瘀事

尋日朝早喺巴士同個「女性朋友」打招呼，佢莫名其妙，我仲好自信好熟落咁繼續講，仲話：「唔係啩，咁都唔認得？！」

原來我真係認錯咗人！我好少好少認錯人。咁多年嚟，唔超過三次！

好彩架巴士冇乜人唧！

講起瘀嘢，呢六年幾嚟記下過以下勁爆嘅。

1. 中學時某一個唔記得咗係平安夜定係元旦除夕，學人出去 walk。出去 walk，自然就少不免要「立」gel，於是乎，喺出動前一兩日走去萬寧買支 KMS 嘅「gel」(嗰時呢隻牌子好興)。到出動當天，裝身嘅時候，就係咁「立」係咁「立」啦，咦，點解梳極都有色嘅？而且，呢隻 KMS 都好香吓喎。好唔容易梳到啲 gel 勻循，攪到正常，到出到去，walk walk 下，落雨喎~ 咦，點解個頭有泡嘅。。。。到番到屋企拎支嘢嚟細心睇~ X！KMS Shampoo。。。。

2. 有一次，飲醉後跳上吧檯高歌。

3. 中一、中二左右跟從小玩到大的乾哥哥落 Canton Disco。著住件好健康，由音樂事務統籌處製造，心口印住樂韻播萬千嘅 T - Shirt，但外面就著住件牛仔褸，摺袖扮粗野。。。。結果比我乾哥哥班朋友問佢：「喂，你細佬都好得喎！裡面咁健康出面似收數~」

4. 樂團演出時，在指揮沒有動作、指示下，仲未要真正叫我哋郁，我就郁，早奏出咗音樂。。。。(首嘢仲要係好激好澎湃嘅匈牙利舞曲 No.5)

5. 畀個識咗冇幾耐嘅法國女朋友同我講：「不如我用普通話同您溝通，好不好？」

瘀嘢，都不失為人生可愛點綴~