吹脹數字

大家冇去錯地方冇去錯 Blog。冇錯，數學白痴，計小學數學仍會計錯嘅我，呢次講數字。

嘻嘻！咁我梗係唔係講啲咩關於數學嘅難題啦。對我嚟講，所有關於數學嘅，頂~ 都係難題！亦唔係諗住講啲咩得意嘅數學理論喎。對我嚟講，數學理論，我剩係識同記得乘數表。。。。

今次要講嘅，係關於數數目。

嗱，個、十、百、千、萬、十萬、百萬、千萬、億、兆，兆以上，叫乜呢？

唔知哩~

我哋其實兆都非常少用，通常都係講千億、萬億或幾萬億。億係喺一後面加八個零，而兆，就唔知要再加幾多個零先可以叫做兆。

但以前讀書時，一位教數理邏輯的教授曾提到，原來兆以上，仲有，嘩！坐穩~ 仲有「京」、「垓」、「壤」、「溝」、「澗」、「正」、「載」、「極」、「恆河沙」、「阿增衹」、「那由他」、「不可思議」及「無量大數」！

可惜出自何處同點解咁叫，我唔記得喇，但覺得 oD名幾過癮！「京」至「載」，唔明。我剩係記得「京」，係一後面有十九個零！

去到「極」同之後嘅其他，就較易理解啦！「極」，去到咁嘅數目，仲唔係極限？！「恆河沙」，比「極」更多，多如恆河沙數！「阿增祗」，比恆河的沙仲多，所以連個名都無厘頭唔知係乜！黐晒線！「那由他」，去到呢個 Level，幾多個零，數嚟都費時，那就由他吧！最後嘅「不可思議」同「無量大數」，一睇名字已經明晒啦！

去到某一個數目，好似財富咁，只不過係純數字遊戲，想也不無道理。而心中富裕，先係真正快樂，充實，睇嚟更係好啱！不過，當然啦，最起碼，要唔駛為生計著急先能夠咁講。特別係喺香港！