煲碟

我其實唔係唔鐘意睇電影，只係唔 likey 入戲院睇。原因以前都講過，不贅。

另一個主要原因，係好享受喺屋企睇。嘩，戙起隻腳睇又得；瞓喺度睇又得；對住個噴出三匹冷氣嘅冷氣口「嬲」住張氈睇又得；好似豬咁一路睇一路食呢樣食嗰樣咁睇又得；睇睇吓做 oD不雅動作好似撩鼻屎咁又得，FREE！

而且，我睇電影、電視劇或其他節目好興當睇到啲好吸引嘅地方嘅時候，重複又重複咁睇。好似龍年 (Year Of The Dragon) 中段入面尊龍喺唐人街堂口同幾個叔父開會嗰幕，我重複又重複睇超過一百次！

煲電視劇集比煲電影我更鐘意，尤其是好耐以前嗰啲，因為有種好迷離嘅 feel，好似返番以前咁。

而無論係煲電影、煲劇集抑或煲其他，總之就煲碟，對於某啲碟，我都好好番睇又番睇，番煲又番煲。好多時直頭係只係播住，間中望吓，留意吓，自己做其他嘢。

唔知點解，好親切。

怪。