抓鬼勁節目

尋日講話最近發現一套製作，好正好好睇，呢套嘢又係探索發現頻道出品嘅，就係而家已經做到第二季嘅「抓鬼行動大隊 Ghost Lab」。

呢支抓鬼行動隊伍每次都會去到美加唔同嘅鬧鬼地方去証實有冇料到，睇吓堅定流。佢哋會用先進嘅儀器去幫助同作為証據。最睇得過癮係隊伍嘅兩個主力會用盡挑釁嘅方法如語言去令啲鬼「畀反應」。有次佢兩個去喺加拿大某一鬧鬼地方出言挑釁古時喺嗰度戰死嘅法國士兵，我一路睇一路勁笑。

其中一樣最 Yeah 嘅係佢哋唔係次次都話呢度有鬼，如果喺用晒方法，扭盡六壬之後都冇收穫，佢哋就會話傳聞鬧鬼好可能係假，收隊離開。

又要學習吓人哋嘞！香港啲靈異節目，似攪笑節目多過恐怖節目。形式又千篇一律，搵啲主題講吓，等啲觀眾打上去噏 (吹)，頂多幾條友去啲鬧鬼地點作所謂嘅靈探，但又乜 Q 都唔帶，極其量係個「師父」帶啲符呀同陰司紙呀咁，有少少嘢就話有嘢。唉。唔講人哋用先進儀器分析，戮力求真嘞，剩係拍攝手法、鏡頭角度同氣氛，香港同東南亞啲地方真係要檢討吓！

呢度有呢個「抓鬼行動大隊」嘅片，各位可以去睇睇。真係好正！

P.S. Discovery 另一呢類節目~ 鬼影森森 (A Haunting) 都好正！節目主要係由訪問當事人，一邊敘述番事發嘅經過，一邊事件重演組成。

節目唔會講每位當事人是否講大話。只係會透過採訪當事人、靈媒、另類科學家同科學家嘅過程之中，畀我哋自己思考同判斷。又唔會「嬾」中肯「嬾」科學咁臨尾講埋晒啲咩「我哋要盡量理性」、「盡量唔排除其他可能」嘅說話，但其實聽得出個主持又想藉住咁而令觀眾 (聽眾) 更相信同埋加強佢自己嘅說服力噃！