食呀食！

利苑

粥粉麵係我哋日常食厭咗飯食，非常好嘅主食選擇。呢類粥粉麵食店喺香港有好多，出名又好味嘅亦唔少。事實上，能夠做到粥粉麵二者同其他配角好似稯呀、油炸鬼呀、菜呀等等咁都一流，就唔係間間都有，間間都得！

喺銅鑼灣 Sogo 後面嘅利苑，係其中之一間出色嘅粥粉麵俱佳食店。

最愛佢嘅及第粥。粥香味夠，濃稀適中。各種料如內臟肉料煮得剛剛到位！至於麵，好似今次食嘅雲吞麵，麵質爽彈唔在講，雲吞新鮮，湯清底厚，完全係嗰皮！Very Very Good！

仲有佢嘅稯、魚皮同皮蛋都好正，不妨試 o埋。

呢間利苑價錢略貴，但，值！

大胃王

灣仔內街一向潛龍伏虎，每有驚喜！好似呢間喺船街嘅大胃王，就係其中一間嘞！

呢間嘢環境可以，乾淨。有 update 嘅報紙雜誌睇。嘢食好得！如圖中嘅福建炒飯，賣相好。汁多料夠鑊氣夠！味道一流，而食完亦不會勁口渴。份量方面，叫嘅係下午茶餐，但仍夠飽。

廿零蚊，抵！

巔巔好介紹

平日只要動吓腦筋，肯嘗試，好嘢食自然會出現。

今次同大家介紹嘅係又可以當係主食，又可以當係小食嘅紫菜豬腳肉肉片。

買隻豬腳番嚟，出水之後用鹽水煮熟佢。等佢攤凍咗，切片切肉，放入雪櫃度雪凍佢。食嗰時每一片或每一嚿肉用紫菜包住咁嚟食，哎唷唷唷唷唷！！！！！好正正好好味呀！！！！簡直係前所未有嘅新口感新沖擊呀！！！！！估唔到嚟自大海嘅紫菜同嚟自陸地嘅豬，兩者嘅味道係會如此天生一對絕配咖喎！大自然神奇呀真係！

呢味菜簡單易整又好食，而且仲可以放喺雪櫃食好耐，試試啦！