中環木人巷

中環，有一條木人巷嘅！大家知嗎？

喺中環皇后像廣場和太子大廈嘅地鐵站出口，個人認為係最靚嘅地鐵站同地鐵出口。

但係有好多時，嗰度附近都有一美中不足嘅地方。

相信喺嗰度出沒嘅人，都會知道嗰度 (地鐵站) 同太子大廈中間有條好優雅嘅小路，前後分別通往匯豐總壇同海旁。通往海旁嗰段，成日都有好多攤位，好似信用咭、入會、關懷老人家、關懷愛滋、助養兒童等等，佢哋會向路過嘅人好似少林寺嘅木人巷咁左右先後試攻、輪攻、夾攻。。。。係避唔到咖！

就當我冇愛心啦！久而久之，我發明咗兩招可以令佢哋一嘢即退！

一，佢哋一走 o埋嚟，就用好重喉音 + 鼻音嘅發音講一句：「What？」(講句 What 啫，練吓啦！您哋得嘅！) 實驗証明，原來好多香港人係嫌講英文煩嘅~

二，直頭聲都唔駛出，聽住 mp3 or mp4，指指個喉嚨，皺一皺個眉頭，攪掂~

呢兩招，特別係第二招，好 work 嘅！大家不妨試試。