教育電視 ETV

雲兒下看吧
世界上滿兒童
兒童活潑聰明

雲兒下看吧
世界像個球兒
兒童在微微笑

兒童是快樂和互愛
兒童是友善和氣
兒童是美麗
個個臉似紅霞
兒童像鮮花的笑

六字堆尾七字堆嘅您，仲記得呢首唔記得咗係幾年級嘅中文科教育電視主題曲呢？

另外，對教育電視嘅記憶仲有嗰班例牌小演員好似孖仔同年紀較大嘅鞋抽，仲有有好多人扮細菌嗰集健教科。

上網 search，連一個那年代嘅 ETV 都搵唔到。可惜。

雜寫一通

1. 新發現，有線怪談嘅新女主持好索！身段又好！

2. 我好 likey 嘅陳貝兒離開咗有線，唔知係唔係會過去無線？

3. 又一次証明，呢個世界夠薑夠惡夠癲夠神秘就得咖喇！大家睇睇北韓~

4. 六四廿週年，各路人馬都做大佢。越嚟越覺得之前同最近反六四嘅嗰啲友仔其實係忠嘅！甘願背負罵名而幫手做大六四廿週年！

5. 教育三殺~ 母語殺、通識殺、普通話殺，一波未平一波又起，一浪接一浪，問您死未！？

6. 曼聯輸咗畀巴塞，heeeeee！開心死我咯！！！！去得遠跌得痛，呵呵呵，曼聯抵 X 死。

7. 刺蝟，係，係好得意好可愛！不過，原來啲屎尿排泄好臭！仲臭過白老鼠 (我細個養過)！所以，凡係想養哺乳類動物嘅朋友，留意嘞！

8. 我冇買古惑仔睇嘞，但間中會喺某啲「地方」睇囉。個作者牛佬黐 X 咗線！書中多位一線主角同其他二線主角，大配角將會喺今個單元釘蓋！

讚嘅係夠 Pok！唔似其他漫畫書咁，啲主角成日唔死，最佳例子係龍虎門同風雲。彈嘅係冇咁嘅必要，因為當中唔少仲有發揮，可以寫嘅空間，咪乸為咗谷書而監硬整死啲角色！仲要玩悲壯而玩冚家剷~

9. 最近，駭然發現多年前拍嘅一張相片，竟然係靈異照片！過兩日會 post 上嚟畀大家睇睇。

10. 經過我嘅親身試範，原來，戒酒係易過戒煙咖！偏偏酒稅唔加，煙稅就加到九彩！我 X 鳩！

假日好味！

今日係端午節，端午節，唔一定要食粽嘅。試吓以下呢味啦！

卡通片~ 天才小廚師入面有個咖喱天才馬志良，而家喺呢度，現實世界有我，登！登！梁巔巔，教大家煮，登！登！咖喱羊肉！

材料 (以4個人份量為標準)：

巴西羊仔肉 (山頂百X有得賣) 8條或普通羊扒3 - 4塊。
咖喱粉及咖喱膏各一茶匙 (我用開嘅係香港冠益華記那隻)。
糖2湯匙。
鹽一茶匙。
生抽兩茶匙。
雞粉半茶匙。

做法：

1. 把羊肉斬件後出水 (出水即把水煮滾後放已斬好的羊肉粒落去煮)，約15分鍾後撈起待用。

2. 把已切粒的洋蔥倒入燒紅及已落油嘅鑊，再加各一茶匙咖喱紛咖喱膏及已出水的羊肉炒約3分鍾後再加已切好的馬鈴薯，又再炒3分鍾，炒呀炒~ 炒呀炒~ 係咁炒；兜呀兜~ 兜呀兜~ 係咁兜~ 之後加水及材料部份的調味料。而水的份量要蓋過鑊內的材料。

3. 把鑊蓋上炆30 - 40分鍾。注意嘞大家！期間要留心水一不夠便要加水！ 仲要間中攪兩嘢。

4. 待一切「軟熟」後上碟。

5. 開工，食。

P.S. 如果大家沒有那份心情或沒有時間，大可用右圖之現成咖喱汁。

飲奶！

戒咗酒之後，食甜嘢食到爆皮帶 (話說某一日咳嗰陣，個皮帶扣咳到甩咗。。。。)！唔係辦法！哈，冇嘢係代替唔到嘅！最新好發現，原來，鮮奶好好飲！

不過，唔係話飲酒唔好，飲奶先健康嘅咩？！點解飲奶飲到我又 High 又懵懵地嘅？！

似樣的台式餐廳

講嘅係喺銅鑼灣翡翠明珠廣場嘅茶軒台灣料理。

呢間茶軒台灣料理，我唔常去，只食過三、四次，但次次都中！中咩呢，就係每次啲嘢都好好食！

呢次去叫咗台灣鎮島美食之一嘅蚵阿嘅 (蚵仔煎)，正！

一大碟蚵仔煎送到面前。。。。唔對路！點解睇落咁 Dry 嘅？又唔似台灣夜市嗰啲咁晶瑩通透嘅？點知食落，！！！！！！！好味呀！！！！！啲蛋同麵粉相互融合，彼此嘅比例非常恰當！夠煙韌，夠嚼頭，有口感！原來冇台灣夜市嗰啲咁晶瑩通透嘅原因係佢用料足，唔係好似夜市咁勁多麵粉水！仲有，Dry 嘅原因係佢冇學台灣夜市咁咁多油，而且亦冇撻一大 o劈甜酸醬落去。不過，茶軒偏偏整得仲好食！最難係蚵仔嘅份量亦多！好！

我成日話唔應該為咗一笪地方，為咗遷就當地人嘅口味而改變一個地方食物嘅原始風味，但係，茶軒某程度上推翻咗呢個硬道理。只因，其中一個主要原因係，佢用料比「原產地」嘅都好好多呢！

P.S. 唔明點解冇牛肉麵賣？相信以佢哋水準，做出嚟嘅牛肉麵一定好得！奇怪！

Venus，振作！

願上天保祐妳媽媽。

阿彌陀佛~~~~

我呢，一向好怕呢一類丁蟹式人種。呢類人，唔單只歪曲事實混淆是非戾橫折曲指鹿為馬，最得人驚係佢哋真係以為自己係啱，係道理嘅化身！

阿彌陀佛~~~~~~~

雅俗共賞。雅俗共學

雅俗共賞，深入淺出，有趣吸引才是經典的主要元素。

雅俗共學，事半功倍。

最近翻看幾本書籍，包括廿四史其中幾史和唐、牟大儒的一些學術著作等，噓，真的很有催眠作用！我不否認我不才，但它們亦真的很艱深，最致命是非常「懨悶」。尤其是廿四史，真的，我嚐試過若干次用自己最大的耐性、容忍度和幻想力 (將它娛樂化) 去看，結果都是同一結果~ 頂唔順！

所以，史記呀，資治通鑑呀，紅樓夢呀等等這些作品，真的很成功，很難得！因為，它們都不會把人悶倒，而且還非常好看！更百看不厭！

寫東西，做創作，亦必然應該雅俗共賞。因為，雅俗共賞者，是內容豐足，層次豐富，情節百出到十彩；另方面卻不會流於「孤高絕世」，曲高和寡。由於這樣，才能滿足各種不同的人~ 文人雅士，固然欣賞得如癡如醉；但即使係販夫走卒、凡夫俗子者如小弟我，也會看得津津有味。兩者各人皆可從中得樂，從中更或有得著。

但要做到此，必須要做到深入淺出。因為深入淺出，才可提供以上的那些去讓不同的人親近。但要深入淺出，談何容易？！要深入已難矣。而要在深入了之後再要淺出，可知可見就更難上加難。

除了天資天聰，不要只一味讀死書；不要只把書裡的字句或書的重點記下，常掛在咀邊流於紙上談兵；更切忌沉迷於以狂掃典籍為傲卻弄至走火入魔；放開胸襟，去真正感受這個您與我都活在同一天空下的世界，經過實戰實踐，多了人生體會，再融會貫通，這樣，或可令我們有朝一天將深入淺出成為自己手到拿來的本領絕技。

除了雅俗共賞，雅俗共學也很有用！大家不要以為漫畫和通俗小說入面沒東西學，好似打交書裡面嘅人性刻劃、俗語、成語、押韻句及搞笑漫畫嘅幽默神髓等，由於都深入淺出易入腦，所以最底限度來講，得益係，起碼唔會錯別字、寫白字。

再好一點呢，像我，舉個例子，咦，降龍十八掌、易經降龍腿那麼犀利，於是，就走去看關於易經的書。到到讀書的時候，有一科易經哲學，好深！但入面的內容好易上手。簡單點講，亢龍有悔，一回想公仔書內對這招的解釋同圖畫，就即了解。其餘甚麼既濟卦未濟卦水在火上火在水上，都因為看公仔書而好易明白。又例如副修的有一科叫比較政府與政治，回想藍皮書曾運用過的寫法，講過的語句，融匯其中，寫報告，個教授都話精彩~

雅俗共學，好！

另外，最後，個人認為，做人呢，其中一樣好重要的，就係 Cheap 要 Cheap 得起，High 要 High 得到。人，懂得兼容並包，雅俗共賞，那才能細味、體會、領略人生各種不同的感受，各樣不同的事物。這才叫真正認識、享受人生。

都市留影~ 大坑

住喺大坑嗰陣已有聽聞，最近已証實，可靠消息，將會喺兩至三年後大清拆。之後，又變成校服式嘅高廈林立，毫無特式嘅地方。

唉，又快將消失一處有特式，有味道，有香港情嘅地方。大家快啲去留下足跡回憶啦！

大坑嘅大路口，心臟地帶。

成為食嘢新潮地嘅大坑，其中一間好好味嘅薄餅店。下次寫寫對佢嘅食後感。

大坑內街，同內街嘅大排檔、食肆同商舖，同樣「味道」令人傾倒！


呢間餐廳開咗唔係好耐，一般好味。前身係一間好平民，但價錢唔平民，但啲嘢又好好食嘅茶餐廳。

呢，我上次咪係呢間食肆度撞見蔡瀾同倪匡囉。仲即刻番上樓攞本散文畀蔡瀾簽名 tim！

講起呢間大坑美食，佢嘅食物麻麻，但卻好受大坑人歡迎！啲人仲叫嗰個成人講粗口，鬧人嘅老闆娘做阿媽，好有江湖地位！

貓呢，一次嘅唧！第二次唔會再望住鏡頭畀您影咖嘞！話時話，地靈人傑，連喺大坑啲流浪貓都咁靚嘅！

懷念「白飯魚」

以前讀嘅其中一間小學，唔畀著有牌子嘅波鞋，只畀著大陸造嘅布鞋，即係俗稱嘅白飯魚 (有綁帶同唔綁帶)。記得嗰時成日嫌白飯魚好 Cheap，講真，事實亦對對腳唔好，唔健康。校方咁做真係唔係咁啱！

唔知點解衣家反而好想著番，仲覺得幾型 tim！但可惜，唔知邊度有得賣。試過去北角嘅國貨公司搵，但都搵唔到。有冇人知邊度有得賣？

第 XYZ 類接觸

相信大部份人在小學或中學時代都有玩過甚麼碟仙銀仙，對吧。兩者之中，銀仙較流行，因為只要有一張白色圖畫紙，在畫紙中間寫上「HOME」，在「HOME」左右寫上「YES」和「NO」，再在周圍寫上其他玩的人所喜歡寫上的東西如意中人的人名、偶像、數字等等，再加一枚一元便行 (五亳子也行)。不像碟仙那樣又要碟，又要買一張由黃色印成，印得好詭異的碟仙紙，又要點三根香才可以玩。麻煩！

玩銀仙，眾人用中指輕按著那枚停在「HOME」的一元，然後說：「銀仙銀仙，如果你來了就去那裡吧 (那裡即紙上所寫的某一樣東西)。」通常在說幾次後，那枚一元就會「自己」動！然後就各自各懷鬼胎 (追女仔、追男仔、自己逗自己開心、妖言惑眾。)，問問題的啦！你問，我問，他問，大家問問問！High 得不亦樂乎！那枚一元動得好快好暢順的呢！最神奇係隨問者心之所趨而動！哈哈！當然，大家不時都會煞有介事的互問：「你是否在推？！」、「是否你在推？！」、「是你在推嗎？」或「媽的！不要推啦！」等，而答案亦自然一定是：「沒有呀！」、「我真的沒推呀！」、「真的不是我在推呀」或「X！是『他』自己動的呀！」等等。。。。

說真的，玩了那麼多次，沒有一次有料 (銀仙) 到。

真正有「東西」到，是小六時，一次和一常自稱玩茅山的同學仔，在學校地下男廁最尾一格玩的筆仙。

兩人各拿著三枝未刨過的鉛筆，成長方形以筆頭對著 (見圖。分別是各人拿著兩端的筆，停在半空對著。)，然後又說例牌對白：「筆仙筆仙，如果你來了就向左邊動吧。」如是者，說了幾遍，突然間，那用四隻手拿著互對貼著的筆，竟被一股不知明力量硬生生向內推，然後又拗向右上方，再接著又「發」去左上方！驚人的是，那互對貼著的筆的筆頭完全沒有分開過，一直緊緊對黏著！須知道，如果是我和那同學仔其中一方作假，根本不可能做到這樣！

我倆都害怕了！不禁互望一眼，急忙說道：「筆仙筆仙，我們不玩了！對不起！」說了好幾遍，「他」從左上方撥向正上方，再往下變回一開始未玩時的長方形。

那次，是那麼多年來唯一一次真真正正感受到來自另一空間的某種力量 (東西) 存在。

我 X 那星~

天性所然，自少便對鬼神、怪物、各傳說中的不解之謎和堪輿學有濃厚興趣。

怪物和那些不解之謎都未接觸過。鬼神，明天說說一次，唯一一次頗「堅」的。今天，先說一下堪輿學與我的一些。

初中時梁老太拿了我的時辰八字去給一位親戚介紹的失明術士看，錄了音回來細聽。內容空泛，說來說去盡都是那三幅被。當然，其中有些是準確的，但全屬無關痛癢之小事。而不準的，也不少。最吹脹是有更多乃模菱兩可的內容。

到到人長大了，出來工作後，亦看過不少如紫微斗數、子平八字和掌相等，甚至不久前曾會過一位在北角，不用時辰八子也能算的「靈童」~ B 師傅 (真的這樣叫。要他的電話可以留言問我。他的收費是隨您給多少。我有一位朋友，看完更忘了將那封利是投入箱內便離開。)，給我的總括印象，都多是前事準，後來的就不大對路。又當然，亦總有若干批算是準到嚇人的。

還是我老友和尚和她的母親厲害！算我的命，過去的及將去的有六至七成準確！

看過那麼多，也做了那麼多年人，對看相算命的感想總結是，相命不怕看不怕算，更可作為自身一些提點及指引。但要知道不可 (也無須) 迷信，因為，真的，術數，並不能改變一個人的命。更要知道的是，塵世一眾那些術士，並不是那麼神！

我們，人，只要知命，盡力 (嘗試盡力) 便可以了。

最後，說說一位「高人」的事件吧。

在台北生活時，在天母有一間我常去，叫犁舍的英式酒吧，那裡，常見到一個打扮頗古怪，說話還玄過和尚道士 (連聊天也是) 的六十多歲老人。其中一位女酒保跟我說他乃高人，會測字。她對他也真的恭恭敬敬。

一次，我和他聊天，我寫了一個字給他測，他沒有問我測甚麼，只見他看了又看，看了又看，又皺眉頭，真替他辛苦！

過了足足半枝香時間左右，此高人只拋出一句：「嗯，你的祖先呢，是活在馬上。。。。」

我真係 X 那星！古代的人當然是活在馬上！X~

又見 Burger King！

堡加敬，台灣叫漢堡王，現在香港乾脆只有英文名 Burger King，吃漢堡快餐店至愛之一，更係最有感情的漢堡店。(Triple O's 呀、怪獸漢堡呀同摩斯漢堡呀等等係好，但就欠缺了那份兒時情感囉！)

上世紀七十年代，西方的快餐店文化開始在香港成長，吃漢堡西式快餐有麥當勞和堡加敬兩大美國集團，(另有以吃雞為主的肯德基家鄉雞及綜合式快餐的祖利亞) 那時很喜歡堡加敬，對麥當勞就沒有甚麼感覺回憶。到到後來，堡加敬淡出了，好像直至二千年左右再重臨香港，不過很少店舖，所以未能童年美事重溫。

但食神總眷顧我，半個月前在灣仔軒尼詩道集成旁邊的一幢商業大廈讓我和它再次重逢！

地方裝修得簡單而有心思。寬敞舒服，讓人有空間感。難得！乾淨整潔，冷氣夠！服務員女的漂亮，青春可人；男的也斯文醒目，好！

我向那位青春加靚版李冰冰服務員點了 HK$38 的華堡餐，另外在外圍的 PR 即笑容滿面地跟我說：「請座著稍等，一會兒我拿給您。」

華堡包軟而不鬆，牛肉肉香濃厚，有燒烤味有肉汁！生菜配菜多。醬料充足不小家敗氣！薯條又大又粗，夠熱夠新鮮！

不明白為何麥當勞會如此受歡迎？！

離開時問那位青春加靚版李冰冰服務員拿一點紙巾，她放了幾張在手掌上給我，我正準備接過之際，那幾張紙巾被風吹到有點翻起，她佻皮地笑著震動著她的手，另一邊看著我：「dalalalala~~~~~」像在說：「跌啦！跌啦！」

好美！

那天，由我到達直至離開，心情都是無比興奮同滿足。就如一個小孩再遇上失落已久的鍾情玩具一樣，那珍惜感動之情開竅般難忘。

關於宿醉

關於宿醉。。。。

1. 宿醉的第二天，甚麼山珍海味也沒味。最好是來一大碗鹹牛肉湯或者茶瓜魚片莞茜湯。早上喝一碗更有助解宿醉醒神上班。

2. 不想宿醉得那麼厲害，喝酒精度超高的二鍋頭吧！最辛苦的宿醉是喝日本清酒的宿醉，簡直要命得想把自己的頭也割下來！

3. 年紀大了，配額用完，壞了副「偈」，宿醉的那天足可影響工作，不像從前那樣仍能在狀態。

4. 試試吃兩顆必理痛才睡吧。可減少第二天宿醉時的頭暈頭痛的。

5. 第二天可用凍水沖涼，有助減輕宿醉的痛苦。當然，若是冬天的話，這方法會使人苦上加苦。

6. 宿醉唯一好處，是宿醉的那天早上，街上的人是會避您的。因為，基本上，您走路時是不會理會前面的人的呢。

難得奇景！

差少少，再早少少拍嘅話，就可並排！會更正更難得！

1914 ~ 2009

香港！香港！

我的香港，我心中的香港感覺、香港精神、香港情景、對香港的情，是以下一個時期的香港。



曾說過：「以前的歌、詞，往往反映、見証著一個地方正值是如日中天，一切正氣浩然。就好像這首，現在金曲再響，再次聽在耳邊，如此樂韻。。。。當年香江的黃金時代，一切真係有跡可尋！」

呢位係。。。。

有可係最佳無間道同 o埋新一代民主之父。

但肯定係，小人中嘅小人，契弟中嘅 XO！

「不學無術」

看蔡瀾的書和倪匡在某免費報的專欄，關於日文的趣事，我自己也有一個蠻過癮的。跟他們的有異曲同工之笑。

唸書時認識一位唸日文系研究所的同學，他很嚮往日本文化，特別是日本的黑社會以及政黨的有關一切。他的外型中小身裁，但肌肉結實，面相亦極為彪悍，衣著亦頗喜歡顯露他的一身橫練空手道幾段的結果。

他的日文很好，當然了，當喜歡一樣東西，更是熱熾嚮往的話，自然會努力鑽研，得心應手，事半功倍。

系中，很多他的同學及師兄們都不單只對他客客氣氣，當中還帶著敬畏。這不足為奇，一來台灣人平常是很客氣有禮的。二來他的日文的確厲害。但奇怪在不少作為交換生到來和平日與他外出喝酒所碰到的日本人，大家交談一段時間過後即對他表現得恭恭敬敬，或面帶尷尬神色。於是，有一次我終忍不住向他說出我的好奇。

原來，他遇到日本人，就會因應他是那種人那種背景，就以日文的階級文法和每種社會階層的遣詞用字去交談。如粗俗市井的如我們廣東的「挑！咩~~~~ 嘢料呀！乜撚嘢呀！吹得我脹呀！X 你！X 你！」；高尚時的如文言的「非人哉！閣下是舍意思了？！汝又奈何得了我焉！端你媽的！」

如此，一個台灣人的日文可以去到這程度，加上他的外表，令那些蘿蔔頭不知就裡，以為他是曾經滄海的非泛泛之輩！

過癮哉！

網球有感

認識網球，懂得打網球的時候正是波格走下坡路，麥根萊 (第三乞我憎) 上位之時。那時同期先後還有其他出色的網球手如干納斯、韋蘭特、碧加 (第二乞我憎)、阿加斯 (最乞我憎)、艾堡 (第二鍾意) 和最鍾意的蘭度 Ivan Lendl。

鍾意他甚麼？一句：「眼緣！」嗯，也有另外一個原因，不是因為他 Cool 喇，是因為他起手發球那一連串動作尤其是左手拋了網球，球正往頭的前上方逐漸升高的同時，他的右手自然而有序的細細擰動球拍，配合瀟灑向前傾斜俯衝身型，匯聚千斤聚精會神冷酷無情睇你點接的一鏡，獨一無二又好看的發球，酷爆型呆！

運動，我有天份，但不好，起碼未臻至景如網球、足球、打 Golf 及打架。可惜。

簡直暴殄天物~

P.S. 圖中嘅網球拍係古董嚟 (有波格簽名咖！)！而家好難搵到呢啲咁嘅上世紀八十年代前嘅網球拍咖喇！

http://www.youtube.com/watch?v=TncRAV5J7NE

http://www.youtube.com/watch?v=5xAPwx3z950 <--- 麥根萊，抵 X 死！

愛和被愛，避愛~

常聽說：「被愛比去愛來得幸福！」

我覺得並不是如此。首先說被愛吧。被愛者，也得看看去愛他/她的那位是否對板像樣。不要說那位是否樣貌奇特 (醜)，是否庸俗不堪，仰或怪動作特多了，若然您對他/她是完全不過電，毫無感覺可言，而對方卻一直苦苦痴纏，又或者對方只讓您知道他/她在愛您，那對被愛的一方來講，一樣是件煩事、苦惱的事。

而去愛人者，如果去愛一個根本不愛自己的人，那固然痛苦。但就算係去愛一個不懂付出和珍惜的人，那一樣辛苦。

另一層面再去看，懂得適當去愛人的人，才算活過。不懂得、不敢去付出愛的人，才可笑；他們的人生才有著可憾的缺憾。至於被愛的人，若對去愛你/妳的那個可愛傻痴痴也是有意的話，那就在被愛的同時也同時去愛他/她吧！也讓對方享受被愛。這，是福份啊！

最後，關於避愛嘛，其實，愛不必避。對著枯燥乏味、滿身銅臭或只識追求物質，貪威識食無腦兼認叻，總之不喜歡但卻又對你/妳死纏爛打賴死不放的男、女追求者，只需一招，就可令他們撤退，就是~

醜化自己。譬如話，撩鼻屎。

食得是福

台式鴨舌

好友喺台灣帶咗三樣食嘅手信番嚟畀我，其中一樣係台式鴨舌。鹵得入味辣辣地，正！極品！

台式鴨舌同港式鴨舌最大嘅分別係，前者較大同有多兩條骨肋 (見圖)。食台式鴨舌，尤其是食到嗰兩條幼細骨肋，真正會領會到食之無味棄之可惜嘅道理精髓。

話時話，台式鴨舌個賣相好似一隻隻異形咁。。。。

超級公司三文治

大家仲記得我好鍾意自己整嘅四寶之一嘅超級三文治嘛？前排又整過嚟食。不過今次係菜較多 (生菜)，烘到燶燶地硬身嘅超級公司三文治。

大量生菜加兩片法國車打芝士再加三數塊火腿，正正！

牛扒

之前又喺超級市場買咗一塊澳洲牛扒，同一盒薯餅，當自己屋企係扒房。差啲想點 o埋蠟燭發姣 tim ！

以一般厚度計，用中火將塊牛扒前面後面分別煎佢三到四分鐘左右就 very good 咖嘞！梁巔巔 <--- 好一情聖！強！

勁量巔式北京填鴨

有冇覺得喺外面食嘅北京填鴨成日都唔係幾夠喉，又食得唔夠痛快？！

學我啦！嗱，去茶樓或者燒味舖買隻燒鴨 (燒鵝又得~ 北京填鵝！掂！)，配合喺超市買番嚟嘅薄餅同海鮮甜醬，街市買嘅大蔥同紅蘿蔔，自己包嚟食！

最過癮嘅地方係，heeee heeee，用自己個口將啲燒鴨 (or 燒鵝) 咬落嚟嗰 part！好真切夠直接！甚至可以為你妳愛侶用口咬落嚟再加 o埋大蔥、紅蘿蔔條同海鮮甜醬包畀佢食，極度至愛貼心表達！冧！

邊個夠我堅！服未？！^~

由豬流感到 H1N1

自2003年沙士一役完結後，惡夢剛過不久，五年多後的今天，病毒變種再世界性大肆蹂躪人類。今次這個豬流感，H1N1，來勢洶洶，災情結果現在還言之尚早，但有之前的沙士經驗，看到各地，特別是特區政府今次的應對，這一次應該可大步檻過。不會重現沙士之厄運。

相信大家都已從各傳媒中得知今次這 H1N1 的來龍去脈，有關一切，所以，今期我就同各位淺談一些關於病毒的，您可能不知道的有趣資料。保持樂觀和愉快心情也是抗病毒必備條件之一。

(一)
今次這個豬流感之所以在墨西哥那麼惡，主要原因是墨西哥敗在自己的醫療系統。其實，豬流感對現存的兩種藥物是有反應，亦即是說，它不是不治之毒，是有藥可醫的。

(二)
中古世紀的黑死病 (鼠疫)，在短短幾年之間，足足殺死了三份之一歐洲人口 (大約三千萬人)！順道介紹大家看看一部以這個背景拍成的有意思，有哲學味的舊片~ 第七封印 (The Seven Seal)。

(三)
上世紀初除了爆發了第一次世界大戰，同時也爆發了一次流感疫症，那次在數月內共奪去全球五千萬人生命！那又叫西班牙流感。自那次疫症之後，人類對流感自行建立了免疫能力。

(四)
H1N1 據說，據說是鴨和人的不同流感病毒，同時傳染給豬，在豬體內組合變化而成。。。。(先此聲明，有錯請指正！)

(五)
東漢和古羅馬帝國的滅亡主因除了朝政腐敗，另一主因是課本沒說的，就是疫症疾病。當然，這是以疾病史角度的詮釋。有關書本可看「劍橋世界人類疾病史」和「槍炮、病菌與鋼鐵」等。

(六)
不要以為西方醫學一直倡明，它在十八左右世紀仍主張人有病時，應放血，即放血論。。。。

(七)
西方醫學直至十九世紀末，解剖學的重大進步突破，使它獨領風騷。(同時代當然還有另一絕技~ X 光！)

(八)
不要以為中醫落後，您知嘛，我國其實在已經懂得種牛痘。比西方更早！不信嗎？！告訴您，「種人痘」，中國早在明代已有概念。後來更傳輾轉流傳至英國呢！

(九)
豬流感 ---> 墨西哥流感 ---> 北美流感 ---> H1N1。。。。即係歧視中文？！

(十)
我們怎可以不認識保衛我們身體的士兵~ 白血球？它們數量較紅血球少，但體積北紅血球大。而且它沒有固定形狀，亦能藉著形狀上的改變而在人體之內四處流動。

「。。。。特別是特區政府今次的應對，這一次應該可大步檻過。」到到這裡，寫於發現一墨西哥人進入了香港；封鎖灣仔維景酒店與及周局長被踢爆講大話前。

特區政府呀特區政府，為甚麼有沙士那麼一個大教訓，卻還會是這樣子？！我們市民對你的要求已是最低的了！你知嗎？！

不要求執生醒目，只要求會汲取教訓。可惜。。。。

Surstromming~ 終極之「冠」。。。。

瑞典國寶，相信係全世界最臭嘅罐頭，壞咗 (不斷發酵至會爆開罐頭) 但瑞典人仍會食嘅醃鯡魚罐頭。。。。您夠唔夠膽試？！

好臭咖！！！！！！！！！！！！！！！！

這個地方~

堅道，沒有蘭桂坊的庸脂抹粉；沒有蘇豪區的豪裝華麗；沒有國金一帶的奢侈驕氣，卻有平凡中見一抹絲絲難得都市閒情憩靜氣息，舒服的地方。

這裡，也在堅道。也很有那種大都市一角，小街小道的一處讓人歇一會，抖一下，提醒您要呼吸閒情一刻的落腳點，加油站。

邊個陪我去~

呢餐多謝晒！

我雖然有藝術氣質同細胞，但對美術同雕塑就唔多啱同唔多䁱欣賞。之又但係，我幾鍾意畫廊同藝術館嘅 Feel，好似第二個世界咁，好迷離。

今日黃昏嘅時候，去我其中一個專用廁所 (另一個係呢度)，係喺香港視覺藝術中心入面，好大好正咖！仲可以整濕啲紙巾抹 Pat Pat，因為個水龍頭喺 o埋個廁格入面吖嘛~ 正！講番正題，去完之後，咦，好多人呀！仲見到一檯食物同飲品，原來有人喺度有作品展覽 (其實我都估到咖嘞！)。於是，我就走 o埋去飲飲食食！係呀，我唔知秋咖！我唔會唔好 yee si 咖！個秋字有冇寫錯呀？yee si 點寫咖？

啲小食簡簡單單，但又幾有小驚奇。有薯片薯條、三文治、曲奇餅之餘，又會有魚蛋同燒賣！我食咗四轉，每轉個紙碟都五、六成滿。

本來我諗住食完就走，但當我唔知係喺第幾轉，「拮」完啲燒賣放上紙碟嗰陣，個女主人家 (作品者) 好親切，好溫柔，彷彿我係佢親朋好友學生咁，搭住我背脊同我講：「呢度有豉油呀！我開畀你吖。」

！！！！！！

於是，我入去好認真咁睇晒佢全部作品。

唔識欣賞，但感覺到無比熱忱同誠意。

臨走嗰陣佢同我 Bye，我同佢講，喺我個 Blog 一定會記下今次好玩一遇。

亦順道同妳講：「同妳唔相識嘅 Kathy，雖然我唔識欣賞妳嘅作品，但妳對妳喜歡嘅藝術所付出嘅誠心正義，我好感覺到同欣賞！」亦，「呢餐多謝晒！」

P.S. I 中國女子著得好性感嘅，就係 Kathy 嘞。

P.S.II 簽名不妨宣傳我個 Blog！Heeeeee!

寫一些~

唔駛驚！

今次呢單豬流感，大家唔駛咁驚。因為，今次呢隻嘢唔會好似沙士咁杰，最主要原因係，有藥醫嘛！驚就只係驚有關局明明唔駛有事都自己整到有事咋！！！！

人種

做咗咁耐嘢，做過都叫做幾多行，遇過好多種人，好人 (當然最少。但仍三生有幸。)、小人、壞人、怪人 (開會吐口水兼放屁)、神經病人以及惡人。

最難頂係惡人。因為佢哋嘅存在足以令人窒息。如果係 o彭 o彭聲加上動作狂野粗暴嘅種類就更惡頂。對住呢啲品種，唯一方法係畀佢 feel 到您亦唔係好惹，如果佢犯到您您亦要佢付出代價，咁，呢 oD好多時都係自幼有某啲不幸遭遇、空心冇憑直、只一味靠惡形惡相嘅野人就會唔點攪您咖嘞！

真係有料，本身可以好惡嘅人，我見過嘅好多都好好相與嘅~

為食

越嚟越覺得自己好為食。之前，一位朋友兼同事同我講，話我對住啲嘢食嗰時，對眼發光同笑淫淫咁嘅！好色相喉擒咁！

其實。。。。係！我真係好為食！不過，我唔揀飲擇食。當然，我要嘴刁起上嚟嘅話，哈，唔係誇張，舉例，我基本上可以食得出死魚還是鮮魚！所以，我係 enjoy 「吃」嗰陣嘅福份~

食得是福嘛！而且，「吃」，是最公道、最到、最直接嘅慰勞人生事情呢！

佩服

最近忽然對街邊三種行業的人，產生敬佩的心。

一是站在手提電話公司門口，推銷自家月費的職員；二是只有一個易拉架，推銷上網和收費電視的推銷員；三是在小店舖或百貨公司一小角，不停試範並大聲推銷其公司產品的銷售員。

可以肯定，他們的入息都很有限。尤以第一和第三類，甚至可以說是低收入人士。但他們都拼足命去幹，去 Sell！雖說不用命便會被人取而代之，要保住飯碗便得如此。不過，看看他們，不但敬業樂業，更都是有團火的。

難得的就在於此。

另一使我更佩服的是在便利店與油站工作的職員，不論是全職或是兼職，師奶、中坑抑或年輕人，他們在每一次的收銀交易及入完油之後都會落力問到加不加多一點錢換些甚麼甚麼。要知道，他們是沒佣金的。但他們就是如此落足力，交足功課。

想著想著他們，我不禁笑自己。也順道跟大家說：「我們有在盡力嗎？」