雨夜的「浪漫」

有嚟開呢度嘅您都知道，我，梁巔巔，好瀟灑好英嘅~

昨晚七點幾收工嘅時候，我 X，落雨喎，仲要好大喎！我又要冇帶遮喎。有個女同事咁啱同我一齊走，佢主動問啱唔啱路 (呢位女同事，今次加佢少少分。我對佢好感好乜，同佢冇乜兩句，平時客客氣氣。唔似姓「豬」嗰件咁。)，話遮到我落地鐵站，我話唔啱。不過，我同佢講，可以遮我過埋馬路嘅 (只有十零步路。但無謂拒人好意。)~

過完馬路，我話唔該晒，佢同我講未過得住，你嗰邊條馬路未過得呀！我話得咖喇，唔該晒 (費事阻人走嘛)！就冒住雨，型過華 Dee 英過朝偉咁暴雨中飛奔。

真係好 Q 大雨。

但上到車，都只係半濕 (因為巴士站就喺行人隧道旁。)。。。。已露晒「香肌」露晒點。。。。仲要好凍！一向唔怕凍嘅強壯嘅我，震震地。。。。架巴士啲冷氣好勁！平時又唔見咁勁！

點知，番到屋企總站，仲加大雨喎！仲行雷閃電吖 X！！！！

全部人都企晒喺有瓦遮頭嘅地方等。我，迎撚住啲雨慢慢「走」番屋企 (反正濕晒！)。Hummmm，對上嗰次咁樣，好似係同程霜哥哥喺中環 IFC，兩條麻甩佬雨中慢步。。。。一路行佢仲同我講 La Salle spirit。。。。-______- <---我第日個仔要入！幫吓手唔該！

瀟唔瀟灑英唔英，見仁見智。。。。但有手尾跟就肯定冇得抝！我有少少發燒了！好快！咁 X 快嘅？！

其實呢幾日都作作地病，一路都只會係「拍」必理痛壓住。昨晚整劑咁嘅嘆，壓唔住咯~

睇嚟，我嘅自醫感冒三大絕招又要出場~ 1. 食必理痛；2. 狂飲水後再隊齋啡；最後驚天一式 沖完勁熱水涼之後用垃圾袋包住自己然後再上床用厚棉被蓋住瞓一晚。

雨夜有屠夫？I don't know。但雨夜有傻仔病人？就肯定係~