又做昏君咯~

一向冇迷過，甚至冇セ點睇過甚麼韓劇、日劇。反而到而家仲迷 o緊以前無記同麗的時代嘅片集。大陸有幾套都鐘意。

但最近有齣逢星期一晚，喺明珠台播嘅日劇~ 飆風引擎，小弟我就差唔多每個禮拜都睇。因為有佢呀~ 加藤小雪。

呢個加藤小雪自當年嗰套電影~ 最後武士我已經好冧佢咖喇！佢唔算好靚，但除咗身型一流，就係呢，最迷到我瘟瘟沌沌嘅係佢嗰種剛柔相融得天衣無縫嘅氣質味道。特別係佢嗰雙眼睛，啊~~~ 睡眼惺忪般柔柔無神，偏偏又蘊含無盡絲絲韻味風情，望住佢，就控制唔到自己胡思亂想！天啊~~~~ 點解要有啲咁攞人命嘅女人？！仲加慘嘅係佢仲好似我嘅一個意中人！弊呀！

前面講過，因為佢，所以我睇呢套飆風引擎。到後嚟，不知不覺又覺得幾好睇噃。劇入面 oD細路好得意，發覺木村拓哉同李雲迪真係好似 (講開呢樣順便叉開話題講講，朗郎好似突眼金魚；李傳韻好似廟街榕樹頭睇相嗰啲；黃蒙拉有啲似玩魔術嗰個 Henry 哥哥。)，咦，講到邊。。。。係嘞，情節又溫馨兼勵志，前日嗰集仲睇到小弟我有啲咽哽，想喊！

有時會諗，到底係作品先吸引人，還是因為作品裡面嘅其他元素好似某啲演員、主題音樂、配樂、甚至只係某一幕 (幾幕) 而令人鐘意成齣作品？

我估。。。。兩種都會有。

加藤小雪~~~~ 呵呵呵~