貓貓貓貓貓呀~~~~~~ 我愛呀~~~~~~

尋日本來諗住早上十點幾就起身沖涼 (一日沖三次。我好乾淨。)，然後去十二點開始嘅貓展 (其實個貓展係由12:00 ~ 20:00，但我一向唔鍾意晏出街嘅！當然，若然係為女就冇辦法。)，點知好 Q 眼瞓，喺張床度典吓典吓典到接近十二點先起到身。

去到大約一點幾，嘩，好多貓呀！好得意呀！我即刻流晒口水！

話係貓展，其實應該係貓選美先啱。唔同嘅貓分開唔同組別喺大會幾個選美比賽場等評判測試審評佢哋嘅內涵同外貌。但冇乜 Fun。反而喺度等出賽嘅貓，先係貓展嘅主菜。正！


在場嘅貓除咗參加比賽，有好多仲係「貓辦」，因為佢哋啲主人除咗係養貓愛貓人士，亦係繁殖貓嘅業餘供應人(有啲仲係識業嘅)。我喺場中識咗唔少，包括唔係繁殖貓嘅供應人，諗住遲 oD可以唔駛幫襯寵物店咁貴吖嘛。另外，仲見識咗一啲我從未見過嘅貓 tim！例如 CurlyBurly (羊毛貓) 同 Maine Coon (緬因貓)。

除咗貓展，仲有三樓嘅寵物展。個寵物展個名又係唔多啱，因為主角係各商戶嘅寵物用品同食糧，只有幾個攤位係展示寵物，例如爬蟲類同昆蟲類。

不過，都好正！因為場中，啲狗好似仲多過人，仲四圍行，人同狗都好親蜜，大家霎時間，喺同一空間入面好似都係同類咁！又逼喎，heee heeee，我仲抽咗唔少水！而且，凡係見到得意可愛嘅仲都摸！摸！摸！真係好想啲靚女見到我都好似我對啲狗狗咁！

仲有啲人抱住貓呀同免仔呀咁，最型嘅係見到有人抱住隻貂同另一個膞頭企住隻鸚鵡嘅。

攞 o埋憑入場而送嘅贈品~ 寵物 VCD、BYOB 同狗糧，四點幾左右結束咗今日呢個頗為有趣嘅週末。


經過今日，我更加肯定，我一定會不日 (希望盡快) 養一隻我會好愛佢嘅貓女。品種會喺 Ragdoll、Maine Coon、異國短毛同香港短毛度揀 (即係俗稱嘅家貓。成日覺得嗰啲咩美國短毛同英國短毛有乜咁矜貴？同我哋香港短毛有乜分別？！)。

呀！仲有呀！我今日喺個貓展度咁耐，鼻敏感一啲都冇發作！掂！養得！

呢種就係 CurlyBurly 羊毛貓嘞。


全場最多嘅異國短毛貓。呢隻好得意！我同佢互「喵」咗好多聲，到我扮狗吠，佢即刻擰轉頭唔睬我！嗰時我先捨得走。

American Curl 美國捲耳貓。

另一隻更靚嘅 American Curl。

喺美國最受歡迎嘅 Maine Coon 緬因貓。

另一隻體型更大嘅緬因貓！

我最鍾意，心儀已久嘅 Ragdoll 布偶貓。


呢隻好巨型嘅狗好得意兼純品 (唔記得咗係咩品種)，任摸唔嬲，我自然抽咗唔少水~


當中有一半係狗糧。

。。。。一陣嘅宵夜。。。。講笑啫。攞嚟諗住送畀朋友 el el 嗰「四個女」。