奇景雜談

奇景 (一)

10幾年前喺中環歷山大廈附近見到一個乞丐，向途中人潮要錢。

喺我前面不遠有一個著得好型，身型幾 Fit，戴住黑超嘅中坑 (好似黑幫大佬) 略停一下，喺西裝內袋度攞咗一叠一百蚊紙出嚟，數咗十幾張畀咗個乞丐喎！！！！

！！！！！

奇景 (二)

尋日搭車嗰時見到有個揸電單車嘅人，佢個大包圍白色頭盔貼滿咗一張張寫住「勒令」嘅黃色符。。。。直頭好似幽遊白書入面嗰個角色~ 骸軀一樣！(見圖)

型！激！

但最堅仲係當年我喺墾丁度見到嘅！台灣人乜都拜，事實上又真係有好多邪門古靈精怪嘢。

嗰次喺墾丁度見到有條友將三太子哪咤嘅像凸出嚟咁鑲咗落個頭盔正前方位置喎！！！！

真正鬼見愁！魔道行者騎士！

奇景 (三)

有一次喺舊東方文華酒店嘅 Captain's Bar 度見到一個真係靚到「dum」一聲嘅中年女人一個人坐喺 bar 檯中間位置。

坐喺附近嘅男人，包括客同職員都係咁望啦好自然。

過咗一陣，大約個零鐘左右，佢喺手袋度拎咗一本聖經出嚟，然後大聲咁朗讀喎！！！！！

讀咗幾分鐘，佢若無其事咁收番 o埋本聖經，將杯酒好似人哋敬死咗嘅人咁倒落 bar 檯度然後放低錢離開。

。。。。

奇景 (四)

幾年前，好似係02、03年左右，有一次喺 IFC 一期二樓見到中環洪金寶攞住本嘢 (應該係佢本詩集)，好似古時詩人咁捲住本嘢，一隻手放喺背後，行嚟行去咁讀。。。。

-________-"""""