我係怪叔叔~

「兄 da 哦 ji 生~~~ 兄 da 哦 ji 生~~~」(怪叔叔)

台灣嘅電視業，肯定進步過香港嘅好多好多！無論係創意仰或購入外國嘅劇集均好過香港好多！唔講大家唔知，而電視嘅橫向式播映劇集節目，都係由台灣人發明嘅。

而且，台灣嘅有線，一季收費都只係為到港紙$500零蚊左右 (但好多人都唔駛畀錢就有得睇！因為，好多時有一家 join 咗，將個接駁器擺出嚟畀啲左鄰右里駁！大家亦識做，把互助互愛精神充份發揮，我駁你駁一齊駁！Heee heee，好正咖！)，仲有成過百個台！唔似香港嗰啲又貴又少台又搵笨 (睇咸片要另外畀錢！人哋嗰個彩虹頻道，yo！任您睇吖！仲要好睇喎！呵呵呵！)！

而在眾多節目當中，其中印象最深之一係購自日本富士電視台嘅經典喜劇電視節目~ 志村大爆笑 (志村 けんのだいじょうぶだぁ)。

呢個志村大爆笑由著名喜劇演員~ 志村健帶領演出。呢條友個人覺得仲好笑過盧海鵬同阿燦廖偉雄。事實上，台灣和香港的搞笑綜藝節目唔多唔少都有受佢影響。

成個節目每一集都由幾個固定單元組成。其中最好笑，最吸引我嘅單元係怪叔叔。怪叔叔呢部份係先嚟一段無關重要的情節，然後，無端端咁，由志村健飾演一名成日會喺各種不可思議、意想不到嘅地點如浴缸、包裹、地氈底等出沒，騷擾整蠱女人嘅古怪人。整蠱完嚇完，再喺女生嘅求救後，就會有一大群人出現然後問佢：「你係邊個？」，怪叔叔就會回答：「我係邊個？我係邊個！冇錯，我就係怪叔叔！」然後開始唱起歌兼跳怪叔叔自我介紹舞「我就係怪叔叔~~~ 我就係怪叔叔~~~~」。最後以大家好似癲咗咁跳舞，怪叔叔再大叫：「大爆笑！」結束。

好笑在志村健扮得過癮，演得抵死！怪叔叔仲會以唔同款式出現。好似有幾集佢就著住件 o騎呢泳衣，敏感部位穿住個條頸好長嘅天鵝水泡。。。。加佢個樣，呀哈哈哈哈~~~~~

呢套嘢我前後睇咗好多次，百看不厭。可惜香港冇佢嘅碟賣。好彩，喺 YouTube 有若干片段可以重溫，正！

以下呢條片就係怪叔叔嘞！但我估係後期喺第二個節目志村健再扮，玩一下，並唔係志村大爆笑時期。因為片段中其他配搭演員唔係原有嘅一班，而且片段中嘅志村健明顯已老咗好多。而志村大爆笑係上世紀87 ~ 93年嘅電視節目。

畀少少耐性，最後怪叔叔出現嗰刻真係好抵死好笑~



志村大爆笑更詳細資料