選舉論好醜~

前幾日寫過吓今屆參選立法會嘅女候選人入面，多咗靚女 (注意！強調呀吓，呢度所謂嘅靚女，係指一直冇個比較正嘅選舉同政壇嚟講。)。而家順便寫 o埋男嘅。。。。err。。。。一個俊啲都冇噃！羞家！

咁不如換個角度，睇睇有邊啲樣衰哩！嘩，大煲！咁就好多！

嗱，唔係因為本身我對民建聯冇好感嘅原因，而係民建聯班友事實上又真係差唔多個個樣衰兼無賴喎！好似曾鈺成呀、劉江華呀、黎榮浩呀、譚耀宗呀呢啲，仲有樣衰之最~ 陳鑑林，個個講 oD嘢都眼光光瀨尿 (實例：好似風信子留言話佢老爸有回跟佢哋交手，民建聯班友竟然話：「呢 oD事幫你唔到！」就算！好似佢續鬧咁講：「區內事就算幫唔到你都應該轉介，或是了解一下，一句了事算是什麼？」枉民建聯班人仲口口聲聲話同市民服務！)，件件個樣個格都真係可以開個醜人館放 Q 晒入去做 Sample~

咁佢哋有冇個好樣啲嘅呢？有嘅，咪係曾做過年薪八十萬嘅「特首辦影印員」嗰個陳克勤囉！唉，女怕嫁錯郎，仔呢，怕入錯黨。睇到佢為民建聯詭辯護短，捩橫折曲兼生安白造，本來樣子外表還可以嘅佢即刻變成首席白淨小奴才。

民主黨。。。。涂謹申嘅樣。。。。可能由於佢上次單醜聞，而家先覺佢個樣原來真係幾唔掂。

突然諗到喇，靚仔，有！係田北俊！

呢條友雖則我對佢同佢個黨都係冇好感，但係佢真係樣得有儀態有風度有魅力，大少得嚟唔乞人憎！佢細佬就唔多得掂咯！畀 oD選舉論壇攪到變咗師奶！

另外，陶君行喺 Now 個選舉論壇度，全力揪插陳鑑林嗰個表現都幾型。

原來，人，樣衰唔衰，佔好重係源於你嘅內在係點、你係咪無賴同你做 o緊啲乜呢啲等等等等。特別係男人。