雅俗共學~

之前曾寫到雅俗共賞嘅重要，今日睇到一本公仔書 (古惑仔連環圖) 入面兩句公佈將有新書推出的打油詩式押韻句宣傳，令自細就睇公仔書嘅我要講講雅俗共學同順手歌頌一下呢 oD公仔書。

四書五經楚辭漢賦史記宋詞元曲資治通鑑廿四史等等等等。。。。小 Di Di 我十歲前全部未接觸過，只識唐詩~ 一首「床前明月光」。

小時候，自識字開始，父親就買各種書籍，當中文理史哲都有。好似一系列知識性的中華通俗文庫、中國歷史圖畫故事、翻譯小說同西遊記、三國演義連環畫等等。嗰時，除咗關於數、理、化嘅唔睇之外 (三歲定八十，某程度上真係啱~) 其他嘅都珍而重之，睇完又睇。

另外，嗰陣我又好迷公仔書，例如龍虎門李小龍鐵血螳螂中華英雄壽星仔怪異集又等等等等呢啲全部都係我嘅自訂教科書 (仲有色情刊物如藍皮書花花公子天窗龍虎豹等咸書~ 『龍虎豹好睇！好睇！但係又好 _ 貴！顏色美麗~~~ 圖片美麗~~~~ 立體咁滯~~~』點解咁細個會有得睇？！嗰時同幾個同學仔去啲舊書檔攤夾錢買，又喺山邊荒林執到唔少，話時話，唔知點解咁多人揼喺嗰度？跟住組織咗個咸蟲村，互相分享之餘租畀其他同學仔睇。)。

大家千祈唔好以為佢哋入面冇嘢學，入面所學到嘅，終身受用。而且，仲好易入腦。當然，唔計衰嗰啲 (其實都有用。。。。)。好似打交書裡面嘅人性刻劃、俗語、成語、押韻句；搞笑漫畫嘅幽默神髓；咸書入面嘅精警內容 (嗰時嘅咸書內容，除咗咸嘢，有一大 Part 會講政治經濟。) 等都係其他學術書籍所冇嘅。亦冇咁易上手入腦。

由於佢哋深入淺出易入腦，所以若最底限度嚟講，得益嘅係，起碼唔會錯別字、寫白字。

勁啲呢，好似我咁，舉個例子，咦，降龍十八掌、易經降龍腿咁犀利嘅，於是，就走去睇關於易經嘅書嘞。到到讀書嘅時候，有一科易經哲學，好深！但入面嘅內容好易上手。簡單 oD講，亢龍有悔，一諗番公仔書內對呢招嘅解釋同圖畫，就即了解。其餘甚麼既濟卦未濟卦水在火上火在水上，都因為睇公仔書而好易明白。又例如副修的有一科叫比較政府與政治，諗番藍皮書曾運用過嘅寫法，講過嘅語句，融匯其中，個教授都話精彩~

雅俗共學，好~

當然，至於點篩選其中嘅唔好，除咗講天聰就係要有獨立思考判斷。點先有獨立思考？咁就要父母去培養喇。培養仔女有獨立思考能力，懂得分開青紅皂白，比一味剩係同佢講：「『You can't do it』，『You can't do that』，『This is you cannot do it』，『That is you cannot do it』，你仲細，咩都味識，所以，『You can do nothing』」呢啲咁樣嘅嘢嚟得正確、有用、更積極。

講番嗰兩句我覺得好正嘅打油詩式押韻宣傳句，

就係：

小李飛刀成絕響
人間不見楚留香

我整多兩句埋尾，

前浪已沒平如鏡
看此後浪誰最強