火燒地旺，我旺呢度~

講嘅呢度，係我而家住 o緊嘅大坑。

未搬入嚟大坑呢度之前，平時一直都只係喺搭車時經過佢嘅街口 (即係由以前嘅百樂戲院至現在嘅百樂中心，一路都只係經過。)。頂多只有幾次喺位於佢街口嘅一間 Bar 飲過幾次酒。

到半年多前，去探住喺入面嘅細哥夫婦先至第一次去過大坑。

人生是戲，變幻無常，真係估都估唔到，冇幾耐之後嘅而家，我會住喺呢度，仲要係大坑嘅中心地帶 (見左上圖。不過幅相唔係我影。)。

未搬入嚟之前，呢度已有好多好多各地同本地風味食肆，有高級嘅、有中產嘅、有平民化嘅，猶如聯合國，差唔多間間都有自己特式。我搬咗入嚟之後，哈，越開越多如雨後春筍 tim 仲！而且，呢帶仲越嚟越出名，更成為咗極潮為食地帶！我遲 oD都可能開番檔賣牛雜同魚蛋，做推車仔！係嘅話大家要捧場喎！呀哈哈哈哈~

呢區有樣嘢我好鐘意嘅，除咗自成一角，令人彷似身處異域之外，就係呢度啲茶餐廳、快餐店、餐廳、舖頭以至報紙檔，大家之間同 o埋同客人之間都可以打成一遍，有濃濃人情味感覺。好似有一次，我經過其中一間報紙檔，沒打火機，於是問檔主借機一用，嗰位阿姐話送咗畀我喎！嗰時我啱啱搬入去咖咋！同佢都唔熟！

又有一次，我喺其中一間快餐店食完嘢，但冇錢畀，佢哋竟然信我會番轉頭畀喎！

總之，呢度無論係地方位置、環境同 o埋人情，都真係一個小小村落小鎮咁，正！大坑，一處在夾縫中，本來很易被遺忘的老香港情懷舊區小天地。

香港，妳仲未瓜呀！

P.S. 遲啲等我食勻呢度，整番個為食在大坑系列~