小病是福

呢期 oD天氣真係好反常，黐晒線嗰種！又濕又熱點知「咄」一聲又忽然變凍！所以各位親愛的要小心身體喇。好似小弟咁，一向都算強壯，但今日，病咗啦！

前日晏晝已經有少少唔妥，到夜晚迥光反照咁冇事，點知到尋日朝早，嚟晒料。結果尋日瞓到天昏地暗，好在尋日嘅天氣極之適合瞓喺張床度，瞓吓，聽吓收音機，咁樣，唔係大病嘅話，都幾盞。

晚上沖咗個極熱水花灑涼，由頭到落腳，爽呀！沖完之後攞條大毛巾係咁捽頭髮係咁抹身，再包住自己一陣，哎唷唷！嗰種溫馨稱心安全感，好正！完全滿足晒生理與及心理上嘅需要。

必理痛加瞓覺再加沖涼，真係對治療小病好有用，再唔係，試試兩大絕招吧，就係狂飲水後再隊齋啡；最後驚天一式，沖完勁熱水涼之後用垃圾袋包住自己然後再上床用厚棉被蓋住瞓一晚，包掂！

今日開始，連續多天假期，祝大家有個愉快週末，玩得開心，盡情享受！各位晚安。