農曆新年煲碟篇~ FFWD x 100

農曆新年期間，煲咗若干隻碟 (包括番煲)，由於一向嬾於重溯回憶 (電影)，所以到而家先寫。好嘞，同大家一齊快速過碟 FFWD 搜影。

迷失兒魂 (The Forgotten)：

可以話係爛片，因為好多情節嚴重犯駁兼超級兒嬉。但係呢，哈！嚴重犯駁兼超級兒嬉得嚟，佢裡面嘅主旨、「攪笑奸角」同故佈疑雲又吸引到人由頭睇到尾噃！所以話，片，爛唔緊要，最緊要爛得嚟仍有吸引好睇之處。好過有啲電影，大卡士自以為好精彩點知衰過啲爛片嘅大卡士爛片。一啲都唔好睇！最佳例子~ MI：II。

呢部片尤其適合偉大好媽媽及 oD衰仔衰女睇。

穿 Prada 的惡魔：

終於睇咗~ 我最愛嘅梅麗史翠普好索！表現水準之中 (呢部戲嘅劇本嘅角色對佢嚟講易過食生菜)。至於另一個女主角嘛，妖，要換啦！

其他對呢部戲嘅一些，請睇呢度。

平步青雲 (The Chorus Line)：

n x ∞ 年前米高德格拉斯的一齣電影，內容係講一群年青舞蹈高手為進入大歌舞團而施展渾身解數的過程及不同際遇。買它 VCD 嘅原因，唔係因為呢齣戲好睇，而係想重溫17、18歲左右那一晚深夜喺明珠台睇佢時嘅情景 (唔知點解嗰晚可以一個人喺個廳度將成套戲睇晒！) 同回憶一位現已失去聯絡嘅同學仔 (嗰晚之後同一個由小學一年級一齊做同學仔一齊搭白牌嘅舊同學兼好友講起呢套戲，咁啱佢嗰晚喺屋都有睇。)。

奇兵系列：

成個奇兵系列三部曲以精裝集結出售，呢個經典系列同教父系列一樣，屋企梗要有嚟看門口~

另外一提，奇兵 IV 好似已在拍攝中。

獨行俠江湖伏霸 (For A Few Dollars More)：

經典主題曲正到暈！而且，入面嘅配樂到而家仲有好多電影用 o緊。個人覺得主角奇連依士活被另一主角 Lee Van Cleef 搶晒鏡。

呢部片其實都頗悶，絕對適宜 Fwd 咁去片，睇頭睇尾。

另，可惜買唔到獨行俠系列入面另一齣較緊湊刺激嘅 The Good，The Bad & The Ugly。

魔戒 III：

喺電視叫做睇過 I 同 II，大佬，要坐定定喺度由頭睇到尾，唔係唔得~ 但唔係魔戒呢類故事囉。我剩係鐘意睇佢入面開大片嘅場面。嘩！勁夾激！

所以，我專登買 III 嚟睇。結果冇失望！開大片嘅嗰幾幕有若干嘅位令人熱血沸騰賺人眼淚！

大國堀起：

由中央電視台所拍嘅歷史知識系列，由近代曾左右世界嘅盛世強國~ 葡萄牙、西班牙、荷蘭、英國、法國、德國、俄國、日本同美國逐一上場登幕。

呢個系列命名為「大國堀起」，配合中國最近炙手可熱嘅國情，可見有關當局嘅言外之意。但係。。。。hmmmm~ 仲有好遙遠嘅路。

流氓醫生：

我靚仔過佢嘅梁朝偉其中一部經典之作。

呢齣電影好睇之外，係一部能夠叫人睇完一次又一次嘅正嘢。有 oD戲，係~ 係好睇，但唔可以令您有睇完又睇，又或者會間唔中不時拎番嚟播嘅意慾。但呢部呢，就得嘞！

片入面無論係故事、演繹手法、角色配搭、畫面色調、弦外之音嘅諷刺香港醫療制度等都好正！最重要係，有嗰種味道要人番睇再番睇。

殺破狼：

一向幾鍾意有洪金寶份嘅戲，而任達華自佢嘅舞男系列已經係信心之選，亦對甄子丹頗欣賞，結果呢齣殺破狼，打鬥 okay 刺激都係與片名~ 「殺破狼」呢個紫微斗數名詞嘅含意 (唔知幾時再整套太陽巨門或者紫微七殺) 相互呼應總算能做到，但係呢。。。。但係就好似總係差咁啲差咁啲嘢。

好睇，係。但就只係可以睇一次，一次就夠嗰隻。

衝鋒隊~ 怒火街頭：

上世紀90年代中嘅港產電影，但拍出荷李活水準，呢齣係小弟我番煲首選之一，已不知是第幾遍再睇！

後備甜心：

第一次喺巴士上嘅 Road Show 睇到呢齣戲嘅廣告，除咗因為有我好 likey 嘅林嘉欣，就係因為我與生俱來嘅 Dooo~~~ Doo~~~~ Dooo~~~ Dooo~~~~ Dooo~~~ 元始準確直覺感受品味判斷話我知，呢部嘢，啱 feel 呀！結果，真係，中！靚俏肥妹標緻五官、鬼馬精靈又攝神勾魂表情固然令小弟我有得 high，有得 fly，全片嘅清新又段段情濃嘅小品式敘述手法，令佢又係一部情不自禁會喺屋企較暗 oD燈光，開著冷氣，一個人或者攬住條女/仔 or 張氈，嘆住酒番煲嘅電影。

除咗衝鋒隊怒火街頭同後備甜心之外，其他番煲嘅仲有陸小鳳系列之金鵬之謎 & 決戰前後 (無記1977年版本)、超時空要愛 (好睇嘅爛片又一經典代表) 同 They Shall Have Music。

寫在後面~

有 oD戲，係只適合喺戲院睇。但亦有啲戲，亦只啱喺屋企睇。呢 oD戲，喺屋企睇嘅時候，在我個人嚟講，好有一種愉快而滿足嘅感覺。下次我會講吓呢種 feeling 同講講碟，我係點煲 (番煲)。