巔 Din Can Cook~ So Can You 之嘆鮑~

上年十二月十八號小弟由浸鮑開始，到中間日子整鮑，再最後到二十八號嘆鮑，經歷十日之折磨，一向性急的我，本來已急不及待公諸同好，順便 Yeah 一 Yeah~ 點知撞啱嗰陣網絡大擠塞，兼且一直上載唔到照片上嚟，攪到心亂如麻，甚為冇癮。

終於，喺前兩日攪掂晒！呵呵呵！！一二三四五六七，七隻極品大鮑，被整兼被嘆實錄，而家精彩地赤裸裸咁同大家見面！

天才廚師巔巔 Liang，嘆鮑堅料終登場！！！！呀哈哈哈哈哈！GO~

煮嘢食，就好似識女仔、識男仔同做買賣等等。有啲要速戰速決，有啲要慢慢煲。

正如煮公仔麵咁，水滾，放麵，攪兩攪，熄火，快手快腳放調味粉，又攪兩攪，整勻 oD麵同調味粉，倒入大碗，食。

又正如有啲客，一就一，二就二，講過算數兼夠爽快；但亦正如有啲爬街客，X，衰 # 過英國佬，要扭盡六壬，要慢慢「煲」。

又好似炒牛肉、羊肉片咁，燒紅隻鑊，落油，然後倒啲料落去，快速係咁兜數下後，上碟，食。

而整鮑魚，就絕對唔急得嘞！小弟幾年前曾試過將 oD鮑魚放入煲裡面煮，用齊猛火文火，結果，唔知點解越煲，oD鮑竟然就越實！失敗。

今次，o騎 o騎~ 成功整鮑品嚐之過程做法如下：

首先，拎啲乾鮑魚出嚟洗一洗，然後用水浸，浸七至十日 (其實四、五日都 okay~)。我今次就由上個月 (十二月) 嘅18號浸到23號，忍唔住，出手郁咗佢哋~

浸呀浸，浸夠嘞，到23號晚，將佢哋擺入真空燜燒鍋個煲入面，倒水至浸過晒啲鮑魚再多大概三分之一，跟住，留意嘞，先用猛火煲十五分鍾，然後轉用文火再煲十五分鍾。之後，即刻連鮑帶煲擺番入去個真空燜燒鍋度燜 (長氣提一提，真空燜燒鍋係唔駛用電嘅。)。

到第二日 (24號)，拎番個煲出嚟，用中火煮十五分鍾，然後又即刻擺番入去個真空燜燒鍋度繼續燜。如是者，重複呢個做法三至五日 (見圖二)。

到到27號，將成隻大肥雞放入去個煲入面 (加金華火腿片更佳)，勁煮個零鍾後 (要注意嘞噃，喺呢個時候，要補加番些少水去煮。)，又再放番入真空燜燒鍋度燜多一日。

28號晚，食得？食得！食！

食嗰時，有兩種食法~ 清新口味同傳統濃馥口味。清新口味好簡單，就係唔將啲鮑魚雞汁打茨，直接上去食。我爸爸媽媽要健康要原汁原味就用呢鍾食法 (見圖一及圖三。順帶一提，大家睇，小弟煮到oD鮑魚中間糖心啊！勁哩？！Heee heee！)。我就食打茨嘅傳統濃馥口味 (見圖四)。個茨汁好易攪，將兩茶匙蠔油加入半湯碗多啲嘅原味鮮鮑雞汁度，然後再落生粉 (已用水溝好) 溝。溝勻後，倒落煲度用慢火煮，滾後落件大鮮鮑度，攪掂！呵呵呵~ 郁佢！

剩下嗰一整鍋鮮鮑汁伴大肥雞，wa~~~~~~ 保存好，用嚟做餸、撈飯一流呀！

子曰話唔食就假
子曰話食色性也
子曰話整鮑試下
子曰話好好味呀~~~~~~~