美事妙日

兩個多月前一個閒日，同老友叡木中午去咗西營盤近上環一聚，順便嗒番杯，點知搵咗好耐都搵唔到間喺店外有位 (可以食煙嘛！) 嘅食肆喎！X！真係，香港越嚟越趕客！點夠大陸咁自由咁有 Fun！

搵呀搵，行呀行，好乸攰！卒之去 Q 到西營盤近上環口，搵到一間叫「群眾小炒王」嘅食肆，冇煙煲都照入咯！

問咗收唔收開瓶費，唔收，進入。

叫了煙燻蜜糖鴨胸同酥炸雞軟骨，兩者都好好味。煙燻蜜糖鴨胸煙韌脆口，肉實又厚。酥炸雞軟骨，炸得外熱內「慶」，軟骨過足牙癮，妙！

兩人個多鐘頭幹掉一大枝皖酒王，四圍眾人用膳唯我倆獨酌，微 High 酒意之中搭車番歸。

偷得浮生半日閒，美味小食、酒意、老友，人生人生，如此如此，亦覺倒也不賴。

所以話，偶爾一刻適當放縱，係人生轉瞬快樂仙丹妙藥。