閒情小吃

星期六、星期日，又係大食勣時間。週末食咗一大煲牛脊鯊魚骨各式錦繡肉丸煲，尋日星期天中午，轉食精巧細緻一啲，「擦」咗託四妹 lu 喺台北幫我買番嚟嘅台式香腸同佢送畀我嘅手信 (嗱，lu，咪踢爆呀吓！)~ 香芋酥。

台式香腸，乃小弟最愛食嘅台灣三寶之首 (其餘兩樣係滷肉飯同鹽酥雞)。喺台灣嘅街上，一車車賣香腸的小販，都有一個骰盅，客人可與小販比點數大，贏咗，唔駛錢有得食，輸咗，只需要原價買嚟食。唔知而家仲係唔係咁。

食台式香腸，一定要配大蒜，咁先仲正！我呢，加多一樣，習慣咗準備好一粒粒生嘅大蒜頭，加 o埋一粒粒生嘅紅蔥頭，然後一大啖烘熱嘅香腸，一口咬半粒大蒜頭同 o埋半粒紅蔥頭，佢哋三者嘅味道配合得天衣無縫，天生就係絕配呀！

香芋酥呢，紫瑩透澤，芋香四溢，皮酥餡潤，色香味天生佢有。它於我，有一份無奈而又浪漫回憶，所以，一口一口吃著，心裡都嗞味上心頭。

嬾洋洋嘅週日，嘆冷氣，瞌吓眼瞓，幾杯熱茶，食呢啲，好。