小學雞功課之財政司，你我都做得到！

即係呢，自從由自己友香港人做財政司之後呢，所謂嘅財政預算案真係你我他，儘管係我呢啲咁嘅數學白痴都識得做咖！

唔 Q 係咩？！每次都只要喺啲無關痛癢嘅嘢上面加啲減啲，又畀啲少恩少惠，跟住話送大禮派錢唔係王道，要共渡時艱 (佢老味又唔見佢哋啲狗官同我哋共渡時艱咖喎！問吓都即刻關閘話唔會減官員人工！)，對香港同香港人有信心，最後以笑笑口結案收工，就得咖喇！

屆屆嘅財政司 (守財奴) 成日都好鍾意話最差嘅時刻仲未到，所以要留多 oD儲多啲錢，喂，今次係百年一遇金融海嘯呀，又係你班政府高官契弟講嘅，咁都唔大手筆啲？！為擦鞋一嘢億億聲畀阿公賑災就咁鬆手闊佬？！

回歸後，世界大市唔好多過好，香港嘅貧富越嚟越兩極懸殊，但特區政府嘅儲備就反而越嚟越多喎！幾得意~

啲儲備要幾多政府先會實際咁出手？！點樣先叫最差？要到山崩地裂冚家伶嗰時？嗰陣連個世界都大亂，政府都仆街 o埋啦！攬住咁多錢入土為安？！托吖？！

呢個政府，以有遠見為維持穩定為名，其實係冇膽冇魄力兼歛財先係真~

最後，講番呢份嘢，有幾樣要噏。

- 點解唔加 o埋紅酒白酒稅？

- 加50%煙稅，煙民嘅我，唔反對。但就要講，你呢個政府好撚 X 好撚假囉！口口聲聲關心我哋嘅健康同食煙點衰點衰，咁就要好似土耳其同不丹咁，直情唔畀賣，全國咁禁！但唔係噃，佢哋又唔捨得 oD煙草稅收噃！做乜？！學上帝等我哋有自由有得揀？！正契弟！

- 既然政府理財咁「謹慎」，點解白頭任蝕咗咁多仲有花紅分？！Cut 鳩佢啦！「恰」啲普羅市民就咁醒？！

- 每一任嘅守財奴講嚟講去都係嗰 oD！做嚟做去又都係嗰 oD！試睇番曾狗之後嘅松松，松松之後嘅早逝，早逝之後而家嘅洪拳曾師傳，佢哋每個會有乜分別？！香港嘅情況喺佢哋形容之下又有乜分別？！

- 守財奴格言之一就係慳得一毛得一毛，其中節流最快最實際就係減班高官人工。但政府已第一時間拎頭。喂，點共渡時艱呀政府？！

唉，大家慳 oD駛呀平時真係要！唔好見經濟好番啲就人講你又講，話：「個市好咪洗吓囉！」咁呀！跟住個咁嘅政府，自求多福呀！唉~

特別一提：注意！曾俊華係我少有對佢幾有好感嘅唯一高官。而家仲係。所以呢篇冇 X 佢。