Thursday, April 30, 2009

貓與狗


以前細個鍾意狗,對貓就不但毫無感覺,唔知點解仲覺得貓係壞蛋。記得契細佬細個嗰陣屋企養咗隻家貓,我去o親佢度都會用啲玩具攪佢。。。。而家諗番真係有內疚。

而家人大咗,反而瘋狂愛上貓,調番轉對狗就冇咁鍾意。事實上,自己細個同現在嘅性格都有好大轉變,最明顯係變成孤僻同冷漠。

我發現貓同狗有兩樣嘢係好唔同,就係第一,流浪嘅貓狗,生滋狗係普遍過生滋貓。即係話,貓係乾淨過狗。以前讀書嗰時,同屋嘅一對情侶養咗一隻史納莎,嘩,佢只要一個星期多少少唔沖涼,就臭到呢~~~~~~~

貓呢,以前伯娘屋企養過兩隻波斯貓,完全冇呢個問題。

第二樣係,貓,唔只有性格過狗,佢哋真係性格大師嚟!喺大學嗰陣嘅音樂系附近,有一隻被人遺棄嘅老虎狗,我試過好多次將食剩嘅泡麵 (杯麵) 畀佢食,佢大口大口咁食,仲食到 o雪 o雪聲!有一次我將成碗滿漢大餐 (記得係蒜香珍肉味) 食晒只係留番 oD湯畀佢,佢 dum 低頭就「食」到 o習 o習聲!

而貓呢,哈,堅咯!做嘢附近有幾隻流浪貓,佢哋定時定候都會喺公司附近等待我一位同事嘅餵食。我同事走咗之後,佢哋唔知咖嘛,所以仍然每日如是。我咁有愛心咁愛貓,梗忍唔住,於是喺某一日,我接手去餵食哋。嗰日,我買咗兩大包熱浪同 Lay's 薯片畀佢哋食,我定~~~~ 唔好話佢哋唔肯食,佢哋竟然聞都唔聞吓喎!!!!!

貓,分分鐘仲有性格過人~

8 comments:

新鮮人 said...

薯片?
唔係啩?
貓唔可以食咁咸架,
食得太咸對佢哋身體有害!

對寵物的看法或多或少反映了個人對伴侶的要求! =p

虎茶 said...

同埋貓咪比較善解人意

uncleray said...

我雖然不認識你,但從你的文字真係感覺唔到你"孤僻同冷漠"lor。

眯扮cool引誘未成年少女呀 :)

梁巔巔 said...

新鮮兄: 我另外嗰半又真係怪人嚟 ga! ^~

虎茶: 貓真係好似女!

Uncle: 唉..... 你有所不知咖咯.....

macy said...

梁巔巔

我都係噃, 以前比較鍾意狗, 而家鍾意貓多點. 我估係因為自己後生啲, 會鍾意隻寵物陪自己玩吖嘛, 我以前個隻西施同唐狗, 真係百厭到嘔. 而家人大左, 好怕煩, 米會鍾意貓靜靜地, 又無狗咁痴身.

但係貓狗都唔食得咁喊架, 會生滋同肚瀉, 你米咁害佢地啦.

梁巔巔 said...

係咯! 貓真係好正呀呵!

Extraordinary Life 翠斯 said...

"我買咗兩大包熱浪同 Lay's 薯片畀佢哋食,"

唓, 你都無心喂既, 玩野呀 !

我都好愛貓架, 我有隻養左13年既貓貓. 不過過左身好多年LU, 而家都想養番, 不過喼神話驚BB敏感喎..要遲D 先得啦..

"我雖然不認識你,但從你的文字真係感覺唔到你"孤僻同冷漠"lor。" BY uncleray <--- LDD 你又系度握新朋友呀 !?

梁巔巔 said...

我本一番好意 ma...... :(

我真係好冷 ga! .....