再遇歡聚蘭桂坊~

已經好耐好耐好耐冇去蘭桂坊 walk。

以前，講 o緊好多年前，蘭桂坊仲未咁街知巷聞嘅時候，有一次 (好似係中三嘅時候)，港台嘅五菱鏡介紹嗰度。自己細細個就好鐘意一啲小街小巷嘅地方，其中尤以歐洲小鎮嗰種最嚮往。那晚一睇，嘩，唔得掂！於是即刻問爸爸究竟係咩地方，點去。知道之後，幾日後就走咗去行咗 round。

好正！嗰陣嘅佢，簡直係黃沙大地中嘅清泉；俗世中嘅迷離境界；喺都市裡令人沉醉一刻的一股幽香。她盡頭的 Mad Dog (多年前已被整楝拆掉！建咗一棟與現在新起大廈一般模樣，校服式的高樓大廈。)、Post 97同 California 等那時只得呢幾間嘅 bar 及 eatery，全部都那麼勾人攝魂。

嗰時，迷佢迷到專登搭車出去，行一行，打開 Mad Dog 幢門「裝一裝」(嗰時得嗰15歲，唔「減」入去，驚好貴。)，就心滿意足咁番屋企。

大個咗後，就成日去。曾經在那裡留下不少回憶。但漸漸，大概23、24歲左右，感到佢變得俗氣熏天，完全失去咗那股幽香、典雅。於是就再也沒再迷戀，亦極少再踏足她每一吋地方了。

一笪地方，若出了名，再繼而成為了焦點，她的遭遇只會是難得的保持性格。或如蘭桂坊，落得星光燦爛，卻失去自我，庸脂抹粉的蒼顏。

一處地方，重要的是同甚麼人去。其他的，並不那麼重要。是的，正如前兩天，星期二那個晚上，我和他們的聚會，就在蘭桂坊過了一個難忘的晚上。

不得不記下。霜，你嗰晚好公子哥兒；Bee，妳好靚；Sheta，妳把聲唔做 DJ 實在嘥料；Danny 哥，你勇闖蘭桂坊好攪笑！

真係好正！