不錯的白老鼠

尋日下晝做咗白老鼠。

Hummm，其實又唔完全係嘅，只不過做咗班醫學系菜鳥 (學生 + 新仔) 嘅教材。平時入一次房，今次入兩次。第一次入到去，有兩女四男喺我面前，我就好似本能入面嘅女主角咁，畀佢哋輪。班菜鳥果然未畢業，非常菜鳥，問 o埋晒啲廢問題，都唔關我嘅病事嘅！我仲要提佢哋我有呢 oD資料嗰啲資料，又咁又咁，唉~

第二次再入番同一間房，嘩！一入到去嚇我一大跳 (國語唔該)！今云成十幾個學生喎！負責我嗰個學生叫我坐，我坐咗喺個教授 (主診醫生) 嘅位，佢話：「Sorry，梁生，應該係呢度。」鬼知咩！嗰張靚啲睇落舒服 oD嘛！跟住我坐番我應該坐嘅位，背住晒班友，冇幾耐，個貌似李家誠 (最近生咗個唔知仔定女嗰個) 嘅醫生走入嚟，開波。

成個過程，十足十如一個電視節目。嗰個學生就似主持，個醫生就似專家，我~ 就好似唔想 (唔可以) 出鏡嘅被訪問嘉賓。

其中有一度，個醫生問我幾多腰，我見有唔少女喺度。。。。咪報細啲囉：「三十二左右。」嘿！佢見我唔多 firm，點知佢即刻攞條軟尺出喙嚟：「坐喺度整唔準咖，企喺度量啦！」吖 X！「三十四。」我細聲講。點知佢又出招：「通常我哋著褲呢，係細兩吋先得嘅。」

。。。。

最吹脹係完事後佢哋拍手掌喎！

其實，開頭醫院打嚟話尋日會咁樣，我真係抗拒，但知道唔會拍低加上後嚟我覺得可以以自己身體貢獻一下人群，又唔係做咩手術，冇相干咯。

另外，我都有得著呀！例如，原來用醫生成日要嚟聽我哋嘅心口同背脊嗰個「耳筒」，好犀利咖！能夠聽到好清楚嘅心跳同其他內臟嘅聲音 (我同嗰個負責我嘅學生吹水嘅時候問佢攞嚟玩)。

原來，最搵錢嘅一科係婦科。

原來，醫學院嘅女生，好主動咖！

原來，人真係會變質變得好厲害。

而最大得著係，因為今次咁嘅場合，個醫生睇我睇得非常詳細，仲好有建設性！