今日~
從上環內街末段至西營盤的內街中段，還倖存著紙紮舖。在經過的時候，總會嗅到絲絲紙香及燭香，很有懷舊古風的味道。其中一段，更還有著幾個老婦，蹲在舊式住宅大樓下，用古老方法幫人家化粧賺取糊口收入。
走在途上，一切彷似時光倒流，身處昔日的老香港。
看見各式各樣的紙紮「用品」，有名貴房車，豪華大宅，還有傭人，甚至電腦及手提電話等等掛在紙紮舖內外，心裡暗嘆：「真細心！」
這些一系列「用品」，都是孝子孝女，及有心人燒給父母和他們重視的人。姑勿論世上有否鬼神之說，重點在於，一切盡在他們那一份出於真、善、美的心意。這份彌足珍貴之情，是我們中國傳統培養孕育出來的一種人性。這種人性，表達了對我們思念之人的永不休止無限愛意。
一次，聽到幾個中學生不屑地說：「死了的人都用不到啦！」還有一次，幾個應該是極端環保份子的人說：「一點都不環保！」
！！！！
你們這廝讀過幾年假蕃書的呆子兼另外的「環保納粹」癲狂，不知所謂！DNLM！
今日，陰曆十四，七月。
15 comments:
I used to live in Sai Ying Pun. Should go there some time before it changes completely.
係經濟效益方面睇，燒d冥通茄薯，佢地折現好似實用d喎~~ cash is king!
問題是，這不是表達思念和孝心的唯一方法。
gosh!!!
have to back home earlier ah >0<
依家死人生意好好做
買個位你都幾頭痛....
都未必係"極端環保份子"既. 有宗教信仰既睇法係好唔同. 如果兒孫唔燒, D祖先咪好慘? i read hk magazine that day, there are also machine for foot massage, minicooper, scooter, skateboard, 煲仔飯!
AhHaHaHaHaHa~~~~~
Mad Dog, 妳好幽默 ar ha~
祖母年屆百歲, 對許多人與事都已模糊,
有天, 我問妹妹:
我探她, 她知道嗎? 她知我是誰嗎? 我探她是為了她還是為了我自己的感受?
妹妹沈吟半響道: 你就當是為了自己吧!
後人給先人燒冥襁, 無論是一份孝心或是希望祖先保佑, 最終慰藉的, 還是人的心.
Ya!!我完全agree Ms.愛美 既講法, 我都曾經要求過間紙紮舖紮兩個保鑣給我媽咪, 可以保護佢ma...
Ruth 姐姐:
搵日去行一趟吧~
mokit:
Haaaa~ 冇錯. 但呢種生意唔易做~
Bee 小妹:
酒店好猛鬼 ga! 第日妳出 trip....
占士:
Haaaaa~~~~~ 冇錯! 但何不全部燒 oD!?
愛美姐姐:
"後人給先人燒冥襁, 無論是一份孝心或是希望祖先保佑, 最終慰藉的, 還是人的心."
講得好~ ^^
Florence:
妳很考孝順, 也很可愛. Aunt 有妳真有福氣.
大家分享下各種死人生意啦，要儲棺材本呀!
送自己一程
8月4日，周五。恒指今周跌67.24，收16887.80。下個禮拜一正值陰曆七月十四，亦即猜呢士萬聖節，兼且今年有閏七月，咪話唔雙重驚嚇，正一「雙驚兼閏月」也。每逢於這個睇見師奶阿毛在街邊燒金銀衣紙、撒暗黃溪錢、奠九江孖蒸的日子，總令我小曹有感而發，忽覺人生查實脆弱過大白兔糖咪紙，短暫過抽根國產雲煙，唔襟玩過歡樂天地，化學過海域化工（2882）；正如跑馬仔墳場門口一副名對聯所言：「今夕吾軀歸故土，他朝君體也相同」，可見有生就有死。雖有云「未知生，焉知死」，但我小曹就覺得「唔識死，難錫身」，不探討一下死亡，又點知「生命誠可貴，愛情價更高，若為自由黨，馬姐都嗌交」而識得活在當下、樂住半山？理性消費原則正是及時行樂也，亦即「今朝有酒即刻醉，明日愁來不日當」，正如升市時不妨到富臨擦七頭吉品鮑，跌市時就去大家樂（341）嘆隻八點半後以折讓價發售的一哥火鍋船，亦得。我小曹今日講說話忽然懶有哲理，無他，事關想趁鬼節前夕搞搞氣氛，順便懶有黑色幽默兼白色恐怖再兼藍色憂鬱咁講講同賣鹹鴨蛋有關的理性消費也。
猜呢士對死亡話題零舍敏感，但好在家下並非新正頭，否則牛頭角三姑慈雲山六婆黃大仙九嬸例必大嗌「啋過你」、「揚過你」同「大吉利是」。之不過，西人卻百無禁忌，好似以殯儀業做故事背景的電視劇《六呎風雲》（six feet under）收視率就肯定好過絲帶台的《葉劉博客》（三點）、《與特首真情對話》（四點）、《特首的一天》（五點）。再講，今年3月就有三十幾位公公婆婆參加慈善機構搞的「死亡之旅」，參觀長生店、火葬場、骨灰龕同墳場，並率先試穿潮爆壽衣，叫做綵排定先，好待他朝百年歸老知道身後事為何物。於是乎，我小曹再本住滿腔「求知者精神」，一於學公公婆婆了解身後事行情，就如年年驗身令自己分外放心一樣，亦計定棺材本到底要幾多先至夠皮（老曹話齋，假設每年回報率十巴仙，根據「七二法則」，七年後本金就打孖上，然後玩細胞分裂一變二、二變四、四變八……，所以話，愈早儲定棺材本就愈數也）。
不少有銀士搞葬禮往往熱鬧過擺幾廿圍，是為身份象徵也；好似舊年3月林伯仙遊，據消息時準時唔準、唔準多過準的新聞紙娛樂版講，整個喪禮使費七百萬元，其中最大手筆是一副棺材，皆因採用名貴柳州楠木，造價四百零八萬元，粗粗地都夠買一個太古城細單位；據講柳州楠木木質清香撲鼻，令人令鬼都齒頰留香，而且質地夠硬淨，有效防止蛇蟲鼠蟻乘死人之危。再加埋靈堂布置、林林沈沈使費（好似話花十幾萬元請香江第一才子寫篇祭文），得出七百萬元這個銀碼，但愛食魚柳包的林伯查實生前相當慳儉，所以壽衣只穿旗下口擘擘有些少似濕地公園貝貝的鱷魚恤（122）出品之老西。有人就話，查實喪禮並非為死人而搞，而是搞畀後人睇，諗落又幾有見地，所以風光大葬（包括同隻愛犬風光大葬）的深層次意義，就是代表子孫消費得起，亦象徵後人食飽無憂米、有錢冇碇使。
華人永遠墳場勾出八幅地皮
如是者，我小曹一於應應節，明查暗訪打聽長生服務市價，籌備定一個五星級的「瓜」。確保死有葬身之處，首先要搵一處山地，事關大部分有銀士登上極樂後都會入土為安，塵歸塵，土歸土，刁邦金勞歸仵作佬，先至顯得有派頭，況且H埠寸金尺土，墓地同樣實施昔日港英政府不認不認還須認的高地價政策。而眾多公眾墓地中，以華人永遠墳場管理委員會打理的四大墳場最矜貴，稱得上「陰間禮頓山」，旗下哥連臣角、香港仔、將軍澳同荃灣的華人墳場，永久用地盛惠二十八萬多元，比起每十年約滿後要續期的一隻貴約莫十倍價錢。
我小曹於是撥個輪去委員會打聽，佢地剛從「死人霸生地勾地表」中勾出七幅位於荃灣，同埋一幅位於哥連臣角的地皮作公開認購，本月24日截標；而市場焦點相信會落在哥連臣角那一幅，事關位處市區，兼風涼水冷景觀開揚，不難成為有銀士爭奪的陰間豪宅地王，令我小曹實在有想生人霸死地的衝動；但好可惜，職員甲同我講，墓地只供後人幫先人申請，而且須出示死亡證。甲仲話，雖曰永久墓地，查實佢地同政府的租地期有限，哥連臣角一幅到2036年，荃灣七幅則到2047年（五十年果然要變一變，未知到時有雙普選未），屆時就視乎政府會否收地或要求補地價先可繼續安葬。再講，今次公開認購同IPO一樣以電腦抽籤決定中籤者，並非一般賣地價高者得也。
睇怕要於H埠搵一幅永久陰宅用地唔衣時，令我小曹想有智慧不如食住宏調個勢趁低吸納神州墓地。但當然，山地固然緊要，葬禮搞得好好睇睇更是指定動作，所以有必要聘請殯儀專才負責打點一切，而H埠稍具規模的殯儀中小企叫添發（呢個名查實更似財務公司），佢地有提供一個盛惠四萬三千八百元的一條龍套餐，核心項目是一副高蓋西式棺材，可揀四邊玫瑰或楓葉花紋手抽，更可揀五種顏色絲綢布置內櫳。而最吸引我小曹者，是遺體可享用法蘭西香薰處理，保證好似金象米一樣，睇到都香噴噴；跟手由同政治化妝師一樣負責執頭執尾整色整水的死人化妝師幫遺體變靚D（8079）上路，仲包括壽衣、全套祭品、大包圍靈堂布置，以及各崗位殯儀從業員（如堂倌、和尚、道士等）提供服務。而出殯當日，除出動傳統殯儀藍車身的靈車運載遺體，更派出四十八座位旅遊巴接送孝子賢孫上山落山。至於舉行大殮的架步，則可揀世界、萬國、九龍、寶福紀念館任何一間，絕對方便十八區街坊。
為令先人於地府都能過住富豪級生活，不少慎終追遠的子孫都會為先人焚燒紙紮用品，添發負責人就話，除一般紙紮用品如「江山輸盡」手表、「周先生」十四畸金鏈、「冇得撈喇」生滋手機，以至最煙的埃泡同數碼相機外，更可訂造紙紮奔馳S卡士或者其他豪華房車，而每輛只需一千元，實在相當之抵，事關一個紙紮路易威登手袋亦要五百元，兩倍價錢就可出到一部車，只限陰間先做到這個至抵價；若先人崇尚環保，不想令陰間有朝一日要搞死人藍天行動同電子道路收費的話，大可選擇訂造不排廢氣的紙紮精英大師或牛精福星代步，價錢同樣一千大元，而呢類大型同手工複雜的紙紮用品，約莫需時一個禮拜完工，若先人停放於同政府柯弗時一樣的攝氏二十五度半，照計都屍骨未寒，仲等得。驚先人等唔切的話，大可先燒一副麻雀、一張麻雀連三個麻雀腳解悶，盛惠八百元。
查實不少孝子賢孫寧願向先人供應物資亦不願折現，事關冥通銀行而非運通銀行所發行印有閻王而非赤松簽名的鈔票面額動輒五千萬元，可見陰間惡性通脹相當嚴重，難怪後人燒親溪錢都要一疊一疊掟落化寶盆。自從冥通銀行放棄金本位制度後便猛印茄殊，因而造成流通貨幣增加，令金元寶成為資金避難所兼保值工具，現貨金元寶價格不斷屢創新高。我小曹認為，新任冥通銀行主席格林屍斑為穩定冥通貨幣地位，大可學似貝求奇設定目標通脹，而市場預期陰曆八月八仍須加息四分一厘遏止通脹，意味加息周期未完。之不過，由於凡間太多後人向地府焚燒大面積豪宅，已令陰間出現房產泡沫，令人擔心再加息將對地府經濟體系造成破壞，就如最後一根禾稈草壓斷駱駝背一樣。
職業孝子成老人社會新經濟
言歸正傳，我小曹聽茶客甲講，不少人嫌傳統殮葬服務無厘新意，於是搞搞新意思，其中美利堅推出太空葬禮服務，利用火箭將客仔骨灰運上太空，然後就撒到地球軌道、月球表面或者外太空，實行擁抱浩瀚宇宙。甲話，葬禮收費以每克骨灰計，收九百九十五美元，約七千七百港元，而最多可帶七克骨灰上太空。至於家屬則可透過人造衛星直播，收看火箭發射一刻及追蹤親人骨灰在太空的行蹤，服務水準絕對拍得住使命必達的Fedex。甲見我小曹問長問短，於是寫個網址www.memorialspaceflights.com叫我自己睇個夠皮。而幫襯這個太空葬禮服務，就名副其實幫先人升天，早登極樂，但當然，穿越大氣層又不代表能夠上到天堂。
講咁耐，查實不少人最忌死後冇仔送終，甚至冇人前來三鞠躬。茶客乙就話，神州自實施一孩政策後，下一代人數愈來愈少，但不少人都希望仙遊後有一大棚人送葬，所以神州出現所謂的職業孝子，亦稱臨記殯儀男，專幫先人披麻戴孝擔幡買水拎住張車頭相喊苦喊忽，絕對比H埠演員更浦弗純爐。乙話，聘請職業孝子每日盛惠一千元人仔，如果要享用增值服務，例如幫遺體洗白白或者送條鹹錦鯉上靈車，價錢另議（即是有價講）。若然客仔嫌職業孝子喊得不夠凄厲或者演技太過浮誇，更可叫佢地再培養好感情以更投入角色，比好多開親垃圾會淨係識得釣魚的代議士同埋掛住打機的卸責高官都有職業道德。查實H埠愈來愈少兩公婆生細路，連佘當奴都勸市民淫賤不能移地生夠三件。看來，H埠唔使幾耐就會變成老人社會、沒力都市，而下一代就買少見少。所以話，職業孝子絕對有孖屐，大可列入職業再培訓課程或者青少年見習就業計劃，令廣大無業中年同雙失青年都可做職業孝子，總好過由於冇錢去杜老誌而領「鹹」主演吞住口水裝女學生沖涼的「火山孝子」
Wa~
Haaaa~ 曹仁超~
就嚟冇得寫/唔駛寫, 所以更激?!
文中提到其中一樣, 職業孝子~ 台灣一早有喇! 而且, 亦漸式微. 由更激嘅職業哭喪播放器代替.
另, 你好似做生意的, right? 諗諗曹仁超文中其他建議. ^~
呀....
你都唔睇清楚，唔係老曹 -- 曹仁超
係小曹，佢專寫到 d 文章係咁，講生活同使錢，星期六先寫。
"正如升市時不妨到富臨擦七頭吉品鮑，跌市時就去大家樂（341）嘆隻八點半後以折讓價發售的一哥火鍋船，亦得。"
笑死我
我唔係做生意的，希望姐。
噢~ 係 wo!
"正如升市時不妨到富臨擦七頭吉品鮑，跌市時就去大家樂（341）嘆隻八點半後以折讓價發售的一哥火鍋船，亦得。"
Heee heeee~
"佢地有提供一個盛惠四萬三千八百元的一條龍套餐，核心項目是一副高蓋西式棺材，可揀四邊玫瑰或楓葉花紋手抽，更可揀五種顏色絲綢布置內櫳。而最吸引我小曹者，是遺體可享用法蘭西香薰處理，保證好似金象米一樣，睇到都香噴噴；跟手由同政治化妝師一樣負責執頭執尾整色整水的死人化妝師幫遺體變靚D（8079）上路......'
AhHaHaHAHAHA~~~~~~~
每逢於這個睇見師奶阿毛在街邊燒金銀衣紙、撒暗黃溪錢、奠九江孖蒸的日子，總令我小曹有感而發，忽覺人生查實脆弱過大白兔糖咪紙，短暫過抽根國產雲煙，唔襟玩過歡樂天地，化學過海域化工（2882）
真係頂隱.....
之前佢講過車，錶，酒
不過搵唔到比你了，笑鬼死...
Post a Comment