留得青山在新譯

唉，不久前，一位唸大學時的師兄自殺走了。聽講，是由於生意失敗。。。。無論如何，點解咁唔珍惜生命呢？！

自殺原因有好多，但好多都唔駛去到自殺！為工作而自殺就更傻，更可惜。像屈原，多傻！
講吓我自己嘅心得。

老闆，上司，唔駛旨意亦唔好冀望改變佢哋，嘥氣體。所以，唯有亦只能夠做嘅，就係改變自己嘅心態。

如下：

有賭未為輸，希望在明天：一日未死，仲要加咁後生，大把世界啦！而且，啲偉人好似姜子牙、勾踐、希特拉同毛澤東咁，都係衰咗好多次先理想達到 (仲要係每次都衰到好貼地嗰種)，我哋雖然係凡夫俗子，但都冇理由衰一次或幾次就自己攪掂自己咁蠢！再講，您又點知自己唔係偉人呢，如果您咁快自己 Game Over 自己嘅話！

唔要蝕本：老豆老母揼咗咁多金錢心血落自己度，就咁死咗佢？！喂，唔抵喎！

誓死頑抗，戰士撩揪：拎番自己喺屋企您駁老豆老母嘴和喺學校同阿 Sir，"Missy" 攪對抗嘅鬥心出嚟，同啲令您感到絕望嘅仆街老細，上司抗爭到底。老友，係佢哋攪您，對您唔住咖嘛，咁有乜理由死嘅係自己？！即使唔咁侵略性唔咁撩揪格，唔攪對抗，被炒算數或自己唔撈，咁，起碼要自己活得更好！對住自己憎嘅人，第一首先要自己活得好，跟住先可以活得比佢好，再跟住先能夠山水有相逢、睇佢點死、仇未報只係時辰未到。

貴族氣質：貴族，死後要有陪葬嘅。佢哋未死，您死嚟做乜？！

心要黑：想死嗰陣 (或平時) 只要諗，大把人折墮過我啦 (事實又係真嘅)，人哋都唔去死，仲積極咁去面對去 fight，咁自己點解唔得？！我以前有個朋友，佢條命，搵一次錢呢，就會仆三次 (約數) 咖嘞，但佢仍然笑住話：「咁都好過有 oD人冇得搵都照仆吖！」See？！在乎觀點與態度！

阿 P 精神：P 喺 Q 之前。東家唔打打西家，天生您才必有用。啲老細，上司唔識欣賞您，係佢哋嘅損失。大家記住啦：「係~ 老闆/上司，你有權選擇我；但老闆/上司，我都有權選擇你~」

貪得無厭：只要諗吓，您嘆夠喇咩？！死咗之後，咩都嘆唔到咖喇。冇酒飲冇煙食冇機打冇拖拍冇 K 唱冇 Blog 寫，好冇意思啫？！仲有，自己仲有好多嘢未玩過未試過，死咗佢，咁，您對唔對得住貪心？！

唔係一了百了，有手尾跟：梗係唔係您啦，您都自殺死咗咯假設。講 o緊嘅係您啲屋企人。知唔知處理呢啲嘢係好煩嘅一回事？！要到現場認屍去落口供再攪一大輪如喪禮出殯等等等等，故此，只要掉番轉頭想，就自然會明白。而且，您父母仲大受打擊而病倒，重則仲可能會神經失常。您自殺死，一世。但您父母呢，仲有大半世！！！！

最後，試吓咁諗啦，人，千祈唔好只得單向思考。根據心理學統計，大部份自殺的人都係屬於這一類人。例如，如果財閥四眼超人係呢種人，佢會點走上自殺之路呢？佢會諗，我而家七十幾歲先得嗰幾百億身家，又禿頭又唔靚仔；蓋茨而家先得嗰四十幾歲，就有千幾億美金家產，仲要冇禿頭兼靚仔過我。。。。我都係死咗佢咯。

總之，一切在乎觀點與態度。要做屈原抑或范睢，大家識諗啦！

記住，山水有相逢君子報仇十年未晚仇未報只係時辰未到留得青山在那怕沒柴燒臥薪嘗膽活得比佢好皇子復仇記莫欺少年窮柳暗花明又一村苦盡甘來行到水窮處坐看雲起時大器晚成，都要珍惜自己，珍惜生命先享受到！！！！！