蠔皇雞髀

天才小廚師又嚟~

冇新鮮雞食大家唔慣咩？！係，新鮮雞係零舍唔同，但冇法啦，鬼叫啲禽流菌咁惡！

其實，只要唔係整白切，冰鮮雞都一樣好味。當然，過時過節將隻冰鮮雞當新鮮雞咁成隻瞓喺度擺上檯就唔係咁似樣啦！大家可以諗諗用鴨代替。查實呀，鴨，仲好食過雞啦！肉地實又細嫩，冇雞咁「鞋」，又補喎！正！

講番今次要介紹嘅蠔皇雞脾。

買 oD冰鮮雞髀番嚟，用生抽、老抽同糖醃大概個零鐘。醃好，放入鑊略煎一下，然後倒咗啲油，加水，將雞脾煮熟。煮大約十至十五分鐘，再加入最重要嘅蠔茨 (一湯匙蠔油、半湯匙太白粉及一茶匙糖)，攪勻即成。

蠔皇雞髀，大人細路都鍾意！大人食起上嚟，仲有一種童年回憶 tim！

今次幅相係唔係冇之前嗰若干張咁核突，正好多呢？！哈！

註：緊記一定要用手揸嚟食，千祈唔好用刀叉筷子！咁先更有味道！