Monday, July 23, 2012

食上癮



有好多人話食乜嘢飲乜嘢會上癮,例如話飲可樂會上癮 (唔覺)、飲咖啡會上癮 (唔覺)、飲奶茶會上癮 (唔覺)、食煙會上癮 (非常正確)。。。。除咗煙仔 (妖!當然仲有軟 & 硬性毒品啦!所以,咪試!講開食煙,諗起由細玩到大嘅細哥當年同無知而又純真嘅我講話:「唓!食煙,心癮嚟咖 ja 嘛!」X 那星!呃人嘅仆街!!!!!),我一向都認為冇嘢係會飲食上癮嘅。

但係,喔,自從幾年前喺大坑一個人住嗰時,煮過蠔皇燴意粉 (通心粉) 之後 (見當年圖),就一直愛上。及至最近,條癮更 X 那味一發不可收拾~ 兩個幾星期食咗十餐!!!!

唔知點解,蠔油加太白粉嗰個茨汁再撈埋意粉「朕」味非常吸引我!吸引我個程度係到到而家,一諗起就流口水不特只,呢個只係形而下,唔驚驚;最杰係我個腦同心都成日飄起嗰隻味道!唔食唔舒服!好似煙癮咁!驚驚!

呢,我而家又去煮蠔皇燴意粉喇。

3 comments:

the inner space said...

心癮!

樂遊 said...

身體會對尼古丁等產生倚賴,所以煙癮深者戒煙,很難用一句心癮就可解決。咖啡係會上癮的,飲開唔飲會頭痛不適。我睇過有節目,講d人戒咖啡的發應,話過得了頭兩、三天,問題就會消失。

梁巔巔 said...

Space 兄: 唔只咁簡單.....

樂遊兄: 所以, 真係每個人嘅體質都唔同. 我對咖啡一啲都唔會上癮.