自煮蘑菇扒

自從生日嗰日喺 Post 97 食完嗰個蘑菇扒之後，一直念念不忘，前日喺超級市場見到有一盒盒裝住啲好大嘅蘑菇賣，拎起一睇，叫鮑魚菇，嘩，真係好鬼大！諗起自己買番去大量煮嚟食，如果成功第日又可以煮畀佢食，即刻 「o桀！」聲笑咗出嚟，買咗兩盒番去整。

我梁巔巔果然係天才小廚師！煮嘢食真係好有天份！買咗啲蘑菇扒番去後，好自然識得整！

首先將 oD大蘑菇洗一下，然後用少許海鹽 (粗鹽) 加 o埋牛油用手喺個大碗度同啲大蘑菇菇撈勻。

撈勻後，燒紅隻鑊，倒橄欖油，再即刻倒晒啲大蘑菇菇落去，狂兜猛剷輕壓幾下，上碟。A~ 未食得住。

上碟後，將 oD大蘑菇排好陣勢，每兩塊大蘑菇個菇面上下相貼成一對，中間同上面都放一塊芝士 (注意，以黃色嗰隻芝士為佳。)，最後放入焗爐度，鋪上一張錫紙，焗。

焗大概七至十分鐘，okay (焗嗰時如果再加啲蒜鹽同百里香香料，更正！)！拎出嚟，食得！

好味呀！！！！！！喂，唔係講笑，有我上次喺餐廳食嘅六成水準！梁巔巔呀梁巔巔~~~~ 真係~ 我為您嘅煮嘢食天份而「惋惜」吖~~~~~~~~