即食麵好介紹

即食麵好介紹又嚟！

最近少食即食麵，但如果喺超級市場見到有吸引嘅新產品出現，一定會買番嚟試吓。之前就買咗隻好正好吸引 (個名)，由馬來西亞製造叫「茶餐廳」嘅嚟食，以為煮咗出嚟真係似茶餐廳嗰種味，嘩，點知普通到吖，統一福字麵好食過佢，被搵咗老襯。

今次要介紹嘅係相片呢隻由泰國出產嘅媽媽牌冬蔭公湯即食麵。

坊間有幾隻冬蔭公湯即食麵，但水準頂多都係一般，麻麻到麻麻，一味得個酸同辣，好啲嘅，「浸」味似冬蔭公囉。等而下之嘅，湯底「稀耶耶」，仲衰到連冬蔭公味都冇！唔知似乜？！

之前曾經提過只有喺華潤超級市場先可以買到嘅一隻好味到暈嘅冬蔭公湯即食麵，但係而家失咗縱，真係可惜！

不過，哈哈！今次介紹嘅媽媽牌冬蔭公湯即食麵，同上面失縱咗嗰隻一樣咁正咁好味，最難得嘅係夠正宗！

媽媽牌冬蔭公湯即食麵做到極之正宗嘅冬蔭公嘅酸同辣唔在講，最 YEAH 係做得到冬蔭公湯嘅 creamy 效果！正如佢嘅包裝用英文寫到嘅~ Shrimp CREAMY Tom Yum Flavour，媽媽牌做得到！

雖然佢啲麵係伊麵，略略扣咗啲啲分，但係麵質仍夠硬淨兼且 QQ 煙韌，好。

建議大家平時不妨買定啲蝦，煮熟後剝殼放喺雪櫃冰格，到煮麵嗰陣，尤其是煮呢隻冬蔭公湯即食麵，放若干隻落去，Hoooooo~~~~~ 包您即刻好似去咗 Tailand 咁~ Sau 話 Di 吸金蒙空叻喃隆奶奶吾！

上圖：媽媽牌冬蔭公湯即食麵，千祈一定要買！

下圖：茶餐廳牌即食麵，千祈一定唔好買！