有可取，起碼都仲有啲嘢知多啲。至於嗰 oD無料到又呃飯食嘅，好似李 _ 恩嗰類甚至其他喺名氣上等而下之者，真係~ COW！

＊ 尋日睇咗「藍」，噓！紅白藍三部曲「終於落幕」！

講開都幾有趣，就係三部曲我都係睇碟嘅，先紅後白最後藍，由白到藍已相隔八年！而且呢，呢三部曲我都分別喺三個唔同嘅地方睇~ 順序係台灣、澳洲、香港。

＊ 最後講啲嘢提吓大家！各位最近留意街上面，當您行行吓嘅時候，周不時會有唔少由木棉花樹飄落嚟嘅一小團團嘅棉花飄吓飄吓，盪嚟盪去，好似雪。。。。好靚！好詩意！

唔開心，納悶嘅時候，望吓欣賞吓，個人都即刻開朗啲。即使唔係，有 oD咁天然，就算要畀錢都未必有咁靚嘅嘢睇，唔望多兩眼欣賞吓，咁您話幾對個地球唔住哩~

記得留意吓咯喎。