假日閒情

長假期，去外地旅行充吓電，玩吓，固然正正！但亦未必一定要咁先夠盞。留番喺原地去渡過，只要過得其所，一樣爽！

好似小弟我咁呢，一早已準備好「過節」心情，雖然，呢幾日身體有啲唔好，更衰到 oD菌落咗肚度 (唔知點解我感冒 o親都係會咁)，攪到都有頗多時間要喺浴室度渡過，但係，並冇乜點妨礙到我去充實呢個長假期。

嗱，四 lu lu 就去旅行；五 C 就喺美國準備番嚟 Yeah Yeah Wet Wet；三 G 就盡享家庭樂兼做家務；大 Mad 啲節目就好似仲忙過番工嗰陣，而且好似喺戲院番工咁。我呢，雖則，係孤獨佬，但唔寂寞噃！除咗肚疴、瞓覺同例牌節目煲碟之外 (遲 oD我會寫番篇講碟，究竟我係點煲~)，就係如下：

沖涼~ 由於小弟潔癖，所以，每大一次必洗 pat pat 一次，加上呢幾日肚疴，就乾脆疴一鑊成身沖一鑊，結果，每沖完一次都精神爽利煥然一新一次，累積下來，到到今日嘅我，已經係全新嘅我，好 BB 嘅感覺。

沖咖啡~ 朝早起身後，無論飲唔飲，都煲一壺咖啡，然後又走去再瞓，等到啲咖啡滾嘞，咖啡香氣溢滿成間屋嘅時候，再喺床度起來，嘩~~~~ 個 feel 好正 ga！

又係沖涼~ 有別於上面嘅沖涼。

今次呢種係每日最深入去沖嘅一次。開大、洗 pat pat、用肥皂洗身、用洗頭水洗頭、再用肥皂洗身、最後再用勁熱水幾分鐘。

正！

再沖涼~ 應該係沐浴先啱！

浸喺充滿肥皂嘅熱水浴入面，瞓吓，冥想吓 (發白日夢)，自我撫摸全身吓，嘆番杯冰水，舒服到暈！

抹嘢~ 沖完之後，就攞條大毛巾將自己全身由頭到腳係咁抹，爽！抹完自己，就拎幾隻小弟僅有嘅叫做靚錶、全部袖口鈕同兩枝小提琴嚟細心咁慢慢捽捽抹抹。

唔知點解會一路抹個嘴會唔自覺咁笑。

剪嘢~ 之前小弟咪買咗盆古意盎然嘅盆景嘅，佢喺我嘅悉心照顧之下，仲加茂盛過之前。所以，亦係時候修葺一下。於是乎，將佢擺喺張檯度，我坐喺佢前面，慢慢左剪右剪，靚晒！

咁樣樣，又可以剪咗成粒幾鐘。

聽收音機~ 呢幾日天陰陰，灰暗暗，又陰陰寒，最好就係匿埋喺間房度，喺被竇入面，幻想出面係嚴冬或打風，聽住收音機 (一定要港台或商台)，到咁上下整多杯杯麵，呵呵，妙！

以上動作，看似無聊，但只要我鐘意我 enjoy，自得其樂，對我嚟講，亦係妙不可言嘅節目。

呢幾日，就係做以上嘅嘢加煲碟。聽日開始，或者會轉轉嘅~

仲有三天，祝大家繼續享受！

Hmmmmm~