一、二、三、四 & 五，Full Team！

前日星期六，因老五就快要番花旗國，五胞胎 DVALC 終於「夫添」喺某大 KTV 登場。

Lu 四妹認真唔話得，見老五就走加上預祝阿大嘅六月壽辰，星期日有試要考都抽空一到。

老五 Cheryl 最早到，嗰間 KTV 嘅櫃檯唔知點做嘢，明明「卜」咗16：15嘅房，攪錯咗16：30，害佢攪輪懵，慘！嗱，真係唔關我事咖！

三三同肥虎瘦龍一齊出現，越嚟越佩服呢位近乎全能嘅俏師奶。

阿大咯喎，哈哈！今次千呼萬喚終現身。嘩，原來，佢，真係好索！而且，佢真係好放好玩得好鬼馬！靚女之中，真係實屬珍品。

喺 KTV 就梗係唱歌咖啦，講歌喉，自然我至勁。四妹都唔錯；阿大呢，都 okay，叫做唔會五音不全。有啲音仲唱得好嬌俏 tim！嘻嘻！老五就，呵呵呵，有唱膽囉；意料之外係三號仔柯蓮娜唔止唱得吓，仲幾勁！

臨離開前我唔小心整跌咗個香檳杯落地下，yo！擲地開花，今年個個有運行！好嘢！

四妹早走，三三同肥虎瘦龍行街，阿大、老五同我再去咗銅鑼灣一間甚有特式嘅 Bar 飲酒。呢，阿大嘅好玩、風采同雅俗集一身嘅一絕，就係喺度有幸欣賞到。另外，亦令我對老五有更深嘅了解。佢係一個外冷內熱嘅人。

好難得嘅聚會。好難得嘅人。

最後，祝老五妳前程似錦，開心快樂！

下次再玩過！